E’ita te moni e nehenehe e ho’o i te ’oa’oa, tē hōro’a nei rā te Mesia i te ’oa’oa ma te ’ā’au tae

Fātata hō’ē matahiti i muri mai i te putapūra’a i te reira, tē fa’aro’o ra vau i te hō’ē a’ora’a a te peresideni Dallin H. Oaks, tauturu mātāmua i roto i te Peresidenira’a Mātāmua. ’Ua ’ite au tō’u māfatu i te vīra’a i te fa’aro’ora’a iāna ’ia fa’ata’a pāpū maita’i i te huru ta’ata tā’u e riro ra :

« Tae roa mai i teie mahana, te tahi mau ta’ata o te parau nei ē, e Keretetiano rātou, ’ua hau a’e ïa rātou i roto i te mau mea o te ao nei—te mau mea e pāturu nei i te ora i te fenua nei, ’aore rā e hōro’a nei i te mā’a e tae atu ai i te ora mure ’ore ra ».

’Ua mana’o vau e nehenehe au e hōro’a i te ti’ara’a mātāmua i te Atua ’e i te moni i te hō’ē ā taime, terā rā tē fa’a’ite nei te mau parau a te peresideni Oaks ’e teie mana’o i roto te Mataio 6:24 e parau mau te reira : « E ’ore te ta’ata e ti’a ’ia fa’aro’o i te fatu to’opiti ; e riro ’oia i te au ’ore atu i te hō’ē, ’e te hina’aro atu i te tahi ; ’e ’aore rā, e riro i te au atu i te hō’ē, e te fa’aru’e tāu’e i te tahi. O ’outou nei ho’i, e ’ore e ti’a ’ia fa’aro’o i te Atua ’e te Mamona ».

’Ia rōtahi ana’e tō’u ferurira’a i ni’a i te mau ’ohipa mātēria, mea fifi roa iā’u ’ia hi’o i te pi’ira’a o te ’evanelia. ’Aita vau i māramarama nāhea te haerera’a i te purera’a ’e te tai’ora’a i te mau pāpa’ira’a mo’a, e nehenehe ai e tauturu iā’u ’ia fa’atupu i tō’u mau hina’aro.

Noa atu ē te haerera’a i tā’u ha’api’ira’a ’e te noa’ara’a i te moni tano maita’i ’ua riro ’ei mau ’ōpuara’a maita’i, ’ua fa’ariro rahi vau i te reira ’ei ’ohipa mātāmua faufa’a a’e. ’Ua onoono’a roa vau. ’Ua ’ite a’era vau ē, e’ita vau e ’oa’oa ē tae roa i te taime ’a ha’api’i mai ai au i te taui i tō’u ferurira’a.

’Ua pure au i te Metua i te ao ra ’e ’ua ani au iāna e nehenehe ānei ’oia e tauturu iā’u, ’ia ha’amata i te rōtahi i ni’a i te mau mea faufa’a roa a’e. ’Ua ha’amata vau nā roto i te tai’ora’a i te mau pāpa’ira’a mo’a. ’A ’imi maita’i ai au i te mau ’īrava ’o tā’u i mana’o ’ua tai’o a’ena vau e rave rahi taime nā mua atu, ’ua ha’amata teie mau ’ā’amu i te haru i tō’u ’ara maita’i. ’Ua putapū vau i te Vārua Maita’i i te paraparaura’a mai iā’u !

Hō’ē ’ā’amu tei tāvevo i roto iā’u, ’oia ho’i te ’ā’amu o te ta’ata tao’a rahi. ’Ua parau Iesu iāna : « ’ia hina’aro ’oe ’e ’ia maita’i roa, ’a ti’i ’a ho’o i tā ’oe ato’a ra, ’a hōpoi atu ai nā te ta’ata ri’i, ’e e tao’a tā ’oe i te ao i reira ’a haere mai ai ’a pe’e mai iā’u ». (Mataio 19:21).

I tō’u tai’ora’a i teie ’ā’amu o te pāpa’ira’a mo’a, e au ē ’ua tūra’ihia vau ’ia fa’aea ’e ’ia feruri e nāhea te reira e tano ai iā’u. I te ha’amatara’a, ’aita roa vau i mana’o tē vai ra hō’ē ’ohipa e tū’ati iā’u ’e te ta’ata tao’a rahi—e ta’ata tao’a rahi a’ena ’oia ’e ’aita ’oia i ineine nō te fa’ata’a ’ē iāna i te reira. Nō’u rā, ’aita ā vau i monihia atu ra ’e ’ua mana’o vau ē, tā’u mau tauto’ora’a nō te noa’a rahi mai i te moni e mea tano ïa.

’Ua ’oi’oi rā vau i te ’itera’a ē, e mea fifi nō’u ’ia hōro’a i tā’u moni, mai te ta’ata tao’a rahi. Hau atu ā e mea fifi a’ena nō’u ’ia fa’aea i tā’u tauto’ora’a ’ia rahi atu ā te moni.

’Ua hina’aro fa’ahou vau e hōro’a i te ti’ara’a mātāmua i tō’u Metua i te ao ra i roto i tō’u orara’a. ’Ua fa’aoti au e ’īriti i tā’u buka ’ā’amu, e pāpa’i i te mea tā’u e putapū nei, ’e ’ia ho’i mai i ni’a i tā’u mau noa’ara’a moni nā mua a’e, nō te māramarama maita’i a’e i te mea i ha’amata ai tō’u onoono’a.

