Pūhapa nō te mahana ua

« Ananahi tā’u ha’utira’a, e ’ere ? » Te uira’a ïa a Lucy i tōna māmā i tōna vihira’a iā’u i roto i te ro’i.

’Ua tā’iri’iri te upo’o o māmā. « ’Ē ! Ananahi pō i te hora 6:00. »

E mea motufenu ’o Lucy. E rave rahi hepetoma tōna tīa’ira’a i te ha’utira’a mātāmua a tāna pupu softball. ’E i teie matahiti, e mea tarona tō rātou piriaro ! Nō tōna motufenu rahi, ’aita e topa te ta’oto.

’Ia po’ipo’i a’e rā, ’ua fā’ao ’o Lucy nā te ha’amāramarama ’e ’ua fa’atu’atu’a i tōna mata. E mea rumaruma te ra’i, ’ua hōpuna haere te fenua. ’Ua ua i te pō ē ao noa atu.

Tūturi a’era ’oia nō tā pure po’ipo’i. « E te Metua here i te ao ra, ’a tauturu i te reva ’ia maita’i mai nō tā’u ha’utira’a softball i teie pō. »

I terā mahana tā’āto’a i te ha’api’ira’a, ’ua māna’ona’o ’o Lucy i te ha’utira’a. ’Ua māna’ona’o ’oia iāna i te ’ō’omora’a i tōna piriaro tarona, ’e ’ua tāpapa nō te haru mai i te pōpō rē. ’Āre’a i rāpae, e ua noa ïa ’e hopuna.

Pure ihora ’o Lucy i roto i tōna iāna. E te Metua i te ao ra, ’a tauturu na i te mahana ’ia ’ana’ana mai, ’ia ha’uti mātou i te pō.

I te pātēra’a te oe o te fare ha’api’ira’a, ’ua haru Lucy i tāna pūtē tua ’e horo atu ra i rāpae. Tē ’ite ra ’oia i te mahana i te ’ana’anara’a nā roto mai i te mau ata !

I tō Māmā rā ti’ira’a mai iāna, e ’ere ïa i te parau ’āpī maita’i. « Fa’a’orehia te ha’utira’a i teie pō », tāna parau. « ’Ua oti iho ā ïa. »

’Ua hi’o Lucy i te ra’i. « Tē huru matara mai ra te mahana. Pēnei a’e e rauma’i mai. »

« ’Oia », ’ua parau Māmā. « ’Ua hōpuna roa rā te tahua softball nō te ua. E noa atu ē, e rauma’i mai, ’ua rahi roa te vari paruparu nō te ha’uti. E tārena fa’ahou rātou i te ha’utira’a nō te tahi atu taime. »

Tahe a’era te roimata o Lucy. E ’ere i te riri nei ! I hina’aro mau ’ oia e ha’uti i teie pō. Nō te aha ’aita te Metua i te ao ra i pāhono ai i tāna mau pure ?

I te fare, hō’ē ā tō Lucy rumaruma ’e te amuamu i te mau ata ua. ’Aita tōna ’ana’anatae e tai’o i tāna buka au roa a’e. ’E noa atu ē, ’ua hāmani māmā i tāna mā’a au roa a’e i terā pō, ’aita e aura’a.

I muri a’e i te tāmā’ara’a, ’ua ne’e mai te tuahine iti o Lucy, ’o Ellie, i ni’a i tōna turi ’āvae. « Ha’uti tāua ? » tāna ïa uira’a.

Muhumuhu ’o Lucy. « Mai ïa », tāna i parau. I muri iho, ’ua tae mai te hō’ē mana’o iāna. « Rave ana’e i te hō’ē mea ’ana’anatae. »

Haru ihora i te hō’ē purūmu ma te tā’amu i te hō’ē tāhei i te hō’ē pae mai te hō’ē reva. I muri iho, ’ua ha’aputuputu i tōna mau tuahine ato’a. ’Ua ’āfa’i ’oia i te reva i ni’a ma te parau : « Maeva i te pūhapa nō te mahana ua ! ’O te vāhi tā ’outou e haere nō te ’ārearea ’aita ana’e e nehenehe e ha’uti nā rāpae. »

’Oa’oa roa tōna nā tuahine.

« Nā mua roa », ’ua parau ’o Lucy, « e hīmene tātou i tā tātou hīmene pūhapara’a. »

’Ata haere noa nā tamāhine ’a hāmani ai i te hō’ē hīmene ha’amā’au ’e tō te reira mau parau. Porotē a’era nā roto i te piha ma tō rātou reva ’e ma te hīmene pūai roa.

« I teienei, e fa’ati’a tātou i te fare auta’a nō tātou ! » ’Ua tauturu Lucy i tōna mau tuahine ’ia ha’aputuputu mai i te mau ’ahu ta’oto ’e te mau tūru’a nō te fa’ati’a i te tahi pare. ’Ua mā’iri i raro i te tahi ma’a taime. I tō rātou rā tātā’ira’a i te reira, ’ua putuputu rātou i roto i te pare nō te ha’uti.

Ē tae mai nei te hora ta’otora’a. « Maita’i ē, e ua fa’ahou ananahi », ’ua parau ’o Liza, te tuahine o Lucy. « ’Ua hina’aro fa’ahou vau e ha’uti i te pūhapa nō te mahana ua ! »

« Māuruuru nō te ha’utira’a ’e tō ’oe nā tuahine », ’ua parau Māmā ma te tauahi ia Lucy. « ’Ua fa’a’ana’ana ’oe i tā ’oe iho mahana i roto i te rumaruma. Fa’ahiahia roa vau ia ’oe. »

’Oa’oa roa ’o Lucy i te pa’umara’a i ni’a i tōna ro’i. ’Aita tāna mau pure i pāhonohia mai tāna i hina’aro. Terā rā, ’ua tauturu noa ā te Metua i te ao ra iāna ’ia ’imi i te hō’ē ’ohipa ’ārearea nō tōna ’utuāfare—’e hō’ē ā tō te reira ’ārearea i te ’ō’omora’a i te tārona i ni’a i tāna ha’utira’a softball mātāmua.

Pia i te PDF

Fa’ahōho’araʼa nā Apryl Stott