« E ui i te mau uira’a, e ’ite mai i te mau pāhonora’a : Te hōho’a pereota tā Iosepha Semita i ha’amau », Liahona, Tēnuare 2025.

Mai, pe’e mai

E ui i te mau uira’a, e ’ite mai i te mau pāhonora’a : Te hōho’a pereota tā Iosepha Semita i ha’amau

Iosepha Semita e hi’o ra i ni’a i roto te pou māramarama

I te matahiti 1820, Iosepha Semita, tei fa’atōro’a-ātea-hia, e taure’are’a fa’a’apu 14 matahiti nō te pae apato’erau nō New York, ’ua fāri’i i te ’ōrama mātāmua temeio ’o tei tāpa’o i te hō’ē ha’amatara’a ’āpī nō te ao ato’a nei Teie e toru uira’a ’e mau pāhonora’a nō ni’a i te ha’apūaira’a i tō tātou ’itera’a pāpū nō te ’Ōrama Mātāmua.

E aha tā tātou e ha’api’i mai nā roto mai i te hi’ora’a o Iosepha Semita i te uira’a i te mau uira’a ?

Tē ’imi ra Iosepha i te fa’a’orera’a o tāna mau hara ’e te mau pāhonora’a i tāna mau uira’a. Tē hina’aro ra ’oia ’ia ’ite i tei hea ’ekalesia e ’āmui atu. Tē haere tāmau ra ’oia i te mau fare purera’a rau ’e tē fāriu ra i roto i te Bibilia nō te mau pāhonora’a. ’Ua fa’auru te Iakobo 1:5 iāna ’ia ani i te Atua, te puna o te mau parau mau ato’a. (Hi’o Iosepha Semita—’Ā’amu 1:10–13.)

’A fa’aineine ai Iosepha nō te pure, ’ua ’itehia mai iāna te hō’ē vāhi au maita’i ’e te hau. Noa atu te pāto’ira’a ’o tāna i fa’aruru i te ’ōmuara’a o tāna pure, ’ua fa’a’ite Iosepha i « tōna pūai ato’a nō te ti’aoro i te Atua ’ia fa’aora [iāna] » (Iosepha Semita—’Ā’amu 1:16) ’e ’ua fāri’i ’oia i te hō’ē pāhonora’a i tāna uira’a (hi’o te mau ’īrava18–19).

Nā roto mai i te ’ohipa i orahia mai e Iosepha, tē ha’api’i rahi mai nei tātou nō ni’a i te fa’aro’o, te pure ’e te fāri’ira’a i te mau pāhonora’a. E mea faufa’a roa ’ia ’ite ē, noa atu ’ua fāri’i Iosepha i te mau pāhonora’a i tāna mau uira’a mātāmua, i roto i tāna ’ōrama nō te Metua ’e te Tamaiti, i te roara’a o tōna orara’a, ’ua tāmau noa ’oia i te ’imi i te mau pāhonora’a nō ’ō mai i te Atua ra nā roto i te pure. ’Ua tae mai teie mau pāhonora’a i te roara’a o te mau matahiti, ’a tāmau noa ai ’oia i te ’imi, i te ha’apa’o, ’e te tāpe’ara’a te fa’aro’o ē, e pāhono mai te Atua iāna.

’Ua ha’api’i te peresideni Russell M. Nelson, « ’Ua ha’amau te peropheta Iosepha Semita i te hō’ē hi’ora’a ’ia pe’e nō te fa’ati’a i tā tātou mau uira’a » :

’A fāriu atu i roto i te mau pāpa’ira’a mo’a ’e i te tahi atu mau mātēria ti’aturihia.
’A ’imi ma te ’ā’au hina’aro mau ’e te mataratara.
’Ia vai ineine noa nō te rave mai te au i te mau pāhonora’a tā ’outou e fāri’i.
’Ia ’ite pāpū mai ē, e tae mai te mau pāhonora’a i te taime tei mā’itihia e te Fatu.

