Ia Mafai Ona Faagaeetia Tagata Uma

I le avea ai ma tagata o Le Ekalesia a Iesu Keriso o le Au Paia o Aso e Gata Ai, ua faamanuiaina i le mafutaga ma se tasi o le Aigaatua, e mafai ona tatou maua le fesoasoani a le Faiaoga Faufautua e sili ona atoatoa. E silafia e le Agaga Paia mea uma, e molimau i le mea moni, ma o le a ia “faamanatu mai foi ia i tatou o mea uma.” Sa saunoa soo mai Peresitene Russell M. Nelson e uiga i le taua o le faalogo i le siufofoga o le Alii. Na Ia aoao mai i tatou i le ala e valaaulia ai le taitaiga a le Agaga Paia ma sa faafia foi ona ia augani mai ia tatou faateleina lo tatou gafatia faaleagaga e maua ai faaaliga.

O le asō ou te valaaulia outou ia mafaufau i le matafaioi a le Agaga Paia e fāiā patino i le aoaoina o le talalelei ma le aoao atu i le aiga ma i le lotu. E tuuina mai le Agaga Paia e ala i le tatalo o le faatuatua ma a o tatou tauivi e ola agavaa mo lenei meaalofa taua. O le tusi lesona musuia a le Ekalesia o le Aoao Atu i le Ala a le Faaola o loo faataatitia mai ai mataupu faavae faaopoopo na faavaeina e le Alii, ia e fesoasoani e valaaulia ai le uunaiga a le Agaga Paia.

O se tasi o nei mataupu faavae o le valaaulia lea o le aoaoina ma le filiga.” I aso ua tuanai, atonu sa tatou mafaufau i le aoao atu o se avanoa mo se matua po o se faiaoga e valaaulia ai le Agaga i a latou lava tapenaga ona faasoa mai ai lea o mea sa latou aoaoina i tamaiti po o tagata o le vasega, o la latou matafaioi o le faalogo. Ae sili atu foi ona aoga, pe a tatou o mai tapena o ni tagata aoao, ma a oo la ina fatuina e faiaoga aafiaga e aoao mai ai ona uunaia sa’o mai ai lea o faaaliga patino i o tatou loto ma mafaufau. A oo la ina tuu mai avanoa tatou te faasoa atu ai mea ua tatou aoaoina e ala i le suesue ma mai le Agaga Paia, ona fesoasoani lea o le tasi i le isi ia aoaoina ma faagaeetiaina. A o tatou faaaogaina mataupu faavae o le talalelei, e toe molimau mai le Agaga i lo latou moni.

Pei ona i ai i mea uma, o Iesu Keriso o le faataitaiga atoatoa lea. Ua Ia valaaulia i tatou taitoatasi ia avea o ni tagata aoao filiga ma ia pulea a tatou lava molimau. Sa Ia valaaulia Ona soo e sauniuni e aoao, ia faasoa atu mea sa latou aoaoina, ma ia faatino i le faatuatua. Sa Ia tatalo mo i latou, vaaia lo latou gafatia paia, sa faalogo ia i latou, ma sa fesoasoani ia i latou ia iloa sa alofaina ma manaomia i latou.

O le avea ma faiaoga, e mafai ona tatou taulai atili atu i le alualu i luma o le tagata aoao, i le faafetaia’ia o o latou manaoga, ma le fesoasoani ia i latou e atia’e mausa faaleagaga o le avea ma soo i le olaga atoa. O le avea ai ma tagata aoao, pe a tatou faaaogaina lo tatou faitalia i le faagasologa o le aoaoina, ua tatou faailo atu i le Agaga Paia lo tatou naunautai ia aoao mai e Ia.

Ou te faafetai mo se faiaoga na valaaulia a’u e avea ma se tagata aoao sili atu. Ina ua ou amata i le kolisi, sa faaseseina lo’u mafaufau e uiga i le aoga o se mea e onosaia ina ia mafai ai ona faataga e taalo i taaloga. I se tasi aso, ina ua mae’a ona ou faitauina se pepa sa ou tusia, sa fai mai lo’u polofesa sa manatu o ia o a’u o se tagata mafaufau talenia i le āuāuina o manatu. Ou te lei iloa po o le a le uiga o lena mea. Sa ia fai mai, faatasi ai ma se taumafaiga e sili ona tulimata’ia, o le a mafai ai ona avea a’u o se tama a’oga lelei. Sa le’i tau lava i ai lo’u mafaufau i lena mea. O lona fiafia, faamalosiauga, ma valaaulia na suia ai le ala o la‘u aoga ma faamanuiaina tele ai lo’u olaga.

