« Mai ia Iosepha ato’a » , Hoa, Tēnuare 2025, 4–5.
Tai’ora’a ’ōhie
Mai ia Iosepha ato’a
’Ua ’ite mau ānei Iosepha Semita i te Metua i te ao ra ’e ia Iesu Mesia ?
E ’ā’amu mau nā te fenua Firipino mai.
’Ōu’ōu’a noa Lhensay i ni’a i tōna pārahira’a i pīha’i a’e i tōna māmā ’a tere ai tō rātou pere’o’o jeepney nā roto i te ’oire. E sābati, te mahana o te hepetoma tā Lhensay e au roa a’e ! E mea au nāna ’ia haere i te Paraimere ’e ’ia ha’api’i nō ni’a ia Iesu Mesia.
Tāpae te jeepney i tō rāua tāpe’ara’a. Tāpe’a ’o māmā i te rima o Lhensay ’a haere ai rāua i te purera’a.
I muri a’e i te purera’a ’ōro’a, ’ua haere ’o Lhensay i te Paraimere ’e tōna hoa ’o Maria. I ni’a i te tāpura ’ere’ere, tē vai ra te hōho’a nō te hō’ē taure’are’a tamāroa e pure ra i roto i te uru rā’au.
« ’Ia ora na ! » ’Ua fa’atoro tō rātou ’orometua, te tuahine Cruz, i tōna rima i ni’a i te hōho’a. « ’Ua ’ite ānei ’outou ’o vai teie ? »
« ’O Iosepha Semita ! » ’Ua parau Lhensay.
E mata ’ata’ata tō te tuahine Cruz. « ’Oia mau. E aha ta Iosepha Semita i rave ? »
’Ua hi’o fa’ahou Lhensay i te hōho’a. ’Ua ’ite ’oia e peropheta ’o Iosepha Semita, ’āre’a, ’o te reira noa.
« ’O ’oia te peropheta mātāmua o tā tātou ’ēkālesia », ’ua parau Maria.
« ’Ua tano ! », ’ua parau atu te tuahine Cruz. « I tōna ’āpīra’a, ’aita ’o Iosepha i ’ite e aha te ’ēkālesia tāna e haere atu. Haere a’era ’oia i roto i te uru rā’au nō te pure i te Atua, nō te ani e aha te ’ēkālesia mau. ’Ua ani ato’a ’oia ’ia fa’a’orehia tāna mau hara. I te purera’a ’oia, e māramarama ’ana’ana roa tei fā mai. ’Ua ’ite ānei ’outou ’o vai tei roto i taua maramarama ra ? »
Tīa’i atu ra ’o Lhensay ’e te toe’a o tāna piha ha’api’ira’a i te pāhonroa’a.
Tu’u mai nei te tuahine Cruz i te tahi atu hōho’a i ni’a i te tāpura ’ere’ere. Tē fa’a’ite nei teie e piti ta’ata i ni’a a’e ia Iosepha Semita, i roto i te reva. E ’ahu ’uo’uo tō rāua ’e e mea ’ana’ana roa rāua.
« ’Ua fa’a’ite te Metua i te ao ra ’e ’o Iesu Mesia ia rāua ia Iosepha », te parau ïa a te tuahine Cruz. « ’Ua parau rāua iāna ē, nāna e fa’aho’i fa’ahou i te ’Ēkālesia a Iesu. Tē parau nei tātou i te reira te ’Ōrama mātāmua. »
Pe’e ihora te rima o Lhensay i ni’a, ’ara’ara tōna mata. « E mea pāpū ānei te reira ? », tāna ïa uira’a.
Tā’iri’iri te upo’o o te tuahine Cruz. « ’Oia mau roa ! »
Putapū te ’ā’au o Lhensay. I ’ite ’oia ē e parau mau tā te tuahine Cruz i parau.
I taua pō ra, ’ua feruri tāmau noa Lhensay ia Iosepha Semita. « Māmā, nāhea vau e ’ite ai i te Metua i te ao ra ’e ia Iesu, mai ia Iosepha Semita ? » tāna ïa uira’a.
Tauahi ihora māmā ia Lhensay. « E’ita te rahira’a o tātou e ’ite i te Metua i te ao ra ’e ia Iesu mai ia Iosepha Semita. E nehenehe rā tā rāua e paraparau mai ia tātou nā roto i te mau mana’o tā tātou e feruri ’e e putapū, nō ’ō mai i te Vārua Maita’i. ’Ei reira ’oe e ’ite ē, tei reira noa rāua ia ’oe ra. »
’Ua feruri Lhensay i te māhanahana i tōna ’ā’au ’a fa’ati’a ai te tuahine Cruz ia rātou i te ’Ōrama mātāmua. ’O te Vārua Maita’i ïa, tei fa’atae mai nei i te hō’ē poro’i nō ’ō mai i te Metua i te ao ra ’e ia Iesu Mesia ! ’Ua ’ata’ata a’era ’e ’ua tauahi ia māmā. ’Ua paraparau mai rāua iāna, mai tā rāua i nā reira ia Iosepha Semita ra !
Fa’ahōho’ara’a nā Shawna J. C. Tenney