« Te tīti’a mata i mo’e », Hoa, Tēnuare 2025, 44–45.
Te tīti’a mata i mo’e
E ’ā’amu mau nō Pōrīvia mai.
E mahana mātāmua teie i te fare ha’api’ira’a. E ’oa’oa rahi tō Andrés ! Tei roto ’oia i te CP i teienei. E tamari’i rahi ’oia !
Tēra rā i tōna taera’a i te fare ha’api’ira’a, e au ra e fare ha’api’ira’a rahi roa ’e te ri’ari’a, noa atu e tamari’i rahi. ’Ua tāpe’a maita’i ’oia i te rima o Mami.
« ’Eiaha e ha’ape’ape’a. » ’Ua ’ata’ata Mami. « ’A parau ’ia ora na i tā ’oe ’orometua ha’api’i. E hāmani maita’i i tō ’oe mau hoa ha’api’ira’a. ’E ’eiaha ’ia mo’ehia, ’a ha’apa’o maita’i i tō ’oe tīti’a mata. »
I te hepetoma i ma’iri, ’ua noa’a tō Andrés tīti’a mata mātāmua. E fa’aha’amana’o tāmau noa tōna nā metua iāna ’ia ha’apa’o maita’i i te reira.
’Ua aroha atu Mami iāna. « ’Ia maita’i ’oe i teie mahana ! »
’Aita rā te mahana o Andrés i maita’i. ’Ua tupu te hō’ē ’ohipa fifi mau !
’Ua horo atu ’oia ia Mami ra i muri a’e i te fare ha’api’ira’a. « ’Ua mo’e tō’u tīti’a mata ! », ’ua ta’i ’oia. « ’Ua ’imi au nā te mau vāhi ato’a, ’aita rā i ’itehia mai iā’u ! »
« ’Auē ! » E mata pe’ape’a tō Mami. « E ani ana’e i te tauturu i te Metua i te ao ra ».
« ’Ia mana’o ’oe e haere ānei ? », ’ua ui atu Andrés.
« Tāmata ana’e ’e hi’o atu ai. E fa’aro’o iho ā te Metua i te ao ra i tā tātou mau pure », ’ua parau Mami.
’Ua fa’ahiti Andrés ’e ’o Mami i te hō’ē pure. ’Ua ani rāua i te Metua i te ao ra ’ia tauturu ia Andrés ’ia ’ite mai i tōna tīti’a mata.
I te mahana nō muri iho i te fare ha’api’ira’a, tē ’oto noa ra Andrés. I muri iho, ’ua ha’afātata mai te hō’ē tamaiti iāna.
« Tē mana’o nei au nā ’oe teie ». ’Ua toro mai te tamaiti i te hō’ē pea tīti’a mata. « ’Ua ’itehia mai iā’u i te tahua tu’era’a pōpō ».
’Ua rave mai Andrés i te tīti’a mata. Nōna iho ā te reira ! ’Ua māere roa ’oia.
I muri a’e i te fare ha’api’ira’a, ’ua horo atu ’oia ia Mami ra ’e ’ua tauahi pūai iāna.
« ’Ua ’itehia mai ia ’oe tō ’oe tīti’a mata ! », ’ua parau Mami. « ’Oa’oa roa paha ’oe ’ua noa’a mai. »
« ’Oia ïa ! », ’ua parau Andrés. « E ’oa’oa rahi atu ā rā tō’u nō te mea tā’u i ha’api’i mai ».
« E aha ra te reira ? »
E mata ’ata’ata rahi tō Andrés. « E haere iho ā te pure ! »
Fa’ahōho’ara’a nā Susanna Teodoro