E mea faufa’a ānei te ’Ōrama Mātāmua nō tō’u ’itera’a pāpū ?

’Ua tāpa’o te ’Ōrama Mātāmua i te ha’amatara’a o te fa’aho’i-fa’ahou-ra’a mai o te ’evanelia a Iesu Mesia ’o tē tāmau noa nei i teie mahana. I taua mahana ra nō te tau fa’atupura’a rā’au i te matahiti 1820, ’ua paraparau te Atua ia Iosepha, ’ua pāhonohia tāna pure, ’e ’ua hōro’a i te arata’ira’a ’o tei fa’atoro atu i te fa’ati’ara’a i te ’Ēkālesia a Iesu Mesia i ni’a i te fenua nei.

Mai te mea tē ti’aturi nei tātou ē, ’ua paraparau te Fatu ia Iosepha, nō reira e nehenehe tātou e ti’aturi e paraparau mai ’oia ia tātou. Mai te mea tē ti’aturi nei tātou ē, ’ua fa’ati’a ’oia i tāna ’Ēkālesia nā roto mai i te peropheta Iosepha, e nehenehe tātou e ti’aturi ē, tē tāmau noa nei ’oia i te arata’i ia tātou nā roto mai i tō tātou peropheta i teienei, te peresideni Russell M. Nelson.

Mai ia Iosepha Semita, tē fāri’i nei te mau peropheta ora i te heheura’a nō te arata’i i te ’Ēkālesia. ’Ua parau te peresideni Russell M. Nelson, « mai te peu e ha’api’ira’a te ’apo mai i roto i te ’ohipa rahi hope i tupu nō Iosepha Semita i roto i te uru rā’au mo’a, ’o te vēteara’a ïa te ra’i ’e ’ua paraparau te Atua i tāna mau tamari’i ».

Ma te hō’ē ’itera’a pāpū nō te ’Ōrama Mātāmua, tō tātou fa’aro’o i te Fatu, i tāna ’Ēkālesia ’e i te heheura’a tāmau ’o tāna e hōro’a i tā tātou mau peropheta ’e te mau ’āpōsetolo i teie mahana e ha’apūaihia.

Nāhea e noa’a ai ia tātou te hō’ē ’itera’a pāpū nō te ’Ōrama Mātāmua ?

Noa atu te haere’a ta’a ’ē o te ta’ata tāta’itahi i te fa’afāriura’a, e hina’aro te ta’ata tāta’itahi i te ha’apāpūra’a a te Vārua Maita’i, nō te fāri’i i te hō’ē ’itera’a pāpū nō te ’Ōrama Mātāmua ’e te tahi atu ā mau parau mau o te ’evanelia.

’Ua ha’api’i te peresideni Jeffrey R. Holland, mono peresideni nō te pupu Tino ’Ahuru ma Piti ’āpōtetolo, « ’A fa’a’ite pāpū i tā ’outou mau uira’a ’e tō ’outou mau mana’ona’ora’a, nā mua roa rā ’e a muri noa atu, ’a tāhirihiti ’ārahu i tō ’outou fa’aro’o, nō te mea e tupu iho ā te mau mea ato’a ia rātou ’o te ti’aturi ».

Te pure ’o te tāviri ïa ’o te ’īriti i te ’ūputa i te heheura’a a te ta’ata hō’ē i ni’a i te ’Ōrama Mātāmua—’e te tahi atu ā mau uira’a. ’A ani i te Atua ’A ani iāna, ’ua ’ite mau ānei Iosepha i te Metua ’e te Tamaiti. ’A ’imi i te Vārua, ’a ti’aturi i te Fatu, ’e ’a tāmau noa i te tāmata. E nehenehe ’outou e parau mai ia Iosepha : « ’Ua ’ite au i te reira, ’e ’ua [’ite] au ē, ’ua [’ite] te Atua i te reira, ’e e’ita e ti’a iā’u ’ia huna i te reira » (Iosepha Semita—’Ā’amu 1:25).