’Ua hape ānei tā’u pi’ira’a misiōni ?

Piti matahiti i muri a’e i te roara’a tā’u parau tū’ite nō te tānūmerara’a (actuaire) ’e nō te matematita i te pae faufa’a, ’ua putapū vau i te hō’ē muhumuhura’a pūai ’ia haere i te misiōni. ’Ua mā’iti au e tāvini, noa atu e fa’aruru vau ’ia ma’iri te tahi mau tītaura’a o te ha’api’ira’a tuatoru i roto i terā tau matahiti.

I muri a’e ma’a taime poto, ’a tai’o ai au i tā’u pi’ira’a misiōni nō te misiōni nō Utaha Roto Miti Rōpū, ’ua riro te reira taime iā’u ’ei mea mana’o-’ore-hia. ’Aita vau i ’ite hō’ē noa a’e ta’ata tei tāvini i te ’oire nō Roto Miti. ’Ua mana’o vau ’ua ’īriti paha vau i te pi’ira’a hape nō te misiōni. I tō’u taera’a i te ’oire nō Roto Miti, e au ra iā’u ē te mau mea ato’a tā’u i ’ite ’ua ’īriti-’ē-hia atu. ’Ua ’ite vau iā’u i ni’a i te pere’o’o ta’ata’ahi i roto i te hiona, ma te ferurira’a ’ore e aha mau ’ia riro ’ei misiōnare. Nō tāna ta’ere ’e te ’ahureva ta’a ’ē, e au ra iā’u mea ātea roa te ’oire nō Roto Miti ia ’Āfirita Apato’a ’o tā’u i rātere mai.

I roto i tā’u tuha’a fenua mātāmua, ’ua haere atu māua tō’u hoa misiōnare e fārerei i te hō’ē melo ’o Chris Ruppel tōna i’oa nō te fa’atāmā’ara’a. ’Ua ani mai ’oia ē, ’ua ’ite ānei te hō’ē o māua i te pehe. ’Ua parau atu tō’u hoa ē, tē ha’uti nei au i te piāna ’e e hīmene ato’a, nō reira ’ua hīmene atu vau i te hō’ē hīmene nō te ’utuāfare. I muri iho, ’ua tupu te hō’ē ’ohipa ta’a ’ē. ’Ua hi’o mai te taea’e Ruppel iā’u ’e ’ua parau mai, « Elder Vizzini, mai te peu e tāmau noa ’oe i te hīmene mai te reira, e riro mai ’oe ’ei misiōnare manuia ». ’Ua mana’o vau e parau maita’i roa nō roto mai iāna, ’aita rā vau i tāu’a rahi roa i te reira.

Tau ’āva’e i muri mai, ma te ’āpe’ehia e te taea’e Ruppel, ’ua tauturu vau i te fa’anaho i te hō’ē purera’a pae auahi misiōnare nō te pehe. Mai reira mai, i te mau vāhi ato’a tā’u i tāvini i muri iho, ’ua fa’a’ohipa mātou i te hō’ē ā purera’a pae auahi mai te reira. E rave rahi ta’ata tei ’āmui mai ia mātou, mai te mau melo o te titi e tae atu i te mau ta’ata hīmene tuiro’o o te vāhi iho ’e te mau melo nō te tahi atu mau ha’apa’ora’a fa’aro’o. ’Ua ha’api’i mātou nō ni’a i te Fa’aora nā roto i te pehe i te mau ta’ata, ’o te ’ore e ’ana’anatae e ’āmui mai nō te hō’ē ha’api’ira’a. ’Ua ha’api’i mai au ē, e nehenehe te pehe e ha’aputapū i te feiā veve ’e te feiā moni, te ta’ata ha’api’ira’a teitei ’e te ta’ata ’aore i haere i te ha’api’ira’a.

’Ua ha’api’i mai tā’u misiōni iā’u ē, e nehenehe au e rave i te mau ’ohipa pa’ari mau. ’A tāvini ai au i roto i te hō’ē fenua ātea roa ’e te ta’a ’ē roa i tō’u fenua, ’ua ha’api’i mai au ē e tamari’i te mau ta’ata ato’a nā te Atua. ’Ua ’ite au i te mau temeio i roto i te orara’a o te mau ta’ata i te tahi atu pae o te ao nei i Utaha, ’e ’ua ’ite ato’a vau i te reira i’ō nei i ’Āfirita Apato’a nei. ’Ua ’ite au ē, mai te mea e fa’aro’o noa tō tātou, e nehenehe te mau temeio e tupu i roto i tō tātou orara’a tāta’itahi (hi’o Moromona 9:15–21).