Tā’u ’arora’a i tō’u iho hōho’a

I te fare ha’api’ira’a tuarua, e mea fifi roa nō’u ’ia hi’o i tō’u iho hōho’a ta’ata ’e ’ia fa’aō iā’u i roto i te mau pupu. ’Ua tāmata vau i te fa’a’eta’etara’a tino nō te taui i hi’ora’a o tō’u tino, ’aita rā vau i māuruuru i te hōho’a tā te hi’o e fa’a’ite mai ra.

’E fa’ari’i atu ra tō’u tuahine pa’ari i tōna ha’amaita’ira’a pātereāreha, ’e ’ua ha’amata vau i te feruri e tītau ato’a i tō’u. E 12 matahiti tō’u ’e i te ha’amatara’a, ’ua feruri au ē e mea ’āpī roa paha vau. ’Ua pure rā vau ’e ’ua paraparau i tō’u ’episekōpo, ’e e au ra ē e mea tano te reira.

’Ua fa’aha’amana’o mai tō’u ha’amaita’ira’a pātereāreha iā’u ē, ’ua ’ite maita’i te Metua i te ao ra iā’u ’e ’ua ’ite ’oia i te mau ’arora’a tā’u e fa’aruru nei. ’Ua ’ite maita’i ’oia iho i tō’u i’oa. Tei reira ’oia nō te tauturu iā’u mai te peu e hina’aro noa vau i te ani i tāna tauturu.

I te tahi taime e hi’o ’oe ia ’oe iho ma te feruri ē, e ’ere ’oe i te mea nehenehe roa mai te au i te fāito hi’ora’a a tō te ao nei. Terā rā, ’ua ha’api’i mai au ē, e mea faufa’a a’e te hi’ora’a a te Atua iā’u, i tā vetahi ’ē. ’E mai te peu ’ua ’ite au ē, tē hi’o mai nei te Atua iā’u mai tāna tamāhine, ’o te reira ana’e tei tītauhia.