Ki Lou Loto ia Iesu Keriso: O Le Meaalofa Paia o Musika a le Peraimeri
O pese peraimeri o lauga ia mo soo o Iesu Keriso, o molimau i le moni o le talalelei toefuataiina, ma o tatalo ua faamusikaina.
O se tasi o faamanuiaga o la’u auaunaga i le Peraimeri, ua aoao e lo’u loto ia fiafia i gagana ou te le tautala ai. Ua ou maua le olioli e fesootai ma uso a Au Paia e ala i le gagana faasoa o musika paia. Aemaise lava e ala i pese faigofie a le Peraimeri, ua fuaao e le Agaga Paia papupuni o gagana ma faatumulia ai lo’u loto i Ana musumusuga. I leo o tamaiti, ua folafola mai ai le alofa o le Atua ma Lona Alo o Iesu Keriso i upumoni manino, faamomoiloto.
E ui ou te lei ola ae i le Peraimeri, ae na vave ona aoao a’u e le Agaga i le paia o ona pese, ua avea ai o se vaega o la’u tapuaiga patino. Ua tauaveina e pese o le Peraimeri se tosinaga paia i lo’u olaga, ma ua siitia ai lo’u agaga, aoao ai a’u i upumoni e faavavau, ma faalatalata atu ai a’u i le Faaola ma Lana talalelei.
Na aoao mai i se taimi e Peresitene Dallin H. Oaks e faapea “o le usuina o viiga o se tasi o ala sili e aoao ai aoaoga faavae autu o le talalelei toefuataiina.” E moni na upu mo i tatou ma aemaise ai o fanau. O musika o le Peraimeri o se tasi o auala e sili ona mu’amu’a e toto ai fatu o molimau i loto o soo aupito iti o le Faaola. E fafagaina e matua, taitai, ma faiaoga lena fatu ao latou molimau atu ma valaaulia molimau a fanau uma ua latou iloa le Tama Faalelagi; o Lona Alo, o Iesu Keriso, ma le Agaga Paia.
I nei tausaga mulimuli o la’u auaunaga, na ou faaaluina ai se taimi e usuina ai ma aoao mai musika a le Peraimeri a o mafaufau loloto i nai fesili:
-
E mafai faapefea e pese o le Peraimeri o loo aoao i le taimi o laiti ona avea ma gagana faaleagaga e faaaoga e tamaiti e molimau atu ai i aso uma o totoe o o latou ola?
-
E faapefea e le usuina o upumoni o le talalelei ona fesoasoani i tamaiti e manatua le Alii o se vaega o a latou feagaiga ma saunia ai i latou mo Ana sauniga?
-
E mafai faapefea ona fesoasoani pese o le Peraimeri e tusiatulafono a le Atua i loto o nei soo laiti?
Ina ua amata le Peraimeri i le 1878, na matauina e lona uluai peresitene, o Aurelia Spencer Rogers, faapea “e tatau ona i ai ni pesepesega.” Sa i ai pea lava musika i le fatu o le aoaoina o le talalelei i tamaiti. E mafai ona avea pese o le Peraimeri o se gagana muamua faaleagaga a le tamaitiiti, aua o latou fati, faigofie ona manatua e faaleoina ai upumoni o le talalelei. Ua umia e nei pese le mana e tumau ai i tamaiti mo le olaga atoa, ma avea o se vaega o lo latou avea ma soo ma o se auala natura ma le masani mo i latou e molimau atu ai i le Faaola.
Aoao Atu o le Aoaoga Faavae Autu a Iesu Keriso e Ala i Pese
E mafai foi e pese o le Peraimeri ona avea ma meafaigaluega faafaiaoga mamana o aoaoga faavae. O nisi pese e faamatala ai tala i le soifuaga o le Faaola ma Lana misiona. O isi e aoao atu ai Ona uiga faaleatua, e pei o Lona faatuatua, Lona faamoemoe, ma Lona alofa mama. Ae o pese e sili ona paia e molimau atu ai i Lana Togiola le i’u ma le alofa e tafe mai ai i lena faatinoga o le faaolataga.
Na aoao mai le perofeta a le Alii, o Peresitene Russell M. Nelson: “[O Musika] e mafai ona faaofi maia si tosinaga faifaipea mo le lelei i le mamao sili atu o taimi a o laiti tamaiti. … [E] i ai [le] mana e saunia ai le fafagaina faaleagaga. O loo i ai le mana faamalolo. Ua i ai le mana e faagaoioia ai tapuaiga; e mafai ai ona tatou mafaufau i le Togiola a le [Faaola] ma le Toefuataiga o le talalelei, ma ana mataupu faavae faaola ma sauniga o le faaeaga. E maua mai ai le mana mo i tatou e faailoa atu ai mafaufauga ma le agaga tatalo ma molimau atu ai i upumoni paia.”
