Iesu Keriso ma Lou Amataga Fou

Sa “femaliuai Iesu ma agalelei.” Tatou te faitau i lena lipoti faigofie i le tusi o Galuega. O se faamatalaga tele e le o atoatoa lona faamatalaina! E mautinoa lava sa femaliua’i Iesu ma agalelei! O Ia o le ute moni—ma le puna—o le agalelei! Sa Ia tuuto atu Lona soifuaga atoa i le tino i le faia o mea lelei. O Ia e “alofa mutimutivale, ma le alofa fua, e telegese lona toasa,” e le uma le agalelei ma e faavavau le alofamutimutivale.

Soo se taumafaiga e faamatala pe aotele Lona agalelei ma le alofamutimutivale o le a avea o se tuumaualaloina. E moni lava, a o taumafai le Aposetolo o Ioane e faailoa mai, afai tatou te taumafai e tusifaamaumau taimi ma faaaliga uma o le agalelei o le Faaola, “e le mafai ona ofi i le lalolagi ia tusi pe a tusia.”

O faataitaiga fitoitonu ua tatou maua ua tusifaamaumauina i tusitusiga paia ia Iesu o femaliua’i “ma agalelei” ua faaosofia loloto ai le ofo ma le maofa, aemaise pe a tatou mafaufau moni pe na faape’ī le i ai iina, e molimau i Ana vavega, e maua Ana aoaoga, ma maua Lana faamalologa. Sa talanoa o Ia i tagata na vavaeese i agafesootai, sa Ia pa’i atu i tagata faama’ia ma lē mamā, sa Ia aumaia le faamafanafanaga i e vaivai, sa Ia aoao atu upumoni laveai, ma sa Ia valaau atu i e agasala ia salamo. I lepela taitasi, tagata tauaso, ma le tamaitai mulilua; i le pipili, le logonoa, ma le gugu; i tina faavauvau taitasi, tamā popole, ma le fafine faavauvau ua oti lana tane; i le tagata ta’usalaina, faalumaina, ma e puapuagatia; i lē ua oti i le tino po o le oti i le agaga, o le mea sa Ia faia o le ofo atu o se amataga fou. Ioe, o le isi lea faamatalaga ofoofogia e le o faamatalaina atoa lona taua!

O mea uma sa Ia fetalaia ma faia, na saunia ai se amataga fou mo i latou taitoatasi sa Ia faamaloloina, faamanuiaina, aoaoina, ma laveaiina mai le agasala. Sa le’i solomuli o Ia mai ia i latou, ma e mautinoa lava o le a le solomuli o Ia mai ia te oe. Vaai faalemafaufau i le faalogoina nei o soo se tasi o nei fetalaiga e aumaia le ola mai ia te Ia:

“Atalii, ua faamagaloina au agasala.”

“Funa e, ou te fai atu ia te oe, ia e tulai.”

“Inā mamā ia oe.”

“Ou te le faasala foi ia te oe: alu ia oe, aua e te toe agasala.”

“Lo’u afafine e, ina faalototele ia oe: ua e ola i lou faatuatua; ina alu ia oe ma le manuia.”

O fetalaiga a le Faaola i nei tagata taitoatasi sa pupuu, ae o na [fetalaiga] sa Ia valiina ai ni tafailagi fou o le faamagaloga, faamalologa, toefuataiga, filemu, ma le ola faavavau. Ma o le tala fou fiafia o le, ua Ia ofo maia lea lava amataga fou ia te oe ma a’u. E mafai e i tatou uma ona maua se amataga fou e ala mai, ma ona o Iesu Keriso. E oo lava ia te oe. O amataga fou o loo i le fatu o le fuafuaga a le Tama mo Ana fanau. O le ekalesia lenei o amataga fou! O le ekalesia lenei o le amataga o olaga fou!

Faatasi ai ma le papatisoga i le vai ma le Agaga, tatou te “toe fanau” ai ma mafai ona “savavali i le ola toefuataiina.” O le a se tele o le faamoemoe e aumaia e lena amataga fou i se tagata o savali faatosotosololoa i lalo o avega o le agasala po o tigaina mai aafiaga o se olaga pagatia ma mafutaga faaletonu? Sa lei manaomia e Iesu lava Ia se faamagaloga o agasala po o se amataga fou o le olaga, ae sa papatisoina o Ia, e faaali mai ai ia i tatou i se toomaga maualuga le ala i le amataga fou ua Ia tāina mo i tatou taitoatasi.

Ma e le na o le faatasi ona tupu lou amataga fou. E matele ina tatou manatu o o tatou papatisoga o le faatinoga lea e tasi i se amataga fou. E leai. E le na o le tasi so tatou avanoa. O nei amataga fou e mafai ona tutupu i aso uma! Ma e mautinoa lava i vaiaso uma a o tatou aai i se fasi falaoa ma inu i si ipuvai itiiti e manatua ai le meaalofa a lo tatou Faaola atoatoa, o le na maliu ma mo le faamoemoega o le tuuina mai ia i tatou o ni amataga fou se tele a o tatou manaomia! E tuuina mai e Iesu ia i tatou le tele o amataga fou pe a tatou manaomia.

