O Perofeta a le Atua

Le autalavou pele, se sauniga konafesi ina a matagofie ua tatou faia! Ua uma ona tatou faalogologo i Aposetolo soifua e toatolu a Iesu Keriso. Oka se faamanuiaga ofoofogia! Ma toe toatasi o le a tatou faalogo atu i ai, o Elder Henry B.Eyring. O loo faaauau pea le taumafataga faaleagaga!

Ina ua ou lauga i le tausaga ua te’a, sa tatou aoao ai i le ala e feagai ai ma lenei lalolagi e ala i le aafiaga o Tavita ma Koliata. Manatua maa e lima? O le asō ou te faasoa atu ai se tala mai le Feagaiga Tuai sa ou faitauina a o [ou] pei o lo outou matutua, lea na tuua ai a’u ma le manao ia faapei o lona toa manumanu. E le o ta’u maia e le Tusi Paia lona igoa, o lea la o le a tatou faaigoa ai o ia o Sunema aua o le igoa lena o lona nuu.

I se tasi aso, sa ui atu ai le perofeta o Elisaia i Sunema, ma ua tatou faitau ai e faapea sa “i ai se tasi tamaitai maoae; sa ia [valaaulia] o ia e ’ai se areto. Ona i’u ai lea, o le faafia lava na ui ane o ia, e afe atu o ia … e ’ai ai.” Ou te vaai faalemafaufau i le matuā fiafia o le perofeta o Elisaia i le valaaulia e ‘ai i lona fale! Ua tele aso o alu o ia, ona oo lea i se tasi aso sa faapea atu le tamaitai i lana tane, “Faauta mai, ua ou iloa o le tagata paia o le Atua lenei tagata.”

Fai mai le tamaitai, “Faauta mai, ua ou iloa.” E foliga mai sa ia valaaulia Elisaia i lona fale e aunoa ma se iloa o ia o le perofeta; sa ia maua lana molimau e ala i le Agaga Paia i lona faalogologo ma le toto’a i mea sa fai atu ma aoao atu ai Elisaia. (Manatua, sa leai ni ata i na ona po! O lea sa faigata ai ona iloa le perofeta i na o ona foliga.)

Ae sa lei gata ai iina le tala. I se tasi aso, sa fai atu ai le tamaitai i lana tane, “Ia ta faia se afeafe itiiti, … ia ta tuu ai se moega mo ia, ma se laulau, ma se nofoa, ma se tuugalamepa: e sau foi o ia ia te i taua, i le alu ane i ai o ia.”

Sa naunau lenei tamaitai faatuatua e fau se potu i lona fale ina ia mafai ai e le perofeta, e ui ane i le aai, a ua i ai se mea e nofo ai!

O le asō e mafai ona tatou aoaoina se lesona mamana mai lenei aafiaga.

Na molimau atu le Alii i le tamaitai o Sunema e faapea, o Elisaia o se perofeta a le Atua, ma sa ia gaoioi e ala i le tatalaina o lona fale e tali ai o ia.

E mafai foi e i tatou ona maua se molimau patino o perofeta a le Atua i aso nei ma tatala atu o tatou loto ma mafaufau—o tatou fale—i le savali a lo tatou Tama Faalelagi mo i tatou i nei aso e gata ai.

Le autalavou pele, ou te valaaulia outou e fesili ifo ia te oe lava le fesili lenei: “Pe o i ai sa’u molimau patino e uiga i perofeta soifua a le Atua?”

Tatou amata i le amataga.

O le a se perofeta? O se perofeta o se tamalii ua valaauina e le Atua e saunoa mo Ia. O loo i ai perofeta i le lalolagi i le taimi nei, e faapei foi ona sa i ai i aso anamua.

O perofeta o tagatavaai, ma talifaaaliga. O lona uiga e mafai ona latou vaai i mea e le mafai e isi ona vaai i ai, ma e mafai ona latou valoia mea e tutupu i le lumanai. E mafai foi ona latou saunia i tatou mo mala. E maua e perofeta ia poloaiga ma faaaliga mai le Alii. O le mataupu faavae lona iva o le faatuatua o loo tautala e uiga i faaaliga faifaipea i nesi aso amulī. O loo faapea mai, “Matou te talitonu i mea uma na faaali mai e le Atua, mea uma ua Ia faaali mai nei, ma matou te talitonu foi o le a Ia faaali mai le tele o mea silisili ma le tāua tau i le Malo o le Atua.”

Na saunoa Elder Gary E. Stevenson, “O loo faaauau pea ona faaali mai e le Alii ia Ana poloaiga ma Lona finagalo i Ana perofeta i aso nei, ona e finagalo o Ia e taitai i tatou i le fiafia i lenei olaga ma i le mamalu selesitila i le isi olaga a sau.”

E folafola atu foi e perofeta le talalelei ma o ni faiaoga ma avefeau musuia a le Atua i tagata uma i le fogaeleele.

O sui taitoatasi o le Au Peresitene Sili ma le Korama a Aposetolo e Toasefululua o se perofeta, tagatavaai, ma se talifaaaliga. O le galulue ai o se aufono i lalo o le taitaiga a le Alii, ua ia i latou le pule e tautino atu ai ma faamatala aoaoga faavae autu ma faia aiaiga faavae mo Lana Ekalesia. Latou te tatalo ma fuafua ma le toto’a, aua o faaiuga a nei korama e tatau lava ona autasi. I lea ala, e faamautinoa mai ai e le Alii ia i tatou, o le a faia pea Lona finagalo.