I le avea ai ma matua, taitai, ma faiaoga, o a tatou taumafaiga e aofia ai le fesoasoani i tamaiti ia maua nei faamanuiaga folafolaina e ala i le aoao atu ma le faamoemoe ia upumoni o le talalelei, o loo maua i musika. Ua aoao mai foi Peresitene Nelson e faapea “e mafai e tamaiti ona aoaoina le aoaoga faavae autu pe a o latou aoao e pepese e faapei foi ona mafai ona latou aoaoina le aoaoga faavae autu i se vasega.” E mafai e nei pese ona saunia se faatanoa o lauga e tumu i le faatuatua e faasino atu ai tamaiti i le Faaola, ma fesoasoani ai ia i latou e atia’e le tuuto i Lana talalelei.
Ua aoao mai e tusitusiga paia e faapea o pese a e amiotonu e mai le loto o se fiafiaga lea i le Faaola. E mafai ona na ona ou mafaufau i le fiafia e aumaia e leo o soo laiti o le Faaola. Ou te iloa e oo i le lagi a latou pese o talosaga o ni faailoaga o le faatuatua e valaaulia ai le Agaga Paia e faamautu upumoni e faavavau ma valaaulia lemu ai ma le agamalu isi ia talia le valaaulia a le Faaola e mulimuli atu ia te Ia ma o mai i le aiga. Pei ona faamanatu mai e Elder Henry B. Eyring ia i tatou, o taimi na o le lagonaina o le Agaga ua ia i tatou faamaoniga o le Togiola a le Faaola ua galue i o tatou olaga.
Tusilolomiina o Upumoni i le Loto
E mafai e musika o le Peraimeri ona avea o se vavega i o latou olaga i le ala o le a latou savalia i le avea ai ma soo. O se pese sa aoaoina i le ono tausaga e i ai le mana e mau ia i tatou—ma e mafai ona toefoi mai i le fiasefulu tausaga mulimuli ane i taimi o faaiuga, tofotofoga, faavauvau, po o le olioli. Atonu i tausaga mulimuli ane i o tatou olaga, o upu o le “O Le a Ou Mulimuli I Le Fuafuaga a le Atua” o le a avea o se taula faaleagaga e laulogo ai le molimau a le Aposetolo o Paulo i le moni o folafolaga a le Atua ia i tatou. Pe mafai foi ona faamanatu mai ai ia i tatou e faapea, ona e tausia e le Atua Ana folafolaga, ua ofoina mai e Ana feagaiga le faamafanafanaga malosi ma se nofoaga o le sulufaiga ma valaaulia ai i tatou e tuu lo tatou faamoemoe ma le mautinoa ia mausali ia Iesu Keriso ma Lona mana togiola.
E tele ona manatua e tagata matutua o le ekalesia i le lalolagi atoa, i taimi o faigata, ma liliu atu i pese o le Peraimeri sa latou aoaoina a o laiti. Mo le toatele, o nei pese sa lagolagoina ai le popofou o le atinaega tauamatamata o lo latou faatuatua ia Iesu Keriso ma e tele foi o le nofoaga muamua lea e amata ai le liua i Lana talalelei. E faafailele e matua, taitai, ma faiaoga lena faatuatua i le aluga o tausaga e ala i le aoao atu, pesepesega, ma le molimau atu ma le faaeteete i tamaiti.
Sa faamatala mai e se tasi tuafafine e faapea na ia faatauaina musika a le Peraimeri, ma ina ua mavae le 20 tausaga sa ia talisapaiaina ai i le faateleina o lona liua faifaipea i le talalelei a Iesu Keriso. Sa molimau mai foi se tasi tagata o le ekalesia e faapea na toto e le Peraimeri se fatu o le sinapi o le faatuatua a o ia laitiiti ma o le mafuaaga lea na mafai ai ona ia toefoi mai i le Ekalesia a le Alii i le 30 ma ona tupu o ona tausaga. Na folafola mai le Faaola, “O le Fesoasoani … na te aoao ia te outou i mea uma lava, e faamanatu mai foi e ia ia te outou i mea uma.” O musika a le Peraimeri e mafai ona avea ma auala e tasi e mafai ona faataunuu ai lena folafolaga.
O se isi pese pele a le Peraimeri e aumaia ai le mana o le faatuatua itiiti ma le molimau tumau.
A o pepese tamaiti, latou te faailoa atu le manao o se soo ma aoaoina le mamanu o le ola i feagaiga. E mafai e le Agaga ona faaaoga musika e vane ai upumoni e faavavau i o latou loto mu’amu’a. Ma, e i ai le taimi, e mafai e tamaiti ona filifili le fati ma ki o latou loto ma o latou olaga agai ia Iesu Keriso e ala i le osia ma le tausia o feagaiga paia ma Ia.
Manatuaina o a Tatou Feagaiga ma Tapenaina mo Sauniga
E mafai ona fesoasoani musika paia e tusi le aoaoga faavae autu a Keriso i le agaga ma tapena i tatou e maua Ana sauniga. E faafesootaia le aoaoga faavae a le Faaola i lo tatou manatua ma lena manatua i lo tatou avea ma soo ia te Ia.
