Foliga Ataata ma Loto Faafetai
O le maoae o le tatou Au Paia i Aferika ua sili ona iloalelei a o latou feagai ma luitau o le olaga ma tiute e manaomia ona fai o se Ekalesia faatuputeleina.
E silia teisi ma le tausaga ua mavae, sa faamaloloina ai a’u mai lo’u tofiga i le Au Peresitene o le Au Fitugafulu, o se suiga na fofogaina iinei i le konafesi aoao. Ona sa lauina lo’u igoa e sosoo ma i latou o le au Pulega Aoao na faamalolo manumalo, e toatele na manatu sa faamutaina ai foi lo’u taimi o auaunaga. Ina ua uma le konafesi, sa ou maua ni savali se tele o le faafetai ma talotaloga lelei mo le isi vaega i le olaga. Sa ofo mai foi nisi latou te faatauina lo’u fale i Sate Leki i Matu. Sa manaia le vaaia o le a misia a’u ma iloa foi o le a leai se faafitauli i le faatauina atu o le matou fale pe a uma la’u tautua. Ae ou te le’i oo atu i ai.
O lo’u tofiga fou na ave atu ai i ma’ua ma Monica i Aferika lalelei, lea o loo lauusiusi ai le Ekalesia. Ua o se faamanuiaga le auauna ai i le Au Paia faamaoni o le Eria a Aferika i Saute ma molimauina ai le alofa o le Alii mo i latou. E musuia le vaaia o augatupulaga o aiga o ituaiga uma, e aofia ai le toatele o tagata faamanuiaina ma aoaoina lelei o le Ekalesia, o tuuto atu o latou taimi ma taleni e auauna atu ai i isi.
I le taimi lava foi lea, ona o le faitau aofai o tagata o le risone, e toatele tagata e utiuti mea e maua ua auai i le Ekalesia ma suia o latou olaga e ala i faamanuiaga o sefuluai faamaoni ma avanoa faaleaoaoga ua ofoina atu e le Ekalesia. O polokalama e pei o le Succeed in School, EnglishConnect, BYU-Pathway Worldwide, ma le Tupe Faaagaga mo Aoga ua manuia ai le toatele o olaga, ae maise lava i latou o le tupulaga faia’e.
Sa saunoa Peresitene James E. Faust i se tasi o taimi, “Fai mai o lenei ekalesia e le tau tosina mai ai tagata maoae ae e masani ona faia tagata masani ia maoae.”
O le maoae o le tatou Au Paia i Aferika ua sili ona iloalelei a o latou feagai ma luitau o le olaga ma tiute e manaomia ona fai o se Ekalesia faatuputeleina. Latou te taulimaina ma se uiga faaalia lelei. Ua latou faatinoa lelei mai ia aoaoga iloga mai ia Peresitene Russell M. Nelson.
“O le olioli ua tatou lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga.
“Afai o le taulaiga o o tatou olaga e i le fuafuaga o le faaolataga a le Atua … ma Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga.”
Latou te maua le olioli e ui lava i o latou luitau. Ua latou aoaoina o lo tatou faiā ma le Faaola e mafai ai ona tatou taulimaina faigata faatasi ma ni foliga ataata ma ni loto faafetai.
Se’i o’u faasoa atu nisi o o’u aafiaga faatasi ma nei Au Paia faamaoni o e ua faaalia lenei mataupu faavae, e amata atu i Mozambique.
Mozambique
I ni nai masina ua mavae atu, sa ou pulefaamalumalu ai i se konafesi faalesiteki mo se siteki ua tasi le tausaga ua i ai ni iunite se 10. E silia ma le 2,000 tagata na faatumulia ai le tamai falesa ma faleie e tolu na faatutu i fafo. O le peresitene o le siteki e 31 tausaga o lona matua, o lona faletua e 26, ma e toalua le la fanau laiti. Ua ia taitaia lenei siteki tuputupu a’e ma luitauina, e aunoa ma se faaseā—ae na o ni foliga ataata ma se loto faafetai.
