E Le Tatau Ona I Ai Se Tasi e Nofo Na o Ia

E 50 tausaga o o’u suesueina aganuu e aofia ai ma le aganuu o le talalelei. Sa ou amata i kuki faavaloaga.

I le Taulagasaina i San Francisco, sa faaiu lava taligasua i le afiafi a le aiga o Gong i se kuki faavaloaga ma se faaupuga poto e pei o le “O se malaga e afe maila e amata lava i se laa e tasi.”

A o avea o se talavou matua, sa ou faia ai ni kuki faavaloaga. E fai a’u totinilima vavae papae, ona ou gaugauina lea ma sulu i se mamanu ia kuki lapotopoto vevela mai le ogaumu.

Sa fateia a’u, ina ua ou iloaina o kuki e le o se uluai vaega o le aganuu a Saina. Ina ia ilogaese le aganuu o kuki faavaloaga a Saina, Amerika, ma Europa, sa ou vaavaai mo kuki faavaloaga i konetineta eseese—pei lava ona faaaoga e se tasi ia itu eseese e faailoa tonu ai le faapogai o se alāmu i se vaomatua. E tufatufa e faleaiga Saina i San Francisco, Los Angeles ma Niu Ioka ia kuki faavaloaga, ae le faia [e faleaiga Sainia] i Beijing, Lonetona, po o Sini. Na o tagata Amerika e faamanatuina le Aso o Kuki Faavaloaga i le Atunuu. E na o faasalalauga faalauiloa FaaSaina e ofoina atu “Kuki Faavaloaga Mao’i.”

O kuki faavaloaga o se faataitaiga malie, faigofie. Ae o le mataupu faavae lava lea e tasi o le faatusatusa o faiga faaleaganuu i faatulagaga eseese, e mafai ona fesoasoani tatou te faailogaese ai le aganuu a le talalelei. O le taimi nei ua tatalaina ai e le Alii ni avanoa fou e aoao ai le aganuu a le talalelei a o faataunuuina le talafaatusa o le Tusi a Mamona ma valoaga faafaataoto o le Feagaiga Fou.

O loo fegasoloai tagata i soo se mea. Ua lipotia mai e Malo Aufaatasi le 281 miliona o tagata fegasoloai faavaomalo. Ua 128 nei miliona ua faateleina ai nai lo le 1990, ma ua faatoluina mai le fuafaatatau i le 1970. I soo se mea lava, ua sili atu le toatele o tagata liliu mai ua mauaina Le Ekalesia a Iesu Keriso o le Au Paia o Aso e Gata Ai. O Sapati taitasi, e faapotopoto ai tagata o le ekalesia ma uo mai atunuu e 195 na fananau mai ai ma teritori i le 31,916 faapotopotoga a le Ekalesia. E 125 gagana tatou te tautatala ai.

Talu ai nei, i Alepania, Maketonia i Matu, Kosovo, Suitiselani, ma Siamani, sa ou molimauina ai le faataunuuina e tagata o le ekalesia o le talafaatusa o le laau o le olive i le Tusi a Mamona. I le Iakopo 5, na faamalosia ai e le Alii o le tovine ma Ana auauna ia a’a o le laau olive ma ona lālā e ala i le faapotopotoina ma le suluina faatasi o i latou mai itu eseese. O le taimi nei ua faapotopoto ai fanau a le Atua ua tasi ia Iesu Keriso, ua ofo mai e le Alii se auala masani ofoofogia e faalautele lo latou ola atoatoa i Lana talalelei toefuataiina.

Mo le tapenaina o i tatou mo le malo o le lagi, ua faamatala mai ai e Iesu le faataoto o le talisuaga tele ma le tausamaaga o le faaipoipoga. I nei faataoto, sa faia ai e malo valaaulia ni ’alofaga e le omai ai. Na faatonu ai e le matai ana auauna ia “vave i ala ma alātua o le aai ma ia aumai iinei i e matitiva, ma e mumutu, ma e pipili, atoa ma e tauaso. I le tulaga faaleagaga, o i tatou na taitoatasi.

Ua tautino mai tusitusiga paia:

“O le a valaaulia i ai atunuu uma” i “se tausamaaga i le maota o le Alii.”

“Ia outou teuteu le ala o le Alii … ina ia alu i luma lona malo i le lalolagi, ina ia maua e e o nonofo ai, ma sauni mo aso o le a oo mai.”

O le taimi nei, o i latou ua valaaulia i le talisuaga a le Alii e omai mai nofoaga uma ma aganuu. O e matutua ma talavou, mauoa ma matitiva, i le lotoifale ma le lalolagi, tatou te faia a tatou faapotopotoga a le Ekalesia ia faapei o o tatou nuu.

