« Māuruuru i te ha’aputuputu », Liahona, Tēnuare 2025.

Māuruuru i te ha’aputuputu

Nā te peresideni Russell M. Nelson

Peresideni nō te ’Ēkālesia a Iesu Mesia i te Feiā Mo’a i te mau Mahana Hope’a nei

’Ia māuruuru noa tātou nō te fāna’ora’a ’e te ti’aturira’a tā te Fatu i tu’u i ni’a ia tātou ’a ha’aputuputu ai tātou i te Fa’aora ra, ’a ha’aputuputu ai ’e te feiā mo’a, ’e ’a ha’aputuputu ai i roto i tāna tāvinira’a.

E rave rahi matahiti te maoro tō’u tāpe’a-noa-ra’a i te hō’ē uati pūtē nehenehe a tō’u pāpā rū’au ’o Andrew C. Nelson, ’o tā’u i ’ore i fārerei a’enei. ’Ua pohe ’oia i te 16ra’a o te matahiti o tō’u metua tāne.

Nā tō’u metua tāne i fatu mai i te uati ’a pāpā ’ū Nelson. I tō’u pa’arira’a mai, ’ua hōro’a mai ’oia i te uati iā’u. ’Ua fa’aherehere au i terā uati ’ei hono fa’atū’ati mau iā’u i te hō’ē o tō’u mau tupuna ha’apa’o maita’i.

’Ua riro mai te mau metua o pāpā rū’au Nelson, mai tō’u mau metua tupuna ato’a, ’ei melo nō te ’Ēkālesia i tō rātou ’āi’a ’o Europa. E vai noa tō’u māuruuru ē a muri noa atu nō teie mau pionie i nā mua mai. Maoti tō rātou fa’aro’o ’e tō rātou fa’atusiara’a nō te ha’aputuputu ’e te feiā mo’a, ’ua fāna’o vau ’e tō’u hua’ai i te mau ha’amaita’ira’a o te ’evanelia a Iesu Mesia i fa’aho’i-fa’ahou-hia mai.

’Ua fa’aha’amana’o mai te uati ’a pāpā ’ū Nelson i tā tātou tītaura’a hanahana ’ei feiā mo‘a i te mau mahana hope’a nei ’ia ha’aputuputu i te mau tamari’i a tō tātou Metua i nā pae e piti o te pāruru. ’Ua fa’aha’amana’o ato’a mai tāna uati ē tē hi’o ’e tē tīa’i nei tō tātou mau tupuna ia tātou nō te ’imi ia rātou ’e nō te hi’o ē tē ravehia nei tō rātou mau ’ōro’a o te hiero ’ia ti’a ia rātou ’ia ha’aputuputuhia ē a muri noa atu i roto i te nana a te Metua.

Ha’aputuputu i te Fa’aora ra

Tē parau nei mātou tō’u mau taea’e nō te Peresidenira’a Mātāmua ’e te pupu nō te Tino ’Ahuru Ma Piti ’āpōsetolo ē : « ’Ua mau teie ’Ēkālesia i ni’a i te orara’a maita’i roa o tāna ’ōfa’i tihi tumu, ’o Iesu Mesia ,’e i ni’a i tāna tāra’ehara mure ’ore ’e tōna ti’afa’ahoura’a mau […] Tē ani manihini nei ’oia ia tātou pā’āto’a ’ia haere mai iāna ra ’e i tāna ’Ēkālesia, ’ia fāri’i i te Vārua Maita’i, te mau ’ōro’a nō te fa’aorara’a ’e ’ia roa’a ho’i te ’oa’oara’a tāmau. »

Nō te mea tē haere noa ra te fa’aho’i-fa’ahou-ra’a mai i mua, nā roto i te heheura’a tāmau, « e ’ore roa tō te fenua nei e hō’ē ā huru fa’ahou, nō te mea e ‘ha’aputuputu ‘’āmui [te Atua] i te mau mea ato’a i te Mesia ra’ (Ephesia 1:10). »

