Mau parau ’oa’oa nō ’outou ’e nō tō te ao nei
E nehenehe ’outou e fa’ari’i i te mau parau ’oa’oa nō te here ’e nō te pōpou, nō te mea ’ua fa’aho’i fa’ahou mai Iesu Mesia i tāna ’Ēkālesia, nō te ha’amaita’i i te tā’āto’ara’a o te mau tamari’i a te Atua.
Sacred Grove [Uru rā’au mo’a], nā Al Rounds
Tā tātou poro’i nō te tīa’ira’a ’e nō te hau i te ta’ata ato’a ’oia ho’i tē ora nei Iesu Mesia, ’e ’ua fa’aho’i fa’ahou mai ’oia i tāna ’evanelia ’e tāna ’Ēkālesia i teie mau mahana hope’a nei. « ’Auē ïa te hanahana teie nei mau mea i te ta’ata nei ! » ’ua parau te peropheta Iosepha Semita. E « mau parau ’oa’oara’a rahi nō te ta’ata ato’a […] ’ō tē ti’a i te fa’a’ī i te fenua nei ’e tē fa’aitoito i te mau ’ā’au o te ta’ata ato’a ’ia fa’aro’o rātou i te reira. »
E fa’a’itera’a hōhonu teie mau parau ’oa’oa nō te here mure ’ore o tō tātou Metua i te ao ra ’e o tō tātou Fa’aora. E ha’amaita’i te reira i te mau nūna’a ato’a ’e e fa’aineine i te ao nei nō te mahana e ho’i fa’ahou mai ai Iesu Mesia. Tē ’oa’oa nei au e nehenehe au e poro i teie mau parau mau i tō te ao ato’a nei i te roara’a o tō’u orara’a.
Resurrection Morning [Po’ipo’i nō te ti’afa’ahoura’a], nā Sarah Hatch
Te mea māere roa ’e te fa’ahiahia
I roto i te hō’ē uru rā’au, ’ua fā mai te Atua te Metua ’e tāna Tamaiti ’o Iesu Mesia, ’e ’ua paraparau mai ia Iosepha Semita ’ei pāhonora’a i te pure a Iosepha nō ni’a i te ’ēkālesia tāna e ’āmui atu (hi’o Iosepha Semita—’Ā’amu 1:16–20). ’Ua parau Iesu ia Iosepha ’eiaha e ’āmui atu i te hō’ē ’ēkālesia. ’Ua fafau ’oia ē, e heheuhia mai te ’īra’a o tāna ’evanelia ia Iosepha a muri a’e.
Nō te mau ta’ata e rave rahi, e au ra e ’ere Iosepha i te ta’ata tano ’ia pi’ihia nō te rave i te hō’ē ’ohipa faufa’a rahi mau. I tō rātou hi’ora’a, e tamāroa ’aita i haere i te ha’api’ira’a, ’e nō roto mai i te hō’ē fare fa’a’apu na’ina’i. Nā roto rā ia Iosepha, e fa’atupu mai te Metua i te ao ra ’e ’o Iesu Mesia i te hō’ē ’ohipa fa’ahiahia mau. E hōro’ahia ia Iosepha te mau fa’auera’a, te mau heheura’a faufa’a rahi ’e te mau ha’api’ira’a tumu faufa’a rahi nō ni’a i te fa’anahora’a here a te Metua i te ao ra ’e te here tāra’ehara a Iesu Mesia, nō te ha’amaita’i ia tātou ’e nō te tauturu ia tātou ’ia ’ite nāhea tātou e ho’i ai i te fare.
E ’ite pūai nō te here o te Atua
’Ua fā mai te melahi Moroni ia Iosepha Semita ’e ’ua parau ia Iosepha nō te hō’ē pāpa’a parau, tei pāpa’ihia i ni’a i te mau ’api ’auro, tei hunahia i pīha’i iho noa mai (hi’o Iosepha Semita—’Ā’amu 1:33–34). Ē i te pae hope’a, ’ua ’īriti Iosepha i te reira pāpa’a parau, i riro mai ai te Buka a Moromona ’o tē ti’a nei i pīha’i a’e i te Bibilia ’ei ’ite fa’ahou nō Iesu Mesia.