I le avea ai ma taitai o le Peraimeri, ua ia i tatou le avanoa ma le tiutetauave paia e faamautinoa ai e aoao atu musika i le Peraimeri ma le olioli, ma le malamalama faaleaoaoga faavae, ma faatasi ma le Agaga. E aofia ai le valaaulia o tamaiti ia matau mea latou te lagonaina a o latou usuina, ma fesoasoani ia i latou ia iloa o na lagona e mai le Agaga Paia. O nei taumafaiga e fesoasoani e tapena ai a tatou fanau mo sauniga paia e pei o le papatisoga ma le faamauga, faapea foi le musuia o o latou manatua o feagaiga a o latou faafouina e le aunoa a latou folafolaga i le Atua
I le Talisuaga Mulimuli, ina ua uma ona faatuina e le Faaola le faamanatuga, na tusia e Mataio e faapea “ua uma ona fai o a latou pese, ona latou o atu ai lea i le mauga o Olive.” O vaiaso taitasi, e sauniuni ai tagata ua papatiso ma faamauina o le Ekalesia toefuatai a le Alii, e aofia ai ma tamaiti ua papatiso ua tai valu tausaga le matutua, e aai ma feinu i le faamanatuga a le Alii. O le usuina o musika paia, e maua ai e faapotopotoga o fanau a le Atua se avanoa e tapenapena ai o latou loto mo lena sauniga paia e tauave ai i o latou luga Lona suafa, ia manatua ai pea o Ia ma tausi Ana poloaiga.
Molimau Faaiu
Uo pele, ou te molimau atu o pese o le Peraimeri o loo aoao mai ai upumoni e faavavau ma le aoaoga faavae e taitai atu ai i tatou ia Iesu Keriso ma Lana talalelei. Ou te valaaulia outou e mafaufau pe o a upumoni faalefaavae ua tusia i o outou loto e ala i aoaoga faigofie a nei pese ma molimau atu ai i na upumoni i soo aupito iti o le Faaola, a o e aoao atu i latou i le tala e lelei o le talalelei e ala i pese.
Ua ou iloa o le Atua lo tatou Tama, i Lona alofa e le gata, na auina mai ai Lona Alo Pele i le lalolagi e aoao i tatou, e faasino mai ia i tatou le ala, ma togiolaina i tatou e ala i Lana Togiola.
Ua ou iloa o le soifuaga o le Faaola ma Lana misiona e moni ma e patino lava. Ua tumu tusitusiga paia i tala o Ana faamalologa, Lona agalelei, ma Ana vavega.
Ua ou iloa e faafofogaina ma tali mai e le Tama Faalelagi tatalo faamaoni a Ana fanau, tusa lava po o le a le matua, tulaga, po o le gagana. E faalogologo mai o Ia i aioiga le leoa a o tatou loto.
Ou te molimau atu o Ketesemane na tauave ai e Iesu Keriso le mamafa o a tatou agasala, faanoanoaga, ma tiga. Sa Ia puapuagatia ma le loto i ai ona o Lona alofa mo i tatou ma ia mafai ai e i tatou ona faamagaloina ma toefoi atu ai i le aiga.
Ua ou iloa o i tatou o fanau totino a le Atua, na foafoaina i Lona faatusa, ua faaeeina i le gafatia paia, ma ua valaaulia e toefoi atu e mau faatasi ma Ia pe a tatou filifili e mulimuli ia Iesu Keriso.
Ua ou iloa o Iesu Keriso o lo tatou faaa’oa’o atoatoa, ma a tatou mulimuli ia te Ia e ala i le auauna atu, faamagalo atu, ma alolofa i isi, tatou te avea atili e pei o Ia i lea aso ma lea aso.
Ma ua ou iloa o malumalu paia o le Alii o Lona maota lea iinei i le lalolagi. I totonu o na maota, tatou te osia ai feagaiga paia, maua faamanuiaga e faavavau, ma aoao atili ai ia te Ia ma lagona atili ai Lona afio ai. O le malumalu o se nofoaga o le aoaoga, filemu, ma tapenapenaga mo o tatou olaga.
Ou te molimau atu o taumafaiga tatou te faia e aoao atu ma usuina nei pese o le Peraimeri i a tatou fanau, ua le na o se vaega manaia o a tatou agamasani faalelotu. O lauga ia mo soo o Iesu Keriso, o molimau i le moni o le talalelei toefuataiina, ma o tatalo ua faamusikaina. O musika paia e mafai ona faasusuluina le Malamalama o Keriso i luga o lē e faalogo i ai, ma e mafai ona liligiina i totonu o le loto o lē e usuina. Uo Pele, o loo manao pea Iesu ia i tatou e fai ma se aveolela. O lea ou te molimau atu ai i le suafa paia o Iesu Keriso, amene.