E aha te ’īra’a o te ’evanelia ?

Jesus in Gethsemane [Iesu i Getesemane], nā Dan Burr

’Ua parau te Fatu ē, te ’īra’a o te ’evanelia ’o te « fafaura’a mure ’ore » ïa, ’o tāna i « fa’ataehia atu i te tamari’i a te ta’ata nei » (Te Ha’api’ira’a Tumu ’e te mau Fafaura’a 66:2). Tei roto i te reira te mau mea ato’a e tītauhia nō te mau tamari’i a te Atua, nō te tomo atu i roto i te hō’ē tā’amura’a fafaura’a ’e ’ōna, ’e nō te fa’ari’i i te fa’aorara’a ’e te fa’ateiteira’a.

’O te ’evanelia te « parau ’āpī maita’i » nō ni’a ia Iesu Mesia. « ’Ua hōro’ahia mai te ’ōpuara’a nō te fa’aorara’a nā roto i te tāra’ehara a Iesu Mesia. I roto i te ’evanelia, tē vai ra ïa te mau parau mau mure ’ore ’e ’aore rā te mau ture, te mau fafaura’a, ’e te mau ’ōro’a i tītauhia i te ta’ata nei ’ia fāri’i nō te ho’i i mua i te aro o te Atua » (Arata’i nō te mau pāpa’ira’a mo’a, « ’Evanelia »). E rave rahi o teie mau mea tei mo’e. I teienei rā, nā roto i te heheura’a i te mau peropheta, ha’amata nā ni’a ia Iosepha Semita, ’ua fa’aho’i fa’ahou mai te Fatu i te ’īra’a o tāna ’evanelia.

Nā roto i te fa’aho’i-fa’ahou-ra’a mai o te ’īra’a o tāna ’evanelia, « tē ani manihini nei [Iesu Mesia] ia tātou pā’āto’a ’ia haere mai iāna ra ’e i tāna ’Ēkālesia, ’ia fāri’i i te Vārua Maita’i, te mau ’ōro’a nō te fa’aorara’a ’e ’ia roa’a ho’i te ’oa’oara’a tāmau » (« Te fa’aho’i-fa’ahou-ra’a mai o te ’īra’a o te ’evanelia a Iesu Mesia : E poro’i i tō te ao nei nō te piti-hānere-ra’a o te matahiti », Vaira’a buka ’evanelia).