« Te mau mea ato’a » ’o tāna āto’a ïa mau māmoe. Tē pi’i mai nei te Fa’aora ia tātou ’ia fa’aru’e i te ’ino o te ao nei i muri ’e ’ia ha’aputuputu iāna ra. Tē hina’aro nei ’oia ’ia riro tāna mau māmoe ’ei māramarama ’o tē ’ana’ana māramarama maita’i, ma te fa’a’ite i te hō’ē hi’ora’a nō te toe’a o te ao nei nā roto i te fa’aho’ara’a i te huru orara’a o te mau pipi mau, mai te ’itera’a i te ’oa’oa mau ’a rōtahi ai i tō rātou orara’a i ni’a i te Fa’aora.

E ha’aputuputu tātou i te Fa’aora ra ’a haere mai ai tātou iāna ra (hi’o Mataio 11:28) nā roto i te fa’a’ohipara’a i te fa’aro’o i te tātarahapara’a, te fa’ari’ira’a i te bāpetizora’a i roto i tāna ’Ēkālesia, ’e te fa’ari’ira’a i te hōro’a nō te Vārua Maita’i.

E ha’aputuputu tātou i te Fa’aora ra ’ia ’ite ana’e tātou i te fa’aorara’a pae vārua e tae mai nā roto i te ravera’a i te ’ōro’a mo’a, ma te fa’a’ite pāpū ē ’ua ineine tātou i te rave i tōna i’oa i ni’a iho ia tātou, ’ia ha’amana’o noa iāna, ’e ’ia ha’apa’o i tāna mau fa’auera’a (hi’o Te Ha’api’ira’a Tumu ’e te mau Fafaura’a 20:77, 79).

E ha’aputuputu tātou i te Fa’aora ra ’ia fa’a’ī ana’e tātou i tō tātou orara’a tāmahana i tāna mau parau ’e te parau mau, mai te mau ha’api’ira’a a tāna mau peropheta, mau hi’o, ’e mau heheu parau.

E ha’aputuputu tātou i te Fa’aora ra ’ia ha’amaita’i ana’e tātou i tō tātou ’aravihi ’ia fa’aro’o iāna, nā roto i te ora-ti’a-mā-ra’a nō te fa’ari’i i te muhumuhu a te Vārua Maita’i.

E ha’aputuputu tātou i te Fa’aora ra ’ia ha’apūai ana’e tātou i tō tātou fa’afāriura’a, ’ia fa’arahi tātou i tō tātou fa’aro’o, ’ia fa’ahōhonu tātou i tō tātou ti’ara’a pipi, ’ia pe’e tātou i tōna hi’ora’a, ’e ’ia tūtava tātou ’ia maita’i ri’i a’e i te mau mahana ato’a.

E ha’aputuputu tātou i te Fa’aora ra ’ia rave ana’e tātou i te mau fafaura’a mo’a ’e ’ia fa’ari’i ana’e tātou i te mau ’ōro’a mo’a i roto i te hiero.

E ha’aputuputu tātou i te Fa’aora ra ’ia auraro ana’e tātou ma te fa’a’oroma’i ’e te itoito « i te mau mea ato’a tā te Fatu e hina’aro ’ia tu’u mai i ni’a ia [tātou] » (Mosia 3:19).