E molimau atu perofeta e uiga ia Keriso—Lona soifua ai, Lana misiona, ma Lona paia.

Sei o tatou faitauina ni molimau a perofeta mai le Tusi a Mamona.

Na folafola mai e Apinati:

“O le a afio mai i lalo le Atua lava ia i totonu o le fanauga a tagata, ma o le a togiola e ia ona tagata.

“Ona o le a soifua o Ia i le tino o le a taʼua o Ia o le Alo o le Atua.”

Sa molimau mai foi Samuelu le sa Lamana e faapea o Iesu Keriso, o le “Alo o le Atua, o le Tamā o le lagi ma le lalolagi, o le Foafoa o mea uma mai le amataga.”

Ma na fai mai foi le perofeta o Moronae, “Ua ou vaai ia Iesu, ma … sa ia fetalai mai ia te a’u, faafesagai lava.”

Ina ua asiasi atu Keriso ia sa Nifae, o se tasi o mea muamua sa Ia faia o le valaau o Aposetolo e toasefululua. Ma sa Ia fetalai atu i tagata, “Amuia outou pe afai tou te uai atu i upu a lenei toasefululua o e ua ou filifilia.”

Ia, sei ou faasoa atu ni nai upu mo matua po o isi tauaiga o loo tausia fanau. Na aoaoina Atamu ma Eva e le Alii Lava Ia i upumoni o le ata o le faaolataga. Ona Ia fetalai atu lea ia te i la’ua, “Ou te tuu atu ia te oulua se poloaiga, ia aoao saoloto atu nei mea i a lua fanau.”

O le a le uiga o le aoao saoloto atu? O le aoaoina lea o upumoni o le talalelei, ia i ai se molimau patino o na mea, ma faasoa atu lena malamalama i a tatou fanau. O le faalauiloa atu lea o taimi aloaia ma taimi faasamasamanoa e aoao atu ai. O le ola lea e tusa ai ma lena malamalama ma molimau.

Ua faamatala mai e le Tusi a Mamona le 2,060 o autau talavou o ni “alii o le upumoni ma le mamalu, ona sa aoaoina i latou e tausi poloaiga a le Atua ma savavali ma le tonu i ona luma.” O nei alii talavou faamaoni sa usiusitai ia Helamana, o lē sa avea i lea taimi ma o latou taitai faamiliteli ma lo latou perofeta foi, ma sa latou iloaina sa faatumuina e o latou tina o latou loto i upumoni ma le faatuatua.

Matua, i lenei lalolagi ua tele leo ma o nisi taimi ua tele le pogisa, ua poloaiina i tatou e le Atua lava Ia, e tausi a tatou fanau i le malamalama ma le upumoni. Na Ia faatuatuaina i tatou i le tiutetauave e aoao a tatou fanau i upumoni laveai o le talalelei. Afai tatou te le faia, o le a le faia foi e le lalolagi.

Uo talavou pele, e i ai sa’u valaaulia mo outou: I aso a sau, ou te valaaulia outou ia tootutuli, tatala o outou loto, ma tatalo atu ma le faatuatua i le Tama Faalelagi, ole atu ia te Ia ia faamautu atu ia te outou o Lana perofeta ma aposetolo filifilia o Lona siufofoga lea i le lalolagi i le taimi nei.

Na aoao mai i tatou e le fafine o Sunema, e mafai ona tatou maua lena molimau e ala i le Agaga Paia. Ou te folafola atu ia te outou o le taimi lava tatou te iloa ai o i latou ua faauuina e le Atua, o le a faigofie atu o tatou olaga e ui lava i o tatou luitau faifaipea, a o tatou usiusitai i o latou leo ma le talitonu, faatuatua, ma le faamoemoe. O le faalogo atu ma usitai i le leo o le perofeta e taua i le taofimau i mea lelei uma seia oo i le Afio Mai Faalua o lo tatou Faaola.

Ua faatupulaia le amioleaga o le lalolagi, ae ua sili atu ona malosi le Ekalesia a Iesu Keriso ma Lona malo nai lo se isi lava taimi. Ua ofuina e Siona ona laei matagofie, ma o le a le pa’ū lava le nofoalii o Keriso. Ua faamoemoeina i tatou e le Alii ia malolosi i a tatou molimau, ia tumu i le faatuatua, ma ia salamo i aso taitasi. O loo faamoemoe mai lo tatou Faaola o Iesu Keriso ia i tatou taitoatasi e faaauau Lana galuega.

Na saunoa le Perofeta o Iosefa Samita i se tasi taimi, “Uso e, tatou te le o atu pea ea i lenei savali sili?” Peitai, talu ai o la’u savali e faapitoa mo outou, le autalavou, ua ou manao ai e faaaoga le upu talavounai lo le upu uso. Ua tou sauni?

“[Talavou e], tatou te lē o atu pea ea i lenei savali sili? O atu i luma ae lē o le solomuli. Lototetele, [talavou]; o atu pea, o atu pea i le manumalo! Ia olioli o outou loto, ma ia fiafia tele.”

Ou te faafetai mo le taitaiga ma taumafaiga faapaiaina a perofeta soifua. Ou te tuuina atu ia te outou la‘u molimau paia ua valaauina i latou e le Atua e tauave, faatuina, ma taitai Lona malo i le lalolagi i nei ona po. Ma o le a faapea lava. O le Alii lava ia e filifilia Ana auauna. I le suafa o Iesu Keriso, amene.