« Ha’amana’ora’a nō te aha vau e ora ai i te ’evanelia », Liahona, Tēnuare 2025.
Feiā ʼāpī paʼari
Ha’amana’ora’a nō te aha vau e ora ai i te ’evanelia
Te fa’aha’amana’ora’a iā’u iho i tā’u « nā te aha » ’ua fa’aitoito iā’u ’ia ha’afātata atu i te Fa’aora ’e ’ia tāmau ā i tā’u mau fā pae vārua.
E au ra tō’u orara’a i te tahi taime e mea ’ārepurepu, terā rā mea au nā’u te tāmāhanahanara’a ’o tā’u e putapū nei, ’ia tomo ana’e au i roto i te hō’ē fare purera’a. ’O te hō’ē ïa o te mau tumu nō reira vau e au ai e haere i te purera’a !
’E ’ia ha’amana’o ana’e vau i te mea tā’u e au i roto i te ’evanelia—’ei hi’ora’a, mai te putapūra’a i te Vārua Maita’i—e fāri’i au i te fa’aurura’a rahi nō te tāmau noa i te rave i tā’u mau peu pae vārua, mai te haerera’a i te hiero, te tai’ora’a i tā’u mau pāpa’ira’a mo’a, ’e te purera’a i te Metua i te ao ra.
Nō te mea ho’i ē e mea ’ohipa roa te orara’a, e nehenehe e riro e mea ’ōhie roa ’ia mo’e teie mau mea ri’i tā tātou i here. Terā rā, e tauturu te fa’aha’amana’ora’a tāmau noa iā’u iho i te mau tumu vau e ora ai ’e e here ai i te ’evanelia a Iesu Mesia, ’ia fa’a’āpī i tā’u mau fā pae vārua ’o te ha’afātata atu iā’u iāna ’e i te Metua i te ao ra.
Ha’amaura’a i te mau fā pae vārua ’āpī
I te ’ōmuara’a o te mau matahiti ato’a, mea au nā’u e fāito fa’ahou i tā’u mau fā pae vārua ma te pāpa’ira’a i tā’u mau fa’aotira’a nō te matahiti ’āpī. Mai te peu ’outou ato’a e rave ’outou i te tahi hi’opo’ara’a ia ’outou iho ’e ’ia feruri e nāhea ’outou ’ia ha’amaita’i i tō ’outou aura’a ’e te Mesia i roto i teie matahiti ’āpī, ’a ui ia ’outou iho i teie uira’a :
« Nō te aha vau i here ai i te ’evanelia a Iesu Mesia ? »
’Ua fa’ata’a mai te tuahine Ann M. Dibb, tauturu piti tahito i roto i te peresidenira’a rahi o te Feiā ’Āpī Tamāhine ē, « e tupu tō tātou here i te ’evanelia ’a ’ite ai tātou i te here o tō tātou Metua i te ao ra ’e te hau tei fafauhia mai e te Fa’aora ’a fa’a’ite ai tātou iāna ē, ’ua ineine tātou i te ha’apa’o ’e i te pe’e iāna ».
Tē ’itera’a nō te aha ’outou i here ai i te ’evanelia, e tauturu ia ’outou ’ia putapū ’e ’ia ’ite i te here o te Metua i te ao ra ’e o Iesu Mesia nō ’outou. E tauturu ato’a teie ferurira’a ia ’outou ’ia fa’aiti mai te mana’o teimaha, ’a tūtava ai ’outou i te ha’amau ’e ’ia tāpae i tā ’outou mau fā pae vārua.
Tā’u « nō te aha » ’ia ora ’e ’ia here i te ’evanelia a Iesu Mesia tei roto ïa i te ’itera’a ē, e nehenehe te mau ’utuāfare e vai ’āmui ē a muri noa atu ’e te hau tā’u e putapū i muri a’e i te hō’ē pure pe’ape’a i te Metua i te ao ra.
Noa atu te huru o tā ’outou « nō te aha », ’a tāpe’a māite i te reira—e hōro’a mai te reira ia ’outou te tūra’ira’a pae vārua e hina’arohia e ’outou, nō te riro mai ’ei pipi maita’i a’e nā Iesu Mesia.
Te orara’a i tā ’outou « nō te aha »
I te taime ’a ’ite ai au nō te aha vau e ora ai i te ’evanelia, ’ua taui te huru ’a fa’ata’a ai au i tā’u mau fā pae vārua. ’Ua fa’aea vau i te feruri i te mau mea ’o tā’u e ’ore e rave nei ’e ’ua rōtahi a’e i ni’a i te mau mea tā’u e nehenehe e rave. ’Ua ha’amana’o vau ē, tē ora nei au i te ’evanelia nō te mea ’ua here au i tō’u Fa’aora.
’Ua parau Elder Dieter F. Uchtdorf nō te pupu nō te Tino ’Ahuru ma Piti ’āpōsetolo : « Tītauhia ia tātou ’ia fa’ari’i ē, e ’ere noa te mau fa’auera’a a te Atua i te hō’ē tāpura roaroa nō te mau mana’o maita’i.… E mau parau a’o hanahana te reira, tei niuhia i ni’a i te mau parau mau mure ’ore, tei hōro’ahia mai nō te fa’atupu i ‘te mana’o hau i roto i teie nei ao, ’e te ora mure ’ore i roto i te ao a muri atu’ [Te Ha’api’ira’a Tumu ’e te mau Fafaura’a 59:23] ».
Te pe’era’a i tā’u mau fā pae vārua, e fa’aha’amana’o te reira iā’u ’o vai au : Hō’ē tamari’i hanahana nā tō’u nā metua i te ra’i. E hōro’a teie parau tumu iā’u i te itoito nō te fa’aruru i tō’u mau mana’o pe’ape’a ’e tō’u mau paruparu nā roto ia Iesu Mesia (hi’o Etera 12:27).
’Ua ha’api’i te peresideni Russell M. Nelson ē, « ’aita te Fatu e tītau nei i te fāito maita’i roa ia tātou i teie taime nō tō tātou haerera’a mure ’ore i mua. Tē tītau nei rā ’oia ia tātou ’ia rahi atu ā tō tātou vi’ivi’i ’ore ». Nō reira tē tāmata nei au ma tō’u pūai ato’a i te mahana tāta’itahi, ’ia fa’aea piri noa ia Iesu Mesia ’e ’ia ha’amana’o nō te aha vau i mā’iti ai e pe’e iāna.