’E te hope’a, e ha’aputuputu tātou i te Fa’aora ra ’ia ha’api’i ’e ’ia fa’a’ite pāpū ana’e tātou nō ni’a iāna, nā roto i te anira’a i tō tātou ’utuāfare, i tō tātou mau hoa ’e i tō tātou ta’ata tupu ’ia ha’aputuputu mai i pīha’i iho ia tātou i « te māramarama, te ora, ’e te ti’aturira’a o tō te ao nei. »

Ha’aputuputu ’e te feiā mo’a

’Ia ’āmui ana’e tātou ’e ’ia tāhō’ē ’ei melo nō Te ’Ēkālesia a Iesu Mesia i te Feiā Mo‘a i te mau Mahana Hope’a nei, e tomo tātou i roto i te auhoara’a ’e te ’āpitira’a te tahi i te tahi. E pāturu tātou, e ha’api’i ’e e fa’aitoito te tahi i te tahi. Tē tūtava nei tātou, ’ia au i te mau parau a te Fa’aora, ’ia « hō’ē » (Ioane 17:21 ; hi’o ato’a Te Ha’api’ira’a Tumu ’e te mau Fafaura’a 38:27) ’e ’ia « aroha [tātou ia tātou] iho » (Ioane 13:34).

’Ua ha’api’i te peresideni Dallin H. Oaks, Tauturu mātāmua i roto i te Peresidenira’a Matāmua ē, « Hau atu, maoti te haerera’a i te purera’a e noa’a ai ia tātou te pūai ’e te ha’afaufa’ara’a o te fa’aro’o, ’o tē tae mai nā roto i te ’ohipa ’āmui ’e te tahi atu feiā fa’aro’o ’e te ha’amori-’āmui-ra’a nā muri ia rātou e tūtava ato’a nei e fa’aea i ni’a i te ’ē’a nō te fafaura’a ’e e riro ’ei pipi maita’i a’e nā te Mesia. »

I te fare purera’a e ’itehia ia tātou te fa’afa’aeara’a ’e te fa’a’āpīra’a pae vārua. E ’itehia ia tātou te mau ’ōro’a ’e te ha’amanara’a autahu’ara’a nō te fa’atere i te reira. E ’itehia ia tātou i te parau mau tei fa’aho’i-fa’ahou-hia mai, te ha’api’ira’a tumu tāfetafeta ’ore, e te heheura’a ta’ata hō’ē. E ’itehia ia tātou te rima fa’ari’i, te ’ā’au tāmarū ’e te mau reo fa’aitoito. E ’itehia ia tātou te mau rāve’a nō te ora i nā fa’auera’a rahi e piti (hi’o Mareko 12:30–31).

’Ua fa’aara mai te Fatu ia tātou ē « ’ua tāhō’ēhia te ’enemi » (Te Ha’api’ira’a Tumu ’e te mau Fafaura’a 38:12). Nō te pāruru i tō tātou ’utuāfare ’e nō te pāto’i i te fa’aurura’a rahi a Sātane, e mea faufa’a roa atu ā ia tātou ’ia ha’amori-’āmui ’ei feiā mo’a.

« Te hō’ēra’a », ’ua ha’api’i o Iosepha Semita, « ’o te pūai ïa. »

Ha’aputuputu i roto i tāna tāvinira’a

’Ua parau ato’a te peropheta Iosepha : « Tē fātata ’oi’oi mai nei te mahana e tupu ai te fa’aho’ira’a mai o te mau mea ato’a, tā te mau peropheta mo’a i tohu, ’e tae noa atu i te ha’aputuputura’a o te ’utuāfare o ’Īserā’ela. » Te hō’ē o rātou ’o tei tohu, ’o Ieremia ïa i roto i te Faufa’a Tahito :

« Tē nā ’ō mai ra Iehova, tē fātata mai ra te tau, e ’ore e parau-fa’ahou-hia ē, Tē ora ra Iehova, ’o tei arata‘i mai i te tamari’i a ’Īserā’ela mai te fenua mai ra mai Aiphiti ;

« ’Are’a rā, tē ora ra Iehova, ’o tei arata’i mai i te tamari’i a ’Īserā’ela mai te fenua i te pae apato’erau ra, ’e mai te mau fenua mai i tīahihia atu ai rātou e ana » (Ieremia 16:14–15).