O se isi mataupu faavae e talafeauga i le valaaulia o le Agaga Paia o le aoao atu o aoaoga faavae autu moni. O le uiga o lenei mea, o a tatou suesuega o le talalelei ma faatonuga e tamau i le afioga a le Atua, ma e tatou te le faaaopoopoa pe taumatemate foi i mea e lei faaalia mai e le Alii. Nai lo lena, tatou te tulimatai i mataupu faavae e tatau ai ma faavavau o le talalelei, lea e mafai ai e le Agaga ona molimau i le moni. E toe fai atu, tatou te mulimuli i le faataitaiga a le Faaola. Sa Ia fetalai: “O la’u mataupu, e le o sa’u lava, a o lana na auina mai a’u.”

E maua aoaoga faavae moni i tusitusiga paia ma aoaoga a perofeta i ona po nei. O le apoapoaiga a le Alii e suesue taitoatasi i tusitusiga paia ma o ni aiga ma ia auai i le lotu i vaiaso taitasi e suesue i Lana talalelei, e maua ai se auivi ofoofogia e aoao ai Lana aoaoga faavae autu ma logona ai Lona siufofoga. Tatou te sailiili i tusitusiga paia ia malamalama i faamatalaga, o mataupu faavae o aoao mai ai, ma le faaaogaaga o na upumoni i o tatou olaga. O se faamanuiaga lo tatou maua o tusitusiga paia i o tatou tamatamailima. Manatu ia Atamu ma Eva, Apinati, po o le Faiaoga o Faiaoga o Iesu Keriso, o asiasi mai i o tatou aiga po o vasega e faiaoga ia i tatou. Latou te mafaia pe a tatou taumamafa i afioga a Keriso? Faatasi ai ma taumafaiga faifai pea, e mafai ona tatou aoao ia malamalama ma fiafia i tusitusiga paia, ma talitonu o loo i ai tali i fesili o le loto.

Sa i ai se taimi ae ma te le’i faaipoipo sa tauivi ai lo’u toalua o Kristi, ia lagonaina le alofa o le Tama Faalelagi ma ia malamalama i Lana fuafuaga mo ia. A o tatalo o ia mo se taitaiga, sa oo mai se uunaiga e tatau ona alu i le inisitituti, o lea sa ia lesitala ai i se vasega o le Feagaiga Fou. O le ala sa aoao atu ai lona faiaoga inisituti mai tusitusiga paia, e oo lava i le ala na ia u’uina ai, sa faaalia ai le tele o lona fiafia i afioga a le Atua. A o auai o ia, sa musumusu atu le Agaga Paia ia te ia o loo i ai se mea i tusitusiga paia o loo ia manaomia. O le fiafia o lona faiaoga i tusitusiga paia ma uunaiga a le Agaga Paia na tuu atu ai ia te ia se manao e amata se suesuega ma le loto i ai o afioga a le Atua—lea na avea o se malaga i le olaga atoa o le liua loloto ma le galuega tuuto.

O le mea mulimuli, pei ona fautuaina mai i le Aoao Atu i le Ala a le Faaola, o lo tatou aoao atu ma le aoaoina mai e ao lava ona taulai atu i taimi uma ia Iesu Keriso. E mafai ona faalausosoo ona tatou talanoa atili ma le migao e uiga ia te Ia ma sailia nisi avanoa e faaali atu ai le molimau, lotofaafetai, ma le alolofa mo Ia. Po o le a lava le tulaga, a o tatou manatua o Ia, e mafai lava ona tatou maua “lona Agaga e faatasi ma i [tatou].”

O se tasi auala e tuu ai Iesu i le totonugalemu o a tatou aoaoga o le faamamafa atu o Ia o le faataitaiga atoatoa, o le faatinoga ma le faaalia o mataupu faavae uma o le talalelei. E tusa lava pe le o faasino tonu ia te Ia i se tala faatusi paia, e mafai lava ona tatou faasino atu ia te Ia o se faataitaiga o le mataupu faavae o loo aoao atu. Atonu na ona tatou fesili, “Pe mafai ona e mafaufau i se taimi na faaa’oa’o mai ai e Iesu Keriso lenei mataupu faavae?”

E mafai foi ona tatou taulai atu ia e Ia e ala i le aoaoina o Ona faalaniga, matafaioi, ma uiga auaumama, saili e aoao e le gata i mea sa Ia faia ae ia malamalama lelei foi pe o ai o Ia. Mo se faataitaiga, pe a oo ina suesue le mataupu faavae o le salamo, e taua ona malamalama pe faapefea ona salamo. Ae e tatau foi ona manatua le mea na faia e Iesu Keriso na mafai ai ona maua le salamo ma malamalama i le mea o aoao mai e le salamo ia i tatou e uiga ia te Ia, e uiga i Lona natura moni ma Ona uiga. O le a se tala a lo tatou avanoa e salamo ai e uiga i Lona alofa, onosai, ma le alofamutimutivale, Lona talitonuga i lo tatou gafatia paia, Lona naunautai e togiola mo a tatou agasala, ma le olioli ua Ia maua i le faamagalo atu? Ma o le malamalama i Ona faalaniga—pei o le Tamai Mamoe a le Atua, Togiola, ma le Fomai—ua fesoasoani tatou te iloa ai o le salamo o Lana valaaulia ia faamama, suia, ma faamalolo i tatou. O le taulai atu i mea ua Ia faia mo i tatou, ma mea o ta’u mai ai e uiga po o ai o Ia, e mafai ona fesoasoani tatou te maua ai le “faatuatua e salamo ai.”

