Te mahana nehenehe roa a’e

’Ua pohe tō’u metua tāne, ’o Claude Roy, i te matahiti 2015, tau taime noa i muri a’e i tōna bāpetizora’ahia. I taua taime ra, ’ua riro mai tō’u metua vahine, tō’u mau taea’e ’e mau tuahine ’e ’o vau nei ’ei melo nō te ’Ēkālesia i te tahi noa ma’a tau, e rave rahi rā ’ahuru matahiti tō tō’u metua tāne pāto’i-’ū’ana-ra’a ’ia bāpetizo.

I te roara’a o te tau, ’ua parau ’oia, « ’ua ’eta’eta roa tō’u ’ā’au, ’e ’ua riri roa vau i te mau fārereira’a a tā’u mau tamari’i ’e tā’u mau mo’otua ’e ’ua hina’aro vau e fa’aātea iā’u iho i tō’u ’utuāfare. ’Ua tupu te umeumera’a i roto i tō’u fare, ’e ’ua fifi roa tō’u aura’a ’e tā’u vahine fa’aipoipo ».

I roto i taua taime ra, ’ua ha’amata ’oia e honotua i tōna mau tupuna ta’ata tumu nō Tanata, tei riro mai ’ei hua’ai nō te nūna’a Mi’kmaq ’e te Huron-Wendat. I muri a’e i te fārereira’a i te huira’atira nō Mi’kmaq fātata i te vāhi i reira ’oia i te pa’arira’a, ’ua anihia ’oia ’ia haere i te hō’ē powwow, e ’ōro’a tumu nā te mau ’īnītia Marite.

I te pō o te powwow, ’ua ha’amahora te tahu’a rahi i tōna rima ’e ’ua ani ’ia haere mai te mau tamari’i iāna ra ’ia ti’a iāna ’ia ha’amaita’i ia rātou. ’Ua ha’aputapū rahi te a’ora’a i hōro’ahia nō ni’a i te faufa’a rahi o te ’utuāfare ’e te mau hua’ai, i tō’u metua tāne mai te hō’ē pātiri te huru.

Mai taua taime ra, ’ua parau ’oia, « ’ua ’ite mata vau i tō’u ’utuāfare i te torora’a mai i tō rātou rima iā’u ’a huri tua ai au ia rātou. ’Ua ’ī roa vau i te hō’ē ’oto rahi ’e te fāito ’ore mai te mea rā ’ua ’ōfati fa’ahu’ahu’ahia tō’u ’ā’au. ’Ua ’ite au i taua taime ra ē, ’ua fa’a’ohipa te Fatu i te mau parau a tō’u nūna’a tupuna nō te tāmarū i tō’u ’ā’au. ’Ua ’ite au e ti’a iā’u ’ia fāriu atu i tō’u Metua i te ao ra ’e ’ia tātā’i i te mau ’ino tā’u i fa’atupu i tō’u ’utuāfare ».

’Ua ha’amata pāpā i te fa’atupu i te hau ’e tō mātou ’utuāfare, ma te anira’a i te fa’a’orera’a hara i te melo tāta’itahi o te ’utuāfare. Ma te hi’ora’a maita’i o tāna vahine fa’aipoipo ’e tāna mau tamari’i, ’ua ha’amata ’oia i te pure ’e i te tai’o i te Buka a Moromona. I muri a’e i te tai’ora’a e rave rahi ’ā’amu nō ni’a i te fenua Amerika, ’ua ’ite ’oia iāna iho i te ’umera’ahia e te Buka a Moromona. ’Ua ha’apāpū-’oi’oi-hia iāna ē i te parau mau o te reira.

« Ma te hā’atihia e tō’u ’utuāfare, ’ua bāpetizohia vau ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei », ’ua parau ’oia. « ’Ua riro ’ei mahana nehenehe roa a’e o tō’u orara’a ! Tē fa’a’ite pāpū nei au nō te mana o te hō’ē hi’ora’a o te here. E 36 matahiti tō tā’u vahine fa’aipoipo tāpe’ara’a i tōna fa’aro’o ’e ’ua riro ’ei hi’ora’a mai tō te Mesia te huru nō’u, noa atu ā te ’eta’eta o tō’u ’ā’au. I muri iho, hō’ē hope’a hepetoma ’ua taui te mau mea ato’a nō’u ».

Tē fa’aha’amana’o nehenehe mai nei te ’ā’amu o tō’u metua tāne ia tātou ē, « tē toro noa ra te rima aroha o te Fa’aora ia [tātou] » ’e ’ia tātarahapa ana’e tātou, e fāri’i pōpou mai ’oia ia tātou (hi’o Alama 5:33).