Rahi roa te riri nō te pure

« ’Aita e ta’ata e māramarama nei iā’u ! » ’Ua tuō atu Gabriela ma te tāpiri pūai i tona ’ōpani piha ta’otora’a. ’E mahana fifi mau teie mahana. ’Ua fa’ao’ō’o te hō’ē ta’ata iāna i te fare ha’api’ira’a. ’E i te ho’ira’a Gabriela i te fare, ’ua ha’apahipahi ’oia ’e ’ua pe’ape’a atu ra rāua ’o Mutti (māmā).

’Ua fa’atopa Gabriela iāna i ni’a i tōna ro’i ’e ’ua ha’amata i te ta’i. ’Ua tahe te roimata nā ni’a i tōna pāpāri’a, ’e ’ua vī roa tōna ’ōuma i te riri. ’Aita roa ’oia e au ’ia tupu te reira huru mana’o.

’Ua ha’amana’o ’oia i te ha’api’ira’a mai i te Paraimere ē, e nehenehe ’oia e pure i te Metua i te ao ra i te mau taime ato’a e hina’aro ai ’oia i te tauturu. ’Ua hina’aro ’oia e fa’ahiti i te hō’ē pure, ’ia taui tōna mana’o, ’ua rahi roa rā te riri nō te rōtahi atu. ’Ua tāpiri ’oia i tōna mata ’e ’ua huti i te tahi hutira’a aho hōhonu. E aha tāna e nehenehe e rave nō te tāmarū iāna ?

Tau tetoni i muri mai, ’ua puta mai te hō’ē mana’o i tōna ferurira’a.

’A feruri i te mau mea ’o tā ’oe e māuruuru nei.

’Ua ’ara’ara tōna mata ’e ’ua hi’o ’ati a’e iāna nā roto i tōna piha. Tē vai ra te hō’ē hōho’a i ni’a i te papa’i nō Mutti ’e ’o Vati (pāpā). ’Ua here roa Gabriela i tōna ’utuāfare, noa atu ē e tupu te tahi pe’ape’a i rotopū ia rātou.

« ’Ua māuruuru roa vau nō tō’u nā metua », ’ua parau ’oia.

I muri iho, ’ua mana’o ’oia i tōna mau taea’e fēti’i ia Gwendolyn, Lydia ’e ’o Thomas. E mea hōro’a noa rātou i tā rātou mau ha’uti iāna ’e e mea ’ata’ata nōna. E mea au roa nāna ’ia ha’uti nā muri ia rātou.

« ’Ua māuruuru roa vau nō tō’u mau taea’e fēti’i », ’ua parau Gabriela.

I muri iho, ’ua hi’o atu ’oia nā roto i te ha’amāramarama.

Tē topa atu ra te mahana ’e ’ua ’ī roa te ra’i i te mau ’ū nehenehe—te pua tou, te ’ute’ute, te re’are’a ’e te tārona.

« ’Ua māuruuru roa vau nō te mau topara’a mahana », ’ua parau Gabriela.

’E ’ua mana’o i te tahi atu mau mea e rave rahi. ’Ua māuruuru ’oia nō te tāmā’ara’a avatea ’o tāna i ’amu i te fare ha’api’ira’a i teie mahana. ’Ua māuruuru ’oia nō tōna mau hoa. ’Ua māuruuru ’oia nō te fare tahua tāna e noho nei.

E mea ’ārearea roa ’ia mana’o i te mau mea ’o tā tātou e māuruuru nei ! ’Aita roa Gabriela i mana’o na i te rahira’a ’ohipa maita’i i roto i tōna orara’a.

’Ua ’ite ’oia ē, nā te Vārua Maita’i i hōro’a mai i te mana’o e feruri i tōna mau ha’amaita’ira’a. ’Ua hau tōna ’ā’au i teienei. ’Ua ineine ’oia nō te pure.

« E te Metua here i te ao ra », ’ua parau ’oia. « Tē tātarahapa nei au nō tō’u ririra’a ia Muti. Māuruuru nō te tauturura’a iā’u ’ia ’ite fa’ahou i te hau ’e te ’oa’oa. Māuruuru i te tonora’a mai i te Vārua Maita’i nō te fa’aha’amana’o iā’u i tō’u mau ha’amaita’ira’a. I te i’oa o Iesu Mesia, ’āmene ».

’Ua haere atu ra i rāpae i tōna piha. Tei roto Mutti ’e ’o Vati i te fare tūtu, tē tunu ra i te mā’a nō te ahiahi. ’Ua tauahi pūai atu ’oia ia Mutti.

« Tē tātarahapa nei au nō tō’u ririra’a ia ’oe », ’ua parau Gabriela.

« ’Aita e fifi », ’ua parau Mutti. « Māuruuru nō tō ’oe tātarahapara’a mai ».

’Ua pārahi atu rātou i te ’aira’amā’a mā’a ’e ’ua ha’amaita’i i te mā’a. I reira ’ua puta mai te hō’ē mana’o ia Gabriela !

« E ha’a’ati tātou i te ’amura’a mā’a ’e e parau tāta’itahi tātou i te tahi mea ’o tā tātou e māuruuru nei », ’ua parau ’oia.

’Ua ’ata’ata Vati. « E mana’o maita’i roa te reira ! »

« ’Ua māuruuru vau nō te pu’a », ’ua parau Mutti.

’Ua feruri Vati hō’ē tetoni.

« te Pizza ! » ’ua parau ’oia. ’Ua ’ata pā’āto’a rātou.

I muri iho, nā Gabriela atu ra. ’Ua ’ite a’ena ’oia i te mea tāna e hina’aro e parau.

« ’Ua māuruuru vau nō te pure ».

Fa’ahōho’ara’a nā Simini Blocker