Tē ha’amata ra te fa’aho’i-fa’ahou-ra’a mai

Palmyra, New York (1820) : ’Ua ora Iosepha Semita ’e tōna ’utuāfare i’ō nei. Te ’utuāfare pā’āto’a o Iosepha tei haere i terā ’ēkālesia ’e terā ’ēkālesia, ’aita atu ra Iosepha i ’ite e aha te ’ēkālesia e haere atu. ’Ua tai’o ’oia i roto i te Bibilia : « Tē ’ere ra rā te hō’ē o ’outou i te ’ite, e ani ’oia i te Atua ra » (Iakobo 1:5).

Te uru rā’au mo’a (pu’e tau fa’atupura’a rā’au nō te matahiti 1820) : ’Ua pure Iosepha Semita ’e ’ua ani e aha te ’ēkālesia e haere atu. ’Ua fā mai te Metua i te ao ra ’e ’o Iesu Mesia iāna. ’Ua parau rāua iāna ’eiaha e ’āmui i te hō’ē noa a’e ’ēkālesia. ’Ua pi’i rāua ia Iosepha nō te tauturu i te fa’aho’i-fa’ahou-ra’a mai i te ’īra’a o te ’evanelia a Iesu Mesia i ni’a i te fenua nei.

Te piha o Iosepha (1823) : ’Ua haere mai te melahi Moroni e fārerei ia Iosepha. ’Ua parau ’oia ia Iosepha nō ni’a i te mau ’api ’auro tei roto te ’īra’a o te ’evanelia a Iesu Mesia. ’A paraparau noa ai Moroni, ’ua ’ite ’o Iosepha i te hō’ē ’ōrama nō te vāhi i hunahia ai te mau ’api.

Te ’āivi nō Cumora (1827) : ’Ua hōro’a te melahi Moroni i te mau ’api ’auro ia Iosepha Semita i te ’āivi nō Cumora. ’Ua fāri’i ato’a Iosepha i te mau mauiha’a ta’a ’ē tei hunahia ’e te mau ’api. ’Ua fa’aineine te Atua i te reira nō te tauturu iāna ’ia ’īriti i te mau ’api ’ei reo peretāne. I riro mai ai teie mau ’api tei ’īritihia ’ei Buka a Moromona, ’ia ti’a i te mau tamari’i ato’a a te Atua ’ia tai’o i tāna mau parau.