E 7 rāve’a nō te hi’o atu i te Mesia

’Oia mau, e tītauhia ’ia ’imi iāna. Tē hina’aro nei rā ’oia ’ia ’iteahia mai ’oia ! E ’ere te reira i te perē tāpō. E hina’aro rahi tō te Fatu e ha’amaita’i ia ’oe—’oia mau, mea ’oa’oa nōna ’ia nā reira (hi’o Te Ha’api’ira’a Tumu ’e te mau Fafaura’a 41:1). ’Aita ’oia e ’imi nei i te mau tumu nō te fa’a’ere ia ’oe. ’O te huritua mau : Tē ’imi noa nei ’oia i te ha’amaita’i ia ’oe. Mai tā Elder Patrick Kearon nō te pupu nō te Tino ’Ahuru ma Piti ’āpōsetolo i ha’api’i : « ’Aita, ’aita [te Fa’aora] e tu’u nei i te mau ārai’ē’a ’e te mau ’ōpanira’a ; e tātara ’oia i te reira. ’Aita ’oia e ’ōpani ia ’outou i rāpae ; e fa’ari’i ’oia ia ’outou ’ia tomo mai. ’O tāna tāvinira’a tā’āto’a te fa’a’itera’a ora nō teie mana’o. »

E māuruuru te Fatu ’ia « fā’i mai [tātou] i tōna rima i roto i te mau mea ato’a » (Te Ha’api’ira’a Tumu ’e te mau Fafaura’a 59:21). Nō reira ’a ha’apāpū i te fā’i i tōna mana fa’auru i roto i tō ’oe orara’a ! ’A ha’amāuruuru iāna ’ia maita’i ana’e te mau mea nō ’oe ’e ’a ’imi i te hau ’e te hāro’aro’ara’a ’ia ’ore ana’e.

Hau atu i te fā’ira’a i te mana fa’auru o te Fatu i roto i tō ’oe orara’a, e mea faufa’a ato’a ’ia putapū—’e ’ia fa’a’ite—i te ’ā’au mēhara. E’ita paha ’oe e « hi’o » tino i te Fa’aora, e nehenehe rā ’oe e hi’o i tāna mau ha’amaita’ira’a i roto i tō ’oe orara’a ! ’Ua parau Elder Gary B. Sabin nō te Hitu ’Ahuru : « E’ita roa atu tō ’outou ’oa’oa e hau atu i tō ’outou māuruuru ». E ha’amāuruuru i te Fatu i te mau mahana ato’a nō tā ’oe mau ha’amaita’ira’a. ’Ia ’ite ana’e ’oe i te ahoaho, ’a pe’e i te a’o o te hīmene tahito ra : « Tai’o mai na i tō mau maita’i ; tai’o noa mai na i tō mau maita’i, e māere ’oe i te rahira’a ».

Pēnei a’e e « ’ite » maita’i atu ā ’oe i te Fa’aora i te roara’a o te mahana, mai te mea e ha’amata ’oe nā roto i te paraparaura’a i te Metua i te ao ra. ’A ani iāna ’ia tauturu mai ia ’oe ’ia ha’amana’o i te Fa’aora ’e ’ia vai ara i tōna mana fa’auru i roto i tō ’oe orara’a. E nehenehe ’oe e pure pinepine mai tā ’oe e hina’aro i te roara’a o te mahana. ’E hou ’oe ’a ta’oto ai, ’a pure fa’ahou nō te parau i te Metua i te ao ra mea nāhea te mau mea i te tupura’a. ’Aita roa ’oia e rohirohi i te fa’aro’o ia ’oe !

Hō’ē rāve’a nō te tāpe’a rōtahi i tō ’oe mau mana’o i ni’a ia Iesu Mesia ’o te vaira’a ïa te mau parau nō te hō’ē pāpa’ira’a mo’a auhia ’aore rā te mau parau nō te hō’ē hīmene fa’auru i roto i tō ’oe ferurira’a. ’A ha’api’ipi’i i te ha’amana’ora’a i te reira ’ia ’ite ana’e ’oe i te mau mana’o tano ’ore i te fa’aōra’a mai. E mea pinepine e nava’i noa paha te ha’amana’ora’a (’e te hīmene-mū-ra’a) i te i’oa o te hīmene nō te fa’atītī’aifaro i tō ’oe mau mana’o : « E tamari’i au nā te Atua ». « Hina’aro vau ia ’oe ». « Tō’u vārua, tei te Fatu ’oe ».

’A hi’o mai i te tahi mau hōho’a ’ihi nō te Fa’aora tā ’oe e au, ’e i muri iho ’a tu’u i te reira i te vāhi e ’ite pinepine ’oe i te reira. Te tahi mau vāhi mai te papa’i o tō ’oe piha ta’otora’a, te hi’o o tō ’oe fare pape, tā ’oe vaira’a tauiha’a i te fare ha’api’ira’a, ’aore rā ’ei hōho’a paruai nō tā ’oe mātini rorouira ’aore rā tā ’oe niuniu ’āfa’ifa’i.

E mea nehenehe mau ! ’E ’ua hāmani te Fa’aora i te reira nō ’oe (hi’o Te Ha’api’ira’a Tumu ’e Te mau Fafaura’a 14:9) ! ’Aita e tumu tā tātou i ’ite ē ’ei mea au te fenua nei. Pēnei a’e e nehenehe tā tātou e ora i ni’a i te hō’ē ao pārahurahu ’e te ’āfaro ’e te rehu. ’Aita rā, ’ua hāmani te Fa’aora i te hō’ē ao « nō te maita’i ’e te fa’a’ohipara’a a te ta’ata nei, nō te ha’amāuruuru i te mata ’e nō te fa’a’oa’oa i te ’ā’au » (Te Ha’api’ira’a Tumu ’e te mau Fafaura’a 59:18). E nehenehe e parau ē, e mea nehenehe te fenua nō te mea e fa’atupu te mau mea nehenehe i te mana’o maita’i i roto ia tātou. Mai te mea ’ua hina’aro ’oe e ha’amana’o i te Fa’aora, ’a hi’o noa ’ati a’e ia ’oe.