I se faatalanoaga ma le peteriaka, na ou iloa ai sa ma’i tigaina lona faletua, ma sa tauivi o ia e tuuina atu le tausiga mo ia. Ina ua uma ona faailoa atu le faafitauli i le peresitene o le siteki, sa ma tuuina atu ia te ia se faamanuiaga faaleperisitua. Sa ou fesili i le peteriaka pe o le a se averesi o faamanuiaga faapeteriaka na te tuuina atu.
“Valu i le sefulu,” na ia saunoa ai.
Sa ou fesili atu, “I le masina?”
Na ia tali mai, “I le vaiaso!” Sa ou fautuaina o ia o le faia o lena aofaiga tele i le vaiaso sa le o se mea atamai.
“Elder Godoy,” sa ia fai mai ai, “latou te o mai i vaiaso uma lava, e aofia ai tagata fou ma le toatele o le autalavou.” Sa leai foi ni faitioga—ae na o se foliga ataata ma se loto faafetai.
Ina ua mae’a le sauniga o le afiafi o le Aso Toonai o le konafesi a le siteki, a o ou alu atu i le faletalimalo, sa ou matauina tagata o loo faatau mai ni meaai i le auala i le leva o le afiafi., Sa ou fesili i la’u avetaavale pe aisea na latou faia ai ae ua pogisa, ae le faatau i le taimi o ao. Sa ia tali mai, sa faigaluega i le ao ina ia maua tupe e faatau ai mulimuli ane.
“Oi, sa faigaluega ananei e aai ai taeao,” sa ou fai atu ai.
Ae sa ia faasa’oina au: “Leai, sa latou faigaluega i le ao ina ia aai ai nanei.” Sa ou faamoemoe ia i ai o tatou tagata i se tulaga lelei atu, ae sa ia faamautu mai, o le toatele na feagai ma luitau faapenei i lena itu o le atunuu. O le taeao na sosoo ai, i le taimi o le matou sauniga o le Aso Sa, ma le nofouta fou i o latou tulaga, sa atili ai ona ou ootia e ala i o latou foliga ataata ma loto faafetai.
Zambia
I le agai atu i se sauniga o le Aso Sa, sa ma iloa atu ai ma le peresitene o le siteki se ulugalii o savavali i le auala ma se pepe ma ni tamaiti laiti se toalua. Sa ma tutu e ofo atu ia i latou matou te o i le taavale. Sa tete’i i latou ma fiafia. Ina ua ou fesili atu pe o le a le mamao na manaomia ona latou savavali atu ai i le falesa, sa tali mai le tamā, e alu ai le 45 minute po o se itula. Sa latou feagai ma lenei malaga i le alu ma le sau, i Aso Sa uma, e aunoa ma ni faaseā—na o foliga ataata ma loto faafetai.
Malawi
I se tasi Aso Sa a o lumanai se konafesi faalesiteki, sa ou asia ai ni paranesi se lua o loo faaaogaina faleaoga a le malo o ni falelotu. Sa faateia a’u i le faatauvaa ma tulaga tauagafau o fale, lea sa oo lava i ni mea mananaia, sa lei maua ai. A o matou feiloai ma ni nai tagata iina, sa ou sauni e faatoese atu mo tulaga le talafeagai o lo latou falelotu, ae sa latou fiafia i le i ai o se nofoaga latalata atu e faapotopoto ai, e aloese ai mai le masani o le savavali umi. Sa leai foi ni faitioga—ae na o foliga ataata ma loto faafetai.
Zimbabwe
Ina ua uma se aoaoga faaleautaitai i se Aso Toonai, sa ave a’u e le peresitene o le siteki i se sauniga o le Aso Sa na faia i se fale mautotogi. E 240 tagata na auai. Ona faalauiloa mai lea e le epikopo ni tagata fou se toa10 na papatisoina i le vaiaso lena. Sa taape le aulotu i ni potu laiti se lua, faatasi ma nisi o le au paia sa nonofo i fafo o le fale, ma matamata mai i le sauniga e ala i faamalama ma faitotoa. Sa leai foi ni faitioga—sa na o foliga ataata ma loto faafetai.