Ina ua vaaia e le Aposetolo sinia o Peteru le lagi ua avanoa, sa vaaia se faaaliga o “se ie lautele ua noatia i ona pito e fa … ua i ai manu vaefa uma lava.” Na aoao mai Peteru: “E moni, ua ou iloa e le faailoga tagata le Atua. … I atunuu uma lava o i ai lē e mata’u [i le Alii] ma galue i le amiotonu, e taliaina e Ia.”

I le faataoto i le Samaria agalelei, ua valaaulia ai e Iesu i tatou e omai e fesoasoani le tasi i le isi ma ia te Ia i Lona faletalimalo—Lana Ekalesia. Ua Ia valaaulia i tatou ia avea o ni tuaoi lelei. Ua folafola atu le Samaria agalelei e toefoi atu ma toetotogi le tausiga o i latou o i Lona faletalimalo. O le ola i le talalelei a Iesu Keriso e aofia ai le fai o se avanoa mo tagata uma i Lana Ekalesia toefuataiina.

O le uiga o le “potu i le faletalimalo” e aofia ai “e le tatau ona i ai se tasi e nofo na o ia.” A e sau i le lotu, a e vaai atu o nofo toatasi se tagata, pe mafai faamolemole ona e fai atu talofa ma nofo ifo i lalo faatasi ma ia? Atonu e le o la outou agaifanua lea. Atonu e ese foliga o le tagata pe ese foi lana tautala nai lo oe. Ae, ioe, atonu e ono faapea mai se kuki faavaloaga, “O se malaga o se faigauo i le talalelei ma le alofa e amata i se faatalofa muamua ma e leai se tasi o nofo na o ia.”

“E le tatau ona nofo toatasi se tagata” o lona uiga foi ia leai se tasi e nofo na o ia faalelagona pe faaleagaga. Sa ma o ma se tamā lotonutimomoia e asi lona atalii. I nai tausaga ua mavae, sa sagisagi fiafia le atalii e avea o se tiakono fou. O lea faamoemoe na aofia ai le faatauina e le aiga mo ia sana uluai pea seevae fou.

Ae i le lotu, sa taliē ia tiakono ia te ia. Sa fou ona seevae, ae lē o le sitaili fou. I lona maasiasi ma le tiga, sa fai mai ai le tiakono talavou o le a lē toe alu lava o ia i le lotu. O loo nutimomoia pea lo’u loto ia te ia ma lona aiga.

I luga o auala pefua i Ieriko, na taitasi i tatou ma taliē mai i ai tagata, sa o tatou maasiasi ma tiga, atonu foi na ulagia pe sauaina. Ma i tulaga eseese foi o faamoemoega, sa tofu faaleano foi i tatou, e le vaaia pe faalogoina, atonu e faatiga ai ma le loto isi. O le mea moni ona sa tatou tiga ma ua faatiga foi i isi, ua faapea ona aumaia ai faatasi i tatou uma e Iesu Keriso i Lona faletalimalo. I Lana Ekalesia ma e ala i Ana sauniga ma feagaiga, tatou te o mai ai i le tasi ma le isi ma ia Iesu Keriso. Tatou te alolofa ma e alofaina foi, auauna atu ma e auauna mai foi, faamagalo atu ma faamagaloina foi. Faamolemole ia manatua, “e leai se faanoanoaga i le lalolagi e le mafai e le lagi ona faamaloloina”e tuumāmāina avega—e moni le olioli o lo tatou Faaola.

I le 1 Nifae 19, tatou te faitau ai: “E oo i le Atua lava o Isaraelu [latou te] soli i lalo o o latou vae; … latou te tuu ese o ia o se meanoa. … O le mea lea ua latou sasa ia te ia, ma sa onosaia e ia; ma latou taia o ia, ma sa onosaia e ia. Ioe, latou te tuufeanu ia te ia, ae tuu atu e ia i ai.”

Fai mai la’u uo Polofesa o Terri Warner, o le faamasinoina, faatiga, sasa, ma le tuufeanu e le o ni mea e masani ona tutupu, ae sa na o le taimi lava o le soifuaga faaletino o Keriso. O le ala tatou te faia ai le tasi ma le isi—aemaise i latou e fiaaai, fiafeinu, i latou e tuuatoatasi—o le ala foi lea tatou faia ai o Ia.

I Lana Ekalesia toefuataiina, e sili atu i tatou uma pe a leai se tasi e nofo na o ia. Aua ne’i tau ina tatou faatinoina pe onosaia. Ia tatou talileleia ma le faamaoni, faailoa, ma auauna ma alolofa i ai. Ia le avea uo, tuafafine, uso taitasi o sē aumau po o se tagata ese, ae o sē ua nuu faatasi.

