Aua E Te Lafoaia Mea E Te Manuia Ai Oe Lava

Sa aoao mai e se faiaoga e faapea, o se tafolā—e ui ina lapo’ā—e le mafai ona ia foloina se tagata auā e laitī o latou faa’ī. Sa teena e se teineitiiti, “Ae o Iona na folo e se tafolā.” Sa tali atu le faiaoga, “E le mafai.” Sa lei talitonu lava le teineitiiti ma fai atu, “Ia, o le taimi ou te oo ai i le lagi, o le a ou fesili ia te ia.” Sa ataata le faiaoga, “Ae faapefea pe afai o Iona o se tagata agasala ma e lei oo i le lagi?” Sa tali atu le teineitiiti, “Ona e fesili lea i ai.”

Tatou te talie, ae e le tatau ona tatou misia le mana o loo aumaia i le tala ia Iona i tagata uma “e sailia le fiafia ma le lotomaualalo” aemaise i latou o loo tauivi.

Na poloaiina Iona e le Atua “e alu i Nineva” e talai atu le salamo. Ae o Nineva o le fili sauā o Isaraelu anamua—o lea sa vave faatūtū ai loa Iona i le itu tonu faafeagai, i le vaa, agai i Tasesa. A o ia folau ese mai lona valaauga, sa alia’e se afā fulifaō faamalepe vaa. O le mautinoa ai o lona le usiusitai le pogai, o lea na ofo atu ai Iona e lafo o ia i lalo. O lea na to’a ai le sami sousou, ma faasaoina ai tagata sa i le vaa.

O se mea ofoofogia, na faasaoina Iona mai le oti ina ua foloina o ia e se “i’a tele” na “saunia” e le Alii. Ae na ia faapupu’u ai lava i lena nofoaga e matuai le talitonuina le pogisa ma le mataga mo le tolu aso seia i’u ina luai mai i fafo i le pa’umātū. Ona ia taliaina lea o lona valaauga i Nineva. Ae ina ua salamo le nuu ma ua faasaoina mai le faatafunaga, sa lei manao Iona i le alofamutimutivale sa faaalia i ona fili. Sa aoao ma le onosai e le Atua ia Iona e faapea, e alofa o Ia ma saili e laveai Ana fanau uma.

O le silia ma le faatasi ona tautevateva i ona tiute, sa tuuina mai ai e Iona se molimau manino e faapea, i le olaga faitino, “ua pa’u’u uma.” E le masani ona tatou tautatala i se molimau i le Pa’ū. Ae o le i ai o se malamalama faaleaoaoga faavae autu ma se molimau faaleagaga i le mafuaaga e tauivi ai i tatou taitoatasi ma luitau o le amio lelei, faaletino, ma faaletulaga, o se faamanuiaga tele. Iinei i le lalolagi, e tutupu ai vao auleaga, e oo foi i ponaivi malō e gaui, ma o tagata uma “e le oo i le viiga mai le Atua.” Ae o lenei tulaga faaletino—o se taunuuga o filifiliga na faia e Atamu ma Eva—e alagatatau mo le mafuaaga tonu ua tatou ola ai: “ina ia [tatou] maua le olioli”! E pei ona sa aoaoina e o tatou uluai matua, e na o le tofoina o le oona matuitui ma le lagonaina o le tiga o se lalolagi pa’ū, e mafai ai ona tatou maua, ma olioli, i le fiafia moni.

O se molimau i le Pa’ū e le tuusaunoa ai le agasala po o se uiga e le popole i tiute o le olaga, lea e manaomia ai i taimi uma le filiga, amiomama, ma le tali atu. Ae e tatau ona tautuuitiitia ai o tatou atugaluga pe a oo ina faaletonu, pe tatou te vaaia se toilalo o se tagata o le aiga, uo, po o se taitai [e tausi poloaiga]. O le tele o taimi o mea faapenei e mafua ai ona tatou lopala i faitioga faafefinauai po o le lotoita lea e faoa ai lo tatou faatuatua. Ae o se molimau mausali e uiga i le Pa’ū e mafai ona fesoasoani tatou te avea atili ai e pei o le Atua e pei ona faamalamalama mai e Iona, e, “alofa mutimutivale, e telegese [Lona] toasa, ua tele foi [Lona] alofa” i tagata uma—e aofia ai i tatou lava—i lo tatou tulaga lē atoatoa e lē maalofia.

E sili atu foi nai le faaalia o aafiaga o le Pa’ū, o le tala ia Iona ua matua’i mamana le faasino atu ai o i tatou ia te Ia o lē e mafai ona laveai i tatou mai na aafiaga. O le osigataulaga a Iona lava ia ia faasaoina ai i latou sa i le vaa, e moni lava e faapei o Keriso. Ma e faatolu ina ua talosagaina Iesu mo se faailoga faavavega o Lona paia, na Ia fetalai e faapea “e leai se faailoga e avatua i ai ua na o le faailoga o Iona,” ma folafola atu e pei ona sa i ai Iona i le “tolu ao ma po e tolu i le manava o le i’a tele; e faapea foi ona i ai o le Atalii o le tagata i lalo i le eleele i ao e tolu ma po e tolu.” E avea o se faailoga o le maliu ositaulagaina ma le Toetu mamalu o le Faaola, ae o Iona e i ai ona ila. Ae o le mea foi lea na faamomoiloto ai ma musuia lana molimau patino ia, ma le tuuto ia Iesu Keriso, na ofoina i totonu o le manava o le tafolā.