Faatasi ai ma le tuuto ma le olioli i se olaga fou ia Keriso, e mafai ona avea i tatou o se “tagata fou,” ua mavae mea tuai ae faafouina mea uma. O le a se mapusaga le tumau e aumaia e lena mālama fou i se agaga o taumafai pea, e ala i le faaauau ona filifili e faatuatua i le mana o lo tatou Togiola e faamalolo ma toefuatai ai, e ui lava i toilalo lofituina o le ola ai i se lalolagi pā’u? Sa lei togia le solo a le Faaola i Lana tautinoga e fai le finagalo o le Tama ma faamae’a ai Lana misiona togiola paia, e oo lava i tiga ia na mafua ai ona gatete o Ia, tafe toto ai mai puafu ninii uma, ma mafatia i le tino ma le agaga, ma tatalo ia aveese le ipu oona. Toe fai atu, sa Ia faapupula mai mo i tatou foliga o le tumau faamaoni i le Atua.

Faatasi ai ma feagaiga uma tatou te osia ma taumafaiga uma tatou te faia e tausia ai, e mafai ona tatou maua se “loto fou” ma se fuataga faatumuina o se “agaga fou.” O le tele ina tatou valaaulia, o sia mea itiiti ma sia mea itiiti, o Lona agalelei i totonu o o tatou loto ae lafo i fafo leo faatoilalo tagata o loo i o tatou mafaufau, e faapea ona avea i tatou ma Ona nuu ona ua tatou avea moni o Ia ma o tatou Atua. Ua matuai finagalo lava Iesu e avea ma o tatou Tupu ma o tatou Leoleo Mamoe ma o tatou Aloalii o le Filemu, ma e ao ona tatou filifili e avea ai o Ia i o tatou loto ma mafaufau.

O le salamo e matala ai le faitotoa i o tatou amataga fou, amataga faafouina, ma avanoa faalua. O aoaoga a le tatou pele o Peresitene Nelson ua faamaninoina ai talitonuga sese e uiga i le meaalofa paia o le salamo, ma ou te manatu ua iu lava ina amata ona tatou malamalama i ai.

Manaia tele le faalogo atu i o tatou talavou o faamatala le uiga o le salamo ia i latou. Talu ai nei na ou faalogo ai o fai mai se tamaitai talavou, ma se ataata, “A ou mafaufau i le salamo, salamo i aso taitasi, ou te lagona le olioli tele ma le faamoemoe. Ou te lagona le alofa ma le fiafia o lo’u Tama Faalelagi ma lo’u Faaola. Ou te le fefe e alu atu i le Tama Faalelagi i le tatalo, ma ole atu mo Lana fesoasoani i soo se mea o loo o’u tauivi ai. Ou te iloa La’ua te le o taumafai ia maua a’u o faia se mea sese. O loo faaloaloa mai o La’ua aao. O le salamo lea ia te au,” o lana tala lea. Ua malamalama lenei tamaitai talavou ona o Iesu Keriso, e mafai ai ona ia maua ni amataga fou!

E te manaomia se amataga fou? E mafai ona e faia se amataga fou, e oo lava ia oe? Mafaufau i tagata sa auauna i ai le Faaola—tagata sa Ia aoaoina, faamaloloina, faatutuina [mai le oti], faamagaloina, ma toefaafouina. Pe sa Ia filifilia ea i latou mai se vaega po o se siosiomaga faapitoa faaletamaoaiga? Pe sa Ia vaaia i le va o e amiotonu ma e agasala? Pe sa Ia tulituliaupūina tagata ona sa sili atu ona latou agavaa pe sili ona alofaina? Leai.

Na o mai nisi ia te Ia ma le faatuatua tele, ma le talitonu i Lona mana e faamalolo ai—faapei o le fafine na feagai ma le puna toto, le taitaiau Roma na toe a oti lana auauna, le lepela, Iairo, ma Patimaio tauaso. Sa taitasi i latou ma tuu atu o latou faatuatua, ma le faamoemoe o le agalelei ma le mana o le aoao mai Nasareta o le a suia ai o latou olaga ma o latou faamoemoega. Ma sa Ia faia. Sa Ia faatafe atu Lana faamalologa.

Ae sa faamanuiaina foi e Iesu i latou o e sa maluelue o latou faatuatua, e pei o le tamā o le tamaitiiti ma’i o le na alaga atu, atonu e pei foi ona sa e faia, “Le Alii e, ua ou faatuatua; ia e fesoasoani i lo’u le faatuatua.” Ma na faapea foi ona Ia liligi atu le agaalofa ia i latou o e sa lei sailia o Ia, e pei o le fafine na aumaia i le mulilua, o le fafine Naina ua oti lana tane, o le tagata le atoatoa le malosi i le taelega o Petesa, ma se alii na fanau mai e tauaso. Pe na e lagonaina o Ia o femaliuai ma agalelei i lou olaga e ui lava e te lei sailia o Ia pe mulimulita’i ia te Ia?