O le taimi nei, e toatele ua lagona le tuulafoaiina ma le tuuatoatasi. O faasalalauga faaagafesootai ma le atamai faafoliga e mafai ona tuua ai i tatou e galala mo le felata’i faaletagata soifua ma le pa’i a le tagata soifua. Tatou te mananao e faalogo i le leo o le tasi ma le isi. Tatou te mananao i le avea moni ma ni ō ma le agalelei.

E tele mafuaga tatou te ono lagonaina ai ua le fetaui tatou i le lotu—i se tala faafaatusa, ua tatou nonofo na’o i tatou. Atonu tatou te popole i a tatou faale’oga, o lavalava, tulaga faaleaiga. Atonu tatou te lagona le le talafeagai, manogi tapaa; momoo i le amio mama; ua motusia se mafutaga ma se tasi ma ua lagona le tiga ma le maasiasi; o loo popole i lea ma lea aiaiga faavae o le Ekalesia. Atonu o tatou nofofua, tete’a, ua oti le tane. E pisapisao a tatou fanau; pe leai ni a tatou fanau. Tatou te lei faamisiona pe na toevave foi mai i le fale. E anoanoai isi mea.

Ua valaaulia i tatou e leMosaea 18:21 ina ia lalagaina faatasi o tatou loto i le alofa. Ou te valaaulia outou ia tuuitiitia le popole, tuuitiitia le faamasinosino, tuuitiitia le fai faamalosi o isi,—ma a oo ina moomia, ia tuuitiitia le faafaigata mo i tatou lava. Tatou te le fatuina Siona i se aso. Ae o “faatalofa” taitasi, o se taāga agalelei, e faalatalata atili mai ai Siona. Ia faatele atu lo tatou faalagolago i le Alii ma filifili ma le olioli e usiusitai i Ana poloaiga.

I le tulaga faaleaoaoga faavae i le aiga o le faatuatua ma le faaaumea a le Au Paia, e leai se tasi e nofo na o ia ona o tatou o ni ō le feagaiga ia Iesu Keriso.

Na aoao mai e le Perofeta o Iosefa Samita: “Ua tuu mai ia i tatou e vaai, auai ma fesoasoani e faataavale i luma le mamalu o Aso e Gata Ai, ‘o le tisipenisione o le atoaga o taimi … ,’ i le taimi o le a faapotopoto ai le Au Paia a le Atua ia tasi mai atunuu uma, ma ituaiga, ma tagata.”

“E le faia lava e [le Atua] se mea e tasi vagana ua mo le manuia o le lalolagi; … ina ia mafai ona ia aumai alii uma [ma tamaitai] ia te ia. …

“… Ua ia valaaulia i latou uma e o mai ia te ia ma taumamafa i lona agalelei … ma ua tutusa tagata uma ai le Atua.”

O le liua ia Iesu Keriso e manaomia ai i tatou e tuu ese le tagata natura ma aganuu falelalolagi. E pei ona aoao mai Peresitene Dallin H. Oaks e tatau ona tatou lafoai soo se tumasani ma faiga faaleaganuu e feteenai ma poloaiga a le Atua, ma ia avea o ni Au Paia o Aso e Gata Ai. Ua ia faamalamalama mai, “O loo i ai se agaifanua tulaga ese o le talalelei, o se ta’ui o tulaga faatauaina ma faamoemoega ma faiga ua masani ai tagata uma o Le Ekalesia a Iesu Keriso o le Au Paia o Aso e Gata Ai.” O le aganuu a le talalelei e aofia ai le ola mama; auai faalevaiaso i le lotu, aloese mai le faaaogaina o meainu malolosi, tapaa, ti, ma le kofe. E aofia ai le faamaoni ma le amiosa’o, malamalama tatou te agai i luma ae lē o luga po o lalo foi i tofiga o le Ekalesia.

Ua ou aoao mai tagata faamaoni o le ekalesia ma uo i atunuu ma aganuu uma. O tusitusiga paia na suesue i le tele o gagana ma vaaiga faaleaganuu, ua faalolotoina ai le malamalama i le talalelei. O faailoaga eseese o uiga faaKeriso ua faaloloto ai lo’u alofa ma le malamalama i lo’u Faaola. E faamanuiaina tagata uma pe a tatou faamaninoina lo tatou faasinomaga faaleaganuu, e pei ona aoao mai Peresitene Russell M. Nelson, o se atalii/afafine o le Atua, o se atalii/afafine o le feagaiga, o se soo o Keriso.

O le filemu o Iesu Keriso e patino mo i tatou. Talu ai nei, sa fesili mai ai ma le faamaoni se alii talavou, “Elder Gong, pe mafai lava la ona ou alu i le lagi?” Sa tomanatu o ia pe mata