O le aioiga a Iona, o se aioiga a se tagata lelei ua i ai i puapuaga, o ia lava ua fatuina ona puapuaga ona o ana mea na fai. Mo se tagata paia, a oo mai mala ona o se mausa e le manaomia, se faamatalaga, po o se faaiuga, e ui i le tele naua o isi faamoemoega lelei ma taumafaiga faamaoni o le amiotonu, e mafai lava ona faataumaoia ma tuua ai se tagata e lagona ua tuulafoaiina. Peitai po o le a lava le mafuaaga po o le ogaoga o le mala tatou te feagai, e i ai lava le eleele matutu mo le faamoemoe, faamalologa, ma le fiafia. Faalogo i a Iona;

“Na a’u valaau atu ia Ieova ona o lo’u puapuaga … ; na ou alaga atu nai le mea maualalo. …

“Na e lafoin a’u i le moana, i totonu lava o le sami; …

“[Ma] ona ou faapea ai lea, ua lafoaiina a’u ai luma o ou fofoga; a ou te toe faasaga atu i lou malumalu paia.

“Ua siosioina a’u e le sami, na manu a’u oti: ua ufitia a’u i le moana, ua fusia lo’u ulu i le limu.

“Ua ou alu ifo i vae mauga; … ae te aveina ae lo’u ola ai le lua. …

“Na ou manatua Ieova ina o vaivai o lou loto: … na oo atu foi la’u tatalo ia te oe i lou malumalu paia.

“O e ua anaana i mea faatauvaa ua lafoaiina e i latou o mea e manuia ai i latou.

“A o a’u ou te faitaulaga ia te oe ma le upu faafetai; ou te faia le mea na ou tauto ai. Mai ia Ieova le olataga.”

E ui ina ua tele tausaga talu ai, e mafai ona ou ta’u atu ia te outou le mea tonu na ou nofo ai, ma le mea tonu na ou lagonaina, i le taimi na ou i ai i le manava o se lua patino, na ou iloaina ai lenei mau. Mo soo se tasi i le asō o lagonaina le pei o a’u i lena taimi—ua lafoa’ia oe, ua e gotouga ifo i le sami loloto, ma lou ulu ua fusia e le limu ma mauga moana ua fafati faataamilo ia te oe—o la’u aioiga, na musuia e Iona, o le aua le lafoa’ia mea e te manuia ai. Ua faigofie ona e maua le fesoasoani faalelagi ma le faamalologa e ui lava i ou vaivaiga faaletagata. O lea manuia po o le alofamutimutivale-ofoofogia e maua mai e ala ia Iesu Keriso. Ona ua Ia silafia ma alofa atoatoa ia te oe, ua Ia ofoina atu ia te oe e fai “mou o lona uiga ua fetaui lelei ma oe, ua mamanuina e tomaga i ai ou mafatiaga ma faamalolo ai ou tiga patino. O le mea lea, mo lou manuia, aua e te alotamala i ai [i le alofamutimutivale o le Alii]. Ia e talia. Amata i le teena o lou faalogo i “mea faatauvaa ma le pepelo” a le fili o lē e faaosoosoina oe e mafaufau e maua le toomaga i le folau ese mai ou tiutetauave faaleagaga. Nai lo lena, ia mulimuli i le taitaiga a le Iona ua salamo. Valaau atu i le Atua. Liliu atu i le malumalu. Pipiimau i au feagaiga. Auauna atu i le Alii, Lana Ekalesia, ma isi faatasi ai ma le ositaulaga ma le faafetai.

O le faia o ia mea e aumaia ai se vaaiga mamao i le alofa faalefeagaiga faapitoa o le Atua mo oe—lea e faaigoa e le Tusi Paia Eperu o le hesed. O le a e vaai ma lagonaina le mana o le “alofa mutimutivale” lotonuu, e le mavae, e le muta o le Atua e mafai ona “faamalolosi tele ai outou… e oo lava … i le laveaiina” mai soo se agasala po o soo se toatuga. O uluai tiga ogaoga e ono puaoa ai muamua lena vaaiga. Ae a o faaauau ona e “faia le mea na e tauto ai,” o le a atili susulu ma saga susulu ai lena vaaiga i lou agaga. Ma faatasi ai ma lena vaaiga o le a le gata ina e maua ai le faamoemoe ma le faamalologa ae, o se mea foi e ofo ai lou maua ai o le olioli, e oo lava i le lotolotoi o ou tofotofoga faigata. Sa matuai aoao lelei i tatou e Peresitene Russell M. Nelson: “Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai ia te Ia ma ona o Ia.”

Pe o tatou feagai ma se faalavelave matuia e pei o Iona, po o luitau o aso faisoo o lo tatou lalolagi lē atoatoa, o le valaaulia lava e tasi: aua e te lafoaia mea e te manuia ai oe lava. Vaavaai atu i le faailoga o Iona, le Keriso soifua, o Ia o lē na toetu mai Lona tuugamau e tolu aso ua manumalo i mea uma—mo oe. Liliu Atu ia te Ia. Talitonu ia te Ia. Auauna atu ia te Ia. Ataata. Aua o Ia, ma na o Ia lava, e maua ai le faamalologa fiafia ma atoatoa mai le Pa’ū, faamalologa ua tatou manaomia vave uma ma o loo sailia ma le lotomaualalo. Ou te molimau atu e moni. I le suafa paia o Iesu Keriso, amene.