I nei tagata taitoatasi o tusitusiga paia, ma ia i latou uma o e o le a faalogo ma tali atu, sa Ia tuuina atu se amataga fou, pe o se ola fou ua faamagaloina i agasala po o se ola fou ua faamaloloina i se faama’i, po o se ola fou na faatuina mai le oti.

O le ā le uiga o lenei mea ia te oe ma a’u? O Lona agalelei ma le alofa mutimutivale ma le alofa-agalelei e le iloa ni tuaoi. O amataga fou o loo i le fatu o le fuafuaga a le Tama! O olaga faafouina o le misiona lea a le Alo! O gafoaga fou, itulau fou, ma avanoa fou o ute faatauvaa ia o le tala fiafia o le talalelei!

Ia, pe ua umi ea ona e aluese mai au feagaiga e maua ai se amataga fou? Leai. Pe na faafia ona e faia lenei ma lena e tuuina atu ai se isi avanoa? Leai. Pe ua mamao ea lou aluese mai ia Keriso mo Ia e fesoasoani e tusi sau tala fou e amata atu nei? Leai. Ua na’o le fili lava o le a manuia mai le manatu e faapea ua e magoto. E te le o [magoto].

Ma o amataga fou e tele atu mea e faatatau i ai nai lo na o a tatou agasala ma measese. E ala mai i le agalelei ma le alofa tunoa o le Faaola, e mafai ai ona tatou maua ni amataga faafouina lea e faatelevaveina suiga i o tatou mafaufauga tuai, mausa leaga, uiga maitaita, uiga le lelei, lagona o le leai o se malosiaga, ma le matele ina tuua’ia isi ma le aloese mai tiutetauave patino. E mafai moni lava ona e suia mea e uiga ia te oe lava, ia na tosoina oe i lalo mo le tele o tausaga. E mafai ona e toe amata e ala i le malosiaga o le Matai o amataga fou, E le vaivai lava o Ia e aumai ia i tatou ni amataga fou.

Ia i latou o loo tauivi pea lava pea ma le agasala lava e tasi po o le faafitauli lava e tasi, ia e taumafai pea. E lei tuuina e Ia se papupuni i ou luma. E lei faatuina e Ia se tapulaa i ou avanoa faalua. Ia e agai pea i luma. Ia e tauivi pea. Ia e saili le fesoasoani ma ia i latou o siomia oe. Ma e te talitonuina le amataga fou o loo i ai iina mo oe i taimi uma e te toe liliu atu ai i lou Tama i le faamaoni o le loto. Ia tuu le agasala ma le loto i ai, fai faafia faasamasamanoa, ma le fouvale faamaualuga i ou tua, i le mea ua fai mo latou. E te le tau avea ma tagata sa e i ai muamua. Talia lou amataga fou, lou avanoa faalua, faatolu faafa—pe faaselau—ua ofoina atu ia te oe e ala i le toto togiola o Iesu Keriso.

E le mafaamatalaina lo’u faafetai mo amataga fou ua tuuina mai ia te au, ma mo i latou o le a ou ofoina atu i ai.

Sa fetalaia e lo tatou Faaola se fetalaiga mulimuli e lei lava lona faatauaina, a aunoa ma lea o le a leai se pogai mo le faamoemoe po o le olioli i nei aso. Ina ua mavae tiga o Ketesemane ma i le faaiuga o le satauro matautia, sa na ona Ia fetalai atu, “Ua maea.” Ua faataunuuina valoaga faaMesia, ma o le totogi atoa o le aitalafu mo agasala ma mafatiaga a le tagata soifua ua uma ona totogiina. Sa Ia folafola atu ua “mae’a” Lana taulaga e le iu ma faavavau. Peitai, o Lana Togiola o le a le atoatoa seia maua e Ia Lava le ola fou i le aso tolu, o le amataga fou o se tagata faamamaluina, toetu, e ala i le mana o le Tama.

Ona sa Ia faia e le aunoa na mea sa fiafia ai Lona Tama, ma ona sa Ia “tuuina atu ai i le finagalo o le Tama i mea uma,” ua mafai ai e oe ma au ona maua ni amataga fou. Faamolemole ia maua lou amataga fou, i le asō, i le taimi nei lava. O Iesu Keriso o le Tusitala ma le Faaatoatoa o lo tatou Faatuatua, ua tusia faatasi ma i tatou le anoano o itulau fou. O Ia o le Amataga ma le Iuga—o le iuga o lo tatou luma ma mafatiaga, ae o le amataga o se ola fou ia te Ia, e mafai ai ona tatou maua Lona alofa tunoa, tatou te tuu ai i tua mea ua tuanai ma toe amata faatasi ma se gafoaga fou i le tele o taimi tatou te manaomia ai. E moni lava “e mulimuli mai ia te [i tatou] [Lona] agalelei ma le alofa i aso uma o [o tatou ola].”I le suafa o Iesu Keriso, amene.