’Ua parau fa’ahou te peropheta Iosepha, « ’O tātou te nūna’a ha’amaita’ihia tā te Atua i mā’iti nō te fa’atupura’a i te hanahana nō te mau mahana hope’a nei […] i reira te feiā mo’a a te Atua e ha’aputuputuhia ai ’ei hō’ē nō roto mai i te mau fenua, te mau ’ōpū, te mau nūna’a ’e mau reo ato’a. »

Nō te rave fa’aoti i te reira ’ohipa : « E tono vau i te ve’a e ti’i i te feiā rava’ai e rave rahi, tē nā reira mai ra Iehova, ’e nā rātou e rava’ai ia rātou ; ’e oti a’era, e tono vau i te ve’a i te feiā a’ua’u e rave rahi, ’e nā rātou e a’ua’u ia rātou i te mau mou’a ato’a ra, ’e te mau ’āivi ato’a ra, ’e i roto i te mau ’āpo’o ato’a o te mau mato ra » (Ieremia 16:16).

Te mau taea’e ’e te mau tuahine, tātou te ’Īserā’ela nō te fafaura’a i te mau mahana hope’a nei—te mau melo nō te ’Ēkālesia a Iesu Mesia tei fa’aho’i-fa’ahou-hia mai—’o tātou te feiā rava’ai ’e te feiā a’ua’u a te Fatu. ’Ua pi’ihia tātou ’ia ha’aputuputu i tei mā’itihia e te Fatu, nā te mau mou’a ato’a, te mau ’āivi ato’a ’e te mau nahi ato’a. ’Ua pi’ihia tātou ’ia hōro’a i te mau tamari’i a te Atua i te rāve’a ’ia riro ’ei feiā ’āi’a hope roa nō te mau mea ato’a tāna i fafau i tāna mau tamari’i ha’apa’o maita’i. ’O te tāvinira’a rahi roa a’e ïa tā tātou e nehenehe e hōro’a.

E fa’atupu tātou i te reira arata’ira’a hanahana nā roto i te ha’aputuputura’a ia ’Īserā’ela i nā pae e piti o te pāruru—i te fa’a’itera’a i te parau ’āpī maita’i nō te fa’aho’i-fa’ahou-ra’a mai ia vetahi ’ē, i te ’imira’a i tō tātou mau tupuna i pohe, ’e i te ravera’a i te mau ’ōro’a monora’a nō rātou i roto i te hiero. E fa’atupu ato’a tātou i te reira arata’ira’a nā roto i te fa’a’itera’a i te here o te Fa’aora nā roto i tā tātou tāvinira’a, te hi’ora’a maita’i, te ’itera’a pāpū ’e te ani-manihini-ra’a ia vetahi ’ē ’ia ’āmui mai ia tātou.

« Tē arata’i nei te Fatu i te fa’aho’i-fa’ahou-ra’a mai o tāna ’evanelia ’e tāna ’Ēkālesia », te parau ïa a te Peresideni Henry B. Eyring, tauturu piti i roto i te Peresidenira’a Mātāmua. « E haere ’oia nā mua ia tātou. ’Ua ’ite maita’i roa ’oia i te ananahi. Tē ani nei ’oia ia ’outou ’ia ’ohipa. E ’āmui ’oia ia ’outou i roto i te reira. »

E ha’amaita’ira’a ’e e ti’aturira’a

E aha tei tupu nō te uati pūtē a pāpā ’ū Nelson ? Tau matahiti i ma’iri a’e nei, ’ua hōro’a atu vau i te reira i tā’u tamaiti. Mai tei tupu i ni’a iā’u, tē fa’atū’ati nei teie uati, i teienei, iāna i tōna mau tupuna ma te fa’aha’amana’o iāna i tāna hōpoi’a i tōna hua’ai.

’E mai te reira noa i muri iho. Tē amo nei te u’i tāta’itahi nō te fafaura’a i te ’ohipa a te Fatu, ma te rave i tāna tuha’a nō te fa’aineinera’a i te ao nei nō te tae-piti-ra’a mai o Iesu Mesia.