E i ai taimi, tatou te le vaaia vave ai uiga auaumama o le Faaola o loo otooto mai i se tala faatusi paia. Mo se faataitaiga, pe a faitau e uiga i le fauina e Nifae o se vaa, atonu sa na o Nifae sa tatou taulai i ai. Ae o le taulai atu i le Faaola e mafai ona fesoasoani tatou te vaai ai e lei faasaoina lenei talafaamaumau e aoao ai i tatou e uiga i le maoae o Nifae, ae ia faaalia mai ai le silisiliese o le Atua—e tuu mai e Ia ia i tatou le malosi e tausia ai Ana poloaiga ma laveai i tatou i taimi o puapuaga.

E mafai foi ona tatou taulai i le matafaioi tutotonu a Iesu Keriso i le fuafuaga atoatoa o le fiafia a le Tama Faalelagi. E mafai ona suia ai le kosi o o tatou olaga e vaai ai i o tatou tulaga e ala i tioata o le fuafuaga e faavavau a le Atua nai lo le vaai atu i le ata e ala i tioata o o tatou tulaga faaletino. O le talalelei e le o se lisi o manaoga; o le tala lelei e faapea na faatoilaloina e Iesu Keriso le agasala ma le oti. O le mauaina o Lona alofa tunoa maoae e ala i le tausia o a tatou feagaiga ma le Atua e mafai ai ona tatou ola fiafia i le taimi nei ma saunia ai mo le olaga faatasi ma lo tatou Tama i le Lagi i le faavavau. A o tatou aoao e vaai atu i le Tama Faalelagi ma le Faaola i tusitusiga paia, o le a sili atu ona tatou iloa ai i La’ua ma o le a tatou vaai ai foi i lo La’ua alolofa ma atili tosina faalausosoo ai ma le mana sili atu i o tatou olaga.

O le a ou manatua pea le Agaga sa ou lagonaina o se talavou, ina ua aoao mai lo matou faiaoga e uiga i aso mulimuli o le soifuaga o le Faaola. Sa ia fesoasoani ia matou vaai i le maoae o mea na tutupu i le afeafe aupito aluga, Ketesemane, Kolokota, ma le tuugamau avanoa. Sa ia faamatala mai lona lotofaafetai maoae mo le Faaola ma lona manao lēmataofiofia e mulimuli ia te Ia. O ana aoaoga o se valaaulia mo le Agaga Paia e molimau atu ia Iesu Keriso. O le Agaga sa ou lagonaina i lena vasega na faalolotoina ai lo’u faatuatua ma faateleina ai lo’u alofa ma le talisapaia mo le Faaola. O le tosinaga a lena faiaoga na tumau ia te a’u i lo’u olaga atoa. Pei ona ta’ua e uiga i se tasi faiaoga, “E mafai ona faamafanafanaina o tatou lima i le afi o lona faatuatua.”

I o tatou aiga ma sauniga i le Lotu, a o tatou tulimatai atu ia Iesu Keriso, aoao atu Lana aoaoga faavae autu, ma aoao mai ma le filiga, tatou te valaaulia le Agaga Paia e faaloloto lo tatou faatuatua ia Iesu Keriso ma fesoasoani ai ia i tatou e avea atili e faapei o Ia, o le faamoemoega uma lea o le aoao atu ma le aoaoina mai o le talalelei.

Ou te faafetai lava mo faiaoga i lo’u olaga, mai matua lelei ma taitai i le lotoifale ma faiaoga, i alii ma tamaitai na tofia e faiaoga ma molimau mai i lenei pulelaa, o e ua fesoasoani ia i tatou ia iloa ma mulimuli ia Iesu Keriso. Ou te faafetai foi i le Agaga Paia, le Faiaoga atoatoa. O le Agaga Paia ua ou iloa ai e alofa le Tama Faalelagi ia i tatou ma ua i ai se fuafuaga atoatoa mo i tatou; o Iesu o le Keriso, o le Faaola ma le Togiola o le lalolagi; ma ua uma ona toefuatai mai Lana talalelei ma Lana Ekalesia. Ou te molimau atu ai ma le faafetai tele i nei mea i le suafa o Iesu Keriso, amene.