Te pāpa’ira’a mo’a nā roto i te reo swahili

’Ua tomo atu Jared i roto i te Ha’api’ira’a Sābati ’e ’ua pārahi i pīha’i iho i tōna mau hoa pīahi. ’Ua ’ite atu ’oia i te hō’ē tamaiti ’o tāna i ’ore i mātau, i te tomora’a mai, ’e ’ua pārahi i te tahi pārahira’a i pīha’i atu iāna.

’Ua ’ata’ata mai te ’orometua a Jared, te taea’e Trudgen, i te piha ha’api’ira’a. « ’O Emmanuel teie », ’ua parau ’oia. « ’Ua haere mai ’oia ’e tōna ’utuāfare e noho i Auterāria nei. ’O tā rātou sābati mātāmua teie i roto i tā tātou pāroita ! »

’Ua mana’o Jared e mea fifi paha ïa ’ia haere i roto i te hō’ē pāroita ’āpī. E tāmata ’oia i te riro ’ei hoa nō Emmanuel.

’Ua tātara mai te taea’e Trudgen i tāna mau pāpa’ira’a mo’a. « E rave mai tātou pā’āto’a i te 3 Nephi », ’ua parau ’oia.

’Ua ’īriti Jared i tāna mau pāpa’ira’a mo’a ’e ’ua hi’o atu ia Emmanuel. ’Aita tāna e pāpa’ira’a mo’a.

’Ua hi’o atu Jared iāna ma te mata ’ata’ata ’e ’ua tāpiri atu iāna. « ’Ia ora na, ’o Jared tō’u i’oa », ’ua parau atu ’oia. « E hina’aro ānei ’oe e tai’o i te pāpa’ira’a mo’a nā muri iā’u ? »

’Ua ’ata’ata mai ra Emmanuel iāna. « Um, ’aita vau i ’ite pāpū maita’i i te reo peretāne », ’ua parau ’oia. « Fa’a’ore mai i tā’u hape ».

« E aha te reo tā ’oe e paraparau ? »

« Te swahili ».

’Aita Jared i ’ite noa a’e i te reo swahili. ’Aita ’oia ’e ’o Emmanuel i paraparau rahi roa i te toe’a o te ha’api’ira’a.

I taua pō ra i te tāmā’ara’a, ’ua fa’ati’a Jared i tōna ’utuāfare nō ni’a ia Emmanuel.

« E au ra e ta’ata maita’i ’oia », ’ua parau Jared. « E’ita rā māua e nehenehe e māramarama maita’i i te tahi ’e te tahi ».

’Ua tā’iri’iri māmā i tōna upo’o. « Tē fa’aruru nei Emmanuel ’e tōna ’utuāfare i te hō’ē tau fifi i teie taime », ’ua parau māmā. « Tītauhia ia rātou e fa’aru’e ’oi’oi i tō rātou fenua, nō te mau mea ’ī’ino e tupu ra. ’Ua fa’aru’e rātou i te mau mea ato’a i muri ia rātou ».

Fa’atu’atu’a a’era Jared i tōna mata. Mai te aha te huru ’ia tītauhia e fa’aru’e i te fare ananahi ’e ’ia haere e fa’aea i roto i te hō’ē fenua ’āpī ? E mea fifi mau te reira !

Tē hina’aro nei au e rave i te tahi ’ohipa nō te tauturu ia Emmanuel, ’ua feruri ’oia. E aha pa’i ?

’Ua feruri noa Jared ia Emmanuel, ’a fa’aineine ai ’oia nō te haere e ta’oto. ’Ua pārahi atu ’oia i tāna ’iri pāpa’ira’a ’e tāna Buka a Moromona ’e ’ua tai’o i te tahi mau ’īrava. E fa’atupu tāmau noa te tai’ora’a pāpa’ira’a mo’a i tō’u mana’o maita’i. I teie pō, ’ua fa’aha’amana’o ato’a mai te reira ē, ’aita tā Emmanuel e pāpa’ira’a mo’a nō te tai’o. ’Ua tāpiri atu Jared i tāna pāpa’ira’a mo’a ’e ’ua hi’o atu i te ’api tāpo’i. I muri iho, ’ua ti’a tā’ue a’era i tōna pārahira’a ’e ’ua horo atu ra i rāpae.

« Māmā ! », ’ua pi’i ’oia. « Tē mana’o nei au, ’ua ’ite au e aha tē tauturu ia Emmanuel ! »

I te sābati nō muri iho, e ’oa’oa rahi tō Jared ’ia ’ite atu ia Emmanuel. ’Ua pārahi atu ’oia ’e te tahi mau diakono i mua i roto i te fare purera’a ’e ’ua tīa’i ma te hō’ē Buka a Moromona ’āpī i ni’a i tōna turi ’āvae. ’Ua tauturu mai te mau misiōnare ’ia noa’a mai teie buka ta’a ’ē nā Emmanuel noa.

I te tomora’a mai Emmanuel i roto i te fare purera’a ’e tōna ’utuāfare, ’ua ’ata’ata Jared ’e ’ua tārape atu iāna ’ia haere mai. E huru pe’ape’a ri’i tō Emmanuel ’a pārahi ai i pīha’i iho ia Jared. E mata māere rā tōna ’a toro atu ai Jared iāna i te Buka a Moromona.

« Nō’u teie ? » Ui a’era Emmanuel.

Tā’iri’iri a’era Jared i te upo’o.

’Ana’ana a’era te mata ’o Emmanuel. Fefeu a’era ’oia i te mau ’api o tāna Buka a Moromona ’āpī. « Nā roto te reo swahili ! » ’ua parau ’oia. ’Ua ’ata’ata atu ’oia ia Jared ’e ’ua tāpe’a i te buka i tōna ’ōuma. « Māuruuru roa ! ».

’Ua māhanahana te ’ā’au o Jared ’a ’ata’ata ato’a ai ’oia. ’Ua ’ite ’oia ē, e’ita tāna e nehenehe e fa’a’āfaro i te mau mea ato’a nō Emmanuel, ’e ’aita ā rāua e nehenehe e paraparau maita’i te tahi i te tahi. ’Aita rā e pe’ape’a. ’Aita e tītauhia ’ia paraparau i te hō’ē ā reo nō te riro mai ’ei hoa !

Pia i te PDF

Fa’ahōho’ara’a nā Keith Negley