Mau ’ohipa ri’i nō te Mai, pe’e mai

Te aura’a nō te fa’aho’i-fa’ahou-ra’a, ’o te ’āpapara’a ïa i te mau tuha’a. Tai’o i te « Te Fa’aho’i-fa’ahou-ra’a mai o te ’īra’a o te ’evanelia a Iesu Mesia : E poro’i i tō te ao nei nō te piti-hānere-ra’a o te matahiti » i roto i te Vaira’a buka ’evanelia nō te ha’api’i rahi atu ā nō ni’a i te fa’aho’i-fa’ahou-ra’a-hia mai te ’Ēkālesia. I muri iho, ’a ha’uti i te hō’ē ha’uti nō ni’a i te fa’aho’i-fa’ahou-ra’a mai ! ’A ’imi mai ’aore rā ’a pāpa’i i te hōho’a ’e ’a tāpūpū i te reira ’ei tuha’a piriapu. E ’aitaui i te mau piriapu i roto i te ’utuāfare, ’e ’āpapa fa’ahou mai i tā te tahi ’e tā te tahi hōho’a. Nō te aha e mea faufa’a roa ’ia fa’aho’i fa’ahou mai Iosepha Semita i te ’evanelia a Iesu Mesia ?

Tē paraparau nei te Metua i te ao ra ia tātou nā roto i tāna mau peropheta (hi’o Te Ha’api’ira’a Tumu ’e te mau Fafaura’a 1:38). Tītau-noa-hia ’ia fa’aro’o atu ! Ha’api’ipi’i nāhea i te fa’aro’o nā roto i te hō’ē perē. E ha’uti te hō’ē ta’ata i te pehe, ’e e ’ori te mau ta’ata ato’a ’a ta’i ai te pehe. ’Ia tāpe’ahia te pehe, e fa’aea te ta’ata i te ha’uti. Te ta’ata hope’a e fa’aea i te ha’uti, e fa’a’ite mai ’oia i te hō’ē tumu ’ua here ’oia i te mau peropheta. Ha’uti fa’ahou i te pehe ē hope noa atu te ta’ata i te fa’a’ite i tōna mana’o !

’Ua fā te Metua i te ao ra ’e ’o Iesu Mesia ia Joseph Smith (hi’o Iosepha Semita—’Ā’amu 1:15–20). Tē parau nei mātou i teie ’ohipa i tupu te ’Ōrama mātāmua. ’A huri i te ’api 13 nō te hāmani i tā ’oe iho hōho’a tiorama nō te ’Ōrama mātāmua, ’ei reira e fa’a’ohipa ai i te reira nō te fa’ati’a i te ’ā’amu i te tahi atu ta’ata.

’Ia ha’api’i rahi atu ā tātou nō ni’a i tō tātou mau tupuna, e ha’afātata atu ā tātou ia rātou ’e i te Metua i te ao ra (hi’o Te Ha’api’ira’a Tumu ’e te mau Fafaura’a 2). ’A ani i te hō’ē melo o te ’utuāfare ’ia fa’ati’a mai i te hō’ē ’ā’amu nō roto mai i tō rātou orara’a ’aore rā te orara’a o te hō’ē tupuna. I muri iho, e rave fa’ahou i terā ’ā’amu mai te hō’ē ha’uti ’aore rā te hō’ē hōho’a pāpa’i !