I te roara’a o te Buka a Moromona, e rave rahi hānere matahiti hou te Mesia, ’ua ’ite ’e ’ua tohu te mau ta’ata i tōna taera’a mai ’e ’ua tīa’i māite rātou i te reira. E tai’o ato’a tātou i tō te Fa’aora fāra’a ’e te aupurura’a i te ’āti Nephi. ’Ua ani manihini ’oia i te tā’āto’ara’a ’ia haere mai iāna ra. ’Ua fa’aora ’oia i te feiā ma’i, te piri’o’i, te matapō ’e tei ro’ohia i te ’ati. ’Ua ha’amaita’i ’oia i muri iho i te mau tamari’i ri’i ’e ’ua pure nō rātou (hi’o 3 Nephi 11:14–15 ; 3 Nephi 17:7–9 ; 3 Nephi 17:21).
Tē ha’api’i rahi nei te Buka a Moromona ia tātou nō ni’a i te here ’e te aroha o te Fa’aora. Tē fa’a’ite pāpū mau nei te reira ē « ’o Iesu te Mesia ». Tei roto i te reira te nehenehe o tāna ’evanelia mure ’ore. Tē hōro’a mai nei te Buka a Moromona i te hō’ē hōho’a māramarama nō te here rahi o tō tātou Metua i te ao ra ’e o tō tātou Fa’aora ia tātou, rahi atu i te mau mea ato’a tā tātou e nehenehe e feruri.
Gold Plates [Te mau ’api ’auro], nā Robert Theodore Barrett
Te mau ha’amaita’ira’a o te autahu’ara’a ’e te ’Ēkālesia
’Ua haere mai te tahi atu mau ve’a nō te ra’i ia Iosepha Semita ra. ’Ua haere mai Ioane Bāpetizo nō te fa’aho’i mai i te ha’amanara’a nō te bāpetizo. ’Ua fa’aho’i mai Petero, Iakobo ’e Ioane i te pi’ira’a ’āpōsetolo ’e te mau tāviri nō te ha’amanara’a autahu’ara’a. « ’Ua haere ato’a mai vetahi atu, mai ia Elia (Eliaha), tei fa’aho’i mai i te mana nō te tāhō’ē i te mau ’utuāfare ē a muri noa atu, ’ei autā’atira’a mure ’ore e upo’oti’a i ni’a i te pohe. »
I muri iho ’ua ha’amau Iesu Mesia nā roto i te peropheta Iosepha i te hō’ē ’Ēkālesia i hōho’ahia i ni’a terā ’o tāna i fa’anaho i te tau o te Faufa’a ’Āpī (hi’o Te mau Hīro’a Fa’aro’o 1:6). Nā roto ia Iesu Mesia ’e tāna mau ’āpōsetolo ’e mau peropheta, ’ua ha’amatara Te ’Ēkālesia a Iesu Mesia i te Feiā Mo’a i te mau Mahana Hope’a nei i te mau ha’amaita’ira’a o te mana autahu’ara’a tei fa’aho’i-fa’ahou-hia mai i te mau tamari’i ato’a a te Atua.
Tē parau nei au ē, mai te peu tē hepohepo nei ’outou ’e tē mana’o nei e’ita e haere ia ’outou, ’aore rā ’aita tō ’outou vāhi tā’amura’a, ’eiaha e ha’amāuiui ia ’outou iho ’e ’ia ’ite mai ’outou ē ’ua herehia ’outou e te Metua i te ao ra ’e e tāna Tamaiti, tō tātou Fa’aora, hau atu i tā ’outou e nehenehe e feruri. E ani-manihini-hia te tā’āto’ara’a ’ia haere mai i te Mesia ra ’e i tāna ’Ēkālesia. E ’ere te ’Ēkālesia nō te feiā fāito maita’i roa. E au te reira i te hō’ē fare ma’i i reira tātou e ’ite mai ai i te fa’aorara’a. I te fare purera’a e fāriu tātou i ni’a i te ta’ata, e tāvini tātou ia vetahi ’ē ma te here, ’e e fa’a’ite tātou i te ’evanelia. E nehenehe tātou e « [fa’a]ha’amana’ohia ’e ’ia fa’a’amuhia i te parau maita’i a te Atua » (Moroni 6:4). E nehenehe tātou e ’ite mai i te hau ’e te fa’aorara’a. ’Auē ïa ha’amaita’ira’a fa’ahiahia mau !