’A nā reira ai au, ’ua ’ite hau atu ā vau i te huru ’a ho’i mai ai tā’u mau ’ohipa mātāmua i muri. Mai tā’u i ’ite i roto i te hō’ē noa’ara’a moni, « tē tāmau noa ra vau i te feruri i te huru e ti’a ai iā’u ’ia fāna’o i te mau mea ato’a, ’eiaha rā e feruri i te huru e nehenehe ai iā’u ’ia riro e mea maita’i a’e ’aore rā e tauturu ia vetahi ’ē ».

I te pae hope’a, ma te ’imi-maita’i-ra’a i te mau pāpa’ira’a mo’a, te fa’aro’ora’a i te Vārua ’e te pāpa’ira’a i roto i tā’u buka ’ā’amu, ’ua ha’amata vau i te taui.

E mea fa’ahiahia mau ’ia ’ite i te fafaura’a a te Maseli 3:5–6 ’ia tupu i roto i tō’u orara’a :

« E ti’aturi ia Iehova ma tō ’ā’au ato’a ra ; ’eiaha rā e ti’aturi i tō ’oe iho ra ha’apa’o.

« ’Eiaha e ha’amo’e iāna i tō ’oe ato’a ra mau haere’a, ’e nāna e fa’a’ite ia ’oe i tō ’oe ra mau haere’a ».

Tē tūtava tāmau nei au i te fa’ananea i tō’u mau tārēni ’e ’ia ’ohipa itoito i ni’a i tā’u ha’api’ira’a ’e tā’u tōro’a ’ohipa ano’ihi. Te ’imira’a i te pārurura’a i te pae faufa’a moni nō te fa’arava’i ia tātou iho ’e tō tātou ’utuāfare e hina’aro tano ïa. Teie rā, e ti’a ia tātou ’ia ha’apa’o maita’i ’eiaha e vaiiho i tā tātou tītaura’a nō te manuia ’e nō te moni ’ia riro ’ei mea faufa’a a’e i te tahi atu mea.

I teie mahana, ’aita vau e tāu’a nei ’ia riro ’ei ta’ata tuiro’o ’aore rā, ’ia noa’a rahi te moni nā roto mai tā’u ’ohipa tōro’a. ’Ua ’ite mai au ē, te orara’a i te hō’ē orara’a i reira vau e here ai—’e e putapū ai i te here—o te Metua i te ao ra ’e o Iesu Mesia, ’o tō’u ’utuāfare ’e te ano’ihi, ’ua nava’i nō’u. ’Aita vau e ’iriā ’ōhie fa’ahou nei i te mau ha’amāu’ara’a mana’o-’ore-hia ’aore rā i te manuiara’a o vetahi ’ē. ’Āhiri i te reira, ’ua rahi atu ā tō’u itoito i te ’evanelia a Iesu Mesia nō te mea tē tāmau noa nei te reira i te fa’aora iā’u i te hō’ē orara’a nō te nounou, te fa’aaura’a ’e te ’ino’inora’a tāmau. ’E ’ia ha’amata ana’e i te mo’ehia iā’u, e fa’aha’amana’o tāmau mai te mau pāpa’ira’a mo’a ’e te mau peropheta i te mau mea faufa’a a’e o te orara’a.

’Ua ha’api’i te peresideni Russell M. Nelson :

« Tē parau onoono nei te ao nei ē, te mana, te mau tao’a rahi, te ro’o ’e te mau ’āreareara’a o te tino, e hōro’a mai te reira i te ’oa’oa, e’ita roa atu ïa ! E’ita tā te reira e nehenehe !

« Te parau mau maori rā, e mea rohirohi a’e ’ia ’imi i te ’oa’oa i te vāhi e’ita roa atu e ’itehia ! Teie rā, mai te mea e nati ’outou ia ’outou i ni’a ia Iesu Mesia, ’e e rave i te ’ohipa pae vārua i tītauhia nō te upo’oti’a i ni’a i te ao nei, nāna ’e nōna ana’e te mana nō te fa’ateitei ia ’outou i ni’a a’e i te ’umera’a o teie nei ao ».

Te mau tauira’a tā te Fa’aora i tauturu iā’u ’ia rave i roto i tō’u vairua, ’ua riro ’ei temeio. ’Ua ’ite au i teienei ē, te manuiara’a e ’ere i te fa’a’itera’a i tō’u fa’ahiahia ’aore rā ’ia tū’ati i tō’u faufa’a i te rahira’a moni tā’u e noa’a ; ’o tē putapūra’a ra i te ’ā’au māuruuru nō te rāve’a ’ia ora i te orara’a tahuti nei ’e ’ia ’ite i te mau ha’amaita’ira’a maere tā te Metua i te ao ra i hōro’a tāmau mai iā’u. ’Ua ’ite au ē, mai te mea e tu’u mātāmua vau iāna, e ho’i te mau mea ato’a i tō rātou vaira’a mau.

Tē fa’aitoito atu nei au ia ’outou ’ia feruri i tā ’outou mau ’ohipa mātāmua i roto i te orara’a. Tē rōtahi ra ānei ’outou i ni’a i te mau faufa’a o te ao nei ’e i ni’a i te mau mea ’aita tā ’outou e vai ra ? ’Aore rā, tē rōtahi nei ’outou i ni’a i te mea faufa’a a’e ? ’Ia vai ha’avare ’ore noa ia ’outou iho. ’A hi’o e ti’a ānei e fa’atano i tō ’outou haere’a nō te ho’i mai i te Fa’aora ra.

’Ia rave ana’e ’outou i teie mā’itira’a, e ’ite mai ’outou i te ’oa’oa rahi ’o tā ’outou i ’ore i ’ite a’enei.