Lesotho
Sa ou asiasi atu i lenei tamai atunuu matagofie, ua ta’ua foi “o le malo o mauga,” e vaai ai i se itu o le Ekalesia o sauniuni e avea ma se siteki. I le mavae ai o se Aso Toonai o fonotaga, sa ou auai i sauniga o le Aso Sa i se tasi o o latou paranesi i se fale mautotogi. Sa matuai tumu le potu e fai ai le faamanatuga, faatasi ma tagata na tutu i fafo o le faitotoa ia auai ai. Sa ou ta’u atu i le peresitene o le paranesi na ia manaomia se fale lapoa atu. I lo’u te’i, sa ia faailoa mai ia te au, sa na o le afa lenei o ona tagata auai. O le isi afa o le a auai i se sauniga faamanatuga lona lua pe a uma le itula lona lua. Sa leai foi ni faitioga—ae na o foliga ataata ma loto faafetai.
Sa ou toe foi i Lesotho mulimuli ane ona o se faalavelave tuga tautaavale na aafia ai nisi o le tatou autalavou, lea na ta’ua muamua e Elder D. Todd Christofferson. Ina ua ou asia aiga ma taitai, sa ou faamoemoeina se siosiomaga faanoanoa. Peitai, sa ou tau atu i ni Au Paia malolosi ma finafinau o e sa taulimaina le tulaga i se ala faagaeetia ma musuia.
O Mpho Aniciah Nku, e 14, o se tasi na sao mai le faalavelave o loo i le ata lenei, na faaalia lelei i ana lava upu: “Faalagolago ia Iesu ma vaai atu e le aunoa ia te Ia, aua e ala mai ia te Ia o le a e maua ai le toafilemu, o le a Ia fesoasoani ia te oe i le faagasologa o le faamalologa.”
O ni nai faataitaiga nei ua tatou vaaia ai uiga faaalia lelei ona latou te faatutotonu o latou olaga i le talalelei a Iesu Keriso. Ua latou iloa le mea e maua ai le fesoasoani ma le faamoemoe.
O le Mana Faamalolo a le Faaola
Aisea e mafai ai e le Faaola ona fesoasoani ia i latou ma i tatou i soo se tulaga o o tatou olaga? E mafai ona maua le tali i tusitusiga paia:
“Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma. …
“… Ma o le a ia ave i ona luga o latou vaivaiga, ina ia mafai ona faatumuina lona loto i le alofa mutimutivale, … ina ia mafai ona ia silafia … le ala e fesoasoani ai i ona tagata, e tusa ma o latou vaivaiga.”
E pei ona aoao mai Elder David A. Bednar, e leai se tiga, ita po o vaivaiga faaletino e mafai ona tatou oo i ai e le silafia e Faaola. “I se taimi o le vaivai tatou te ono tagi atu ai, ‘E leai se tasi e malamalama [i le mea o feagai ma a’u]. …’ Masalo, e leai se tagata soifua ua silafia. Ae e silafia ma malamalama atoatoa i ai le Alo o le Atua.” Ma aisea? Aua sa Ia lagonaina ma tauaveina a tatou avega ae tatou te le’i oo i ai.”
Ou te faaiu atu i la’u molimau i afioga a Keriso o loo maua i le Mataio 11:
“Ia outou o mai ia te a’u, outou uma o e tigaina ma mafatia i avega, o a’u foi e malolo ai outou.
“Ia outou amoina la’u amo, ma ia outou faaa’oa’o ia te a’u; aua o a’u lē agamalu ma le loto maulalo: ona maua lea e outou o le malologa mo outou agaga.
“Aua e avegofie la’u amo, o la’u avega foi e māmā ia.”
E pei lava o na Au Paia i Aferika, ou te iloa e moni lenei folafolaga. E moni i o, ma e moni i soo se mea. Ou te molimau atu ai i nei mea, i le suafa o Iesu Keriso, amene.