E tumu nō te ’oa’oa rahi
’Ua here te Metua i te ao ra ’e tāna Tamaiti here ’o Iesu Mesia, ia ’outou ’e ’ua hina’aro—hau atu i te mau mea ato’a—e fa’aho’i mai ia ’outou i te fare ’e ’ia roa’a te huru orara’a tā rāua e ora nei ē a muri noa atu. Tē heheu mai nei te fa’aho’i-fa’ahou-ra’a mai ē, ’ua rave rāua i te mau mea ato’a ’ia riro mai te reira ’ei rāve’a hanahana nō ’outou. I te tahi taime, e nehenehe ’outou e fa’aruru i te mau tāmatara’a ’e te mau fifi, terā rā ’ua hāmanihia ’outou, « ’ia noa’a tō [’outou] ’oa’oa » (2 Nephi 2:25) i roto i teie orara’a ’e i muri iho. E rahi a’e tō te peropheta Iosepha ’itera’a i te reira i te tahi ’ē atu ta’ata. E ’ite mai ’outou ē, e nehenehe e noa’a ia ’outou te ’oa’oa ’a tātarahapa tāmau ai ’outou ’e ’a fāriu ai ’outou i tō ’outou Metua i te ao ra ’e i tō ’outou Fa’aora.
’Ua fa’aruru pinepine Iosepha i te pāto’ira’a ’e te hāmani-’ino-ra’a, ’ua tāpe’a noa rā ’oia i tōna « huru ’ana’anatae » (Iosepha Semita—’Ā’amu 1:28). ’Ua vai ’oa’oa noa ’oia, te pūai ’e te itoito, ’e ’ua rave fa’aoti i te ’ohipa i hōro’ahia iāna nō te rave. Mai te reira ato’a nō te feiā ’o tei mono mai iāna.
E mea fifi roa te mau mahana mātāmua o te ’Ēkālesia, ’e e nehenehe ato’a e fifi roa i teie mahana, ’ua tāmau noa rā te fa’aho’i-fa’ahou-ra’a i terā tau—’e tē tāmau noa nei i teie mahana. Tē arata’i nei Iesu Mesia i tāna ’Ēkālesia. Tē tāmau nei te mau peropheta ora i te arata’i ia tātou. E tāmau noa te mau fare o te Fatu i te patuhia. E parare te here o te Atua ’e o Iesu Mesia nā te ao ato’a nei, ’a pe’e ai tātou i te fa’auera’a a te Fa’aora ’ia fa’a’amu i tāna mau māmoe ’e ’ia fa’a’ite i tāna ’evanelia. E parare te mau parau mau o te fa’aho’i-fa’ahou-ra’a nā roto i te mau rāve’a ’e i te mau vāhi e ’ore roa e ’itehia i te tau o Iosepha. E tūtava tātou nō te fa’ariro i te ao nei ’ei ao maita’i a’e ’e te ’āmahamaha iti a’e.
’A ’imi tāmau maita’i ai ’outou i te ’evanelia, e ’a pure pinepine ai ’e ’a tāvini ai ia vetahi ’ē, e ha’aputapū te parau poro’i o te fa’aho’i-fa’ahou-ra’a i tō ’outou ’ā’au ’e e taui i tō ’outou orara’a. E’ita paha te reira e tupu ’oi’oi mai, e hōpoi mai rā te reira i te ’oa’oa ia ’outou—mai tei tupu nō te peropheta Iosepha.
’Ia ha’amaita’i mai ’e ’ia arata’i te mau parau ’oa’oa nō te here ’e nō te pōpou tei hōpoihia mai e te fa’aho’i-fa’ahou-ra’a, i tō ’outou orara’a—i teienei ’e i te mau taime ato’a.