Haere i te purera’a nā muri ia Ghuka

’Ua ’āpapa māite Kelvin i te mau mōhina ū ’ana’ana i ni’a i te pa’epa’e. ’Aita i maoro a’enei, ’ua haere ’oia e ora i pīha’i iho i tōna nā metua tupuna i te hō’ē ’oire iti, i rāpae i te ’oire rahi. E fare toa ū tā rātou, ’e e mea au nā Kelvin ’ia tauturu atu.

« I teie pō e haere mātou i te hō’ē ’ātivite i te fare purera’a », ’ua parau Ghuka (pāpā rū’au). « Hina’aro ’oe ’ia haere mai ? E mea ’ārearea. »

E mea au nā Kelvin ’ia ’ārearea. Nā ’ō atu ra : « ’Ē ! ». « E haere ato’a vau. »

I muri a’e i te tāpirira’a i te fare toa, nā raro atu ra ’o Kelvin ’e tōna nā metua tupuna i te ’ātivite. ’Ua nā mua atu rātou i te tahi atu mau ho’oho’ora’a ’ahu, mā’a hotu ’e te fāri’i tiare. Ē tae atu ra rātou i te fare purera’a.

’Ara’ara te mata o Kelvin i te hi’ora’a i terā fare nehenehe. ’Aita a’enei ’oia i ’ite i te hō’ē fare purera’a mai teie. Te rahira’a o te mau fare purera’a, e sātauro i ni’a, ’aita rā tō teie.

I te taera’a i roto, ’ua fa’afārerei nā pāpā rū’au o Kelvin iāna i te mau ta’ata maitata’i e rave rahi. E mā’a mōmona maita’i tā rātou i ’amu, ’e ’ua ha’uti rātou.

E tamari’i anoe ’o Kelvin. Orihaere noa atu ra nā roto i te mau ārea o te fare purera’a. ’Ua ’ite ’oia i te mau pēni nō Iesu Mesia. I muri iho, ’ua tomo atu ’oia i roto i te hō’ē piha ha’api’ira’a ’e ’ua ’ite atu i te tahi mau hōho’a i ni’a i te papa’i.

’O vai teie mau ta’ata ? ’Ua uiui ’o Kelvin.

I tōna fa’aru’era’a i te piha, ’ua ’ite atu ’oia e piti taure’are’a tamāroa i terā vāhi. E ’ahu ’uo’uo tō rāua ’e te tā’amu ’arapo’a. « ’Ia ora na », ’ua nā ’ō mai te hō’ē. « E misiōnare māua. ’O vai tō ’oe i’oa ? »

’Ua fa’a’ite Kelvin i tōna i’oa. Ui atu ra ’oia : « ’O vai terā ta’ata i ni’a i te hōho’a ? » ’Ua fa’atoro tōna rima i ni’a i te hō’ē hōho’a i roto i te piha.

« ’O te peropheta », ’ua parau atu te tahi misiōnare. « ’Ua ’ite ānei ’oe e aha te hō’ē peropheta ? »

’Ata’ata a’era Kelvin ma te ueue te upo’o ’aita.

« Te peropheta, e ve’a ïa nō ’ō mai i te Atua », ’ua nā ’ō atu te misiōnare. « E ha’api’i ’oia ia tātou i tā te Atua e hina’aro ia tātou ’ia rave. »

I te ho’ira’a Kelvin i te fare ’e tōna nā metua tupuna i taua pō ra, e Buka a Moromona i roto i tōna rima tā te mau misiōnare i hōro’a iāna. ’Ua ’ana’anatae roa ’oia i te ha’api’i rahi atu nō ni’a i te mau peropheta ’e teie ’ēkālesia ’āpī.

« E tai’o ’oe i te reira nā tātou ? » ’Ua ui atu Ghuka i te tāpaera’a i te fare. ’Aita nā metua tupuna o Kelvin i ’ite i te tai’o.

« ’Ē ! » ’Ua parau Kelvin. Fefeu atu ra i te Buka a Moromona ’e tai’o atu ra. ’Aita ’oia i māramarama i te tā’āto’ara’a o te mau parau, e mea ta’a ’ē rā tāna i putapū.

I te sābati, ’ua haere ’o Kelvin nā muri i tōna nā metua tupuna i te purera’a. ’Ua haere ’oia i te hō’ē piha ha’api’ira’a nō te mau tamari’i ato’a. ’Ua parauhia te reira te Paraimere. E rave rahi roa hoa tāna i ha’amātau ! Rahi atu ā tāna i ha’api’i mai nō ni’a i te mau peropheta ’e ia Iesu.

’Ua haere mai te mau misiōnare e ha’api’i rahi atu ā ia Kelvin. I te hō’ē mahana, ’ua ui rāua iāna i te hō’ē uira’a. « E pe’e ānei ’oe i te hi’ora’a o Iesu ma te bāpetizo ia ’oe ? »

E mata ’oa’oa tō Kelvin. « ’Ē ! »

I te mahana nō tōna bāpetizora’a, ’ua tomo atu Kelvin i roto i te pape. E mea to’eto’e ri’i. Terā rā, i te hi’ora’a Kelvin ’ati a’e iāna, ’ua ’ite ’oia i tōna nā metua tupuna, te mau misiōnare ’e tōna mau hoa ’āpī ato’a nō te ’ēkālesia. E mana’o here tāna i putapū !

Nā roto i te mā’itira’a ’ia pe’e ia Iesu Mesia, e pionie ’o Kelvin i roto i tōna ’utuāfare. E’ita e nehenehe tāna e tīa’i ’ia pe’e noa iāna—’e ’ia tauturu ia vetahi ’ē ’ia pe’e ato’a iāna !

Pia i te PDF

Fa’ahōho’ara’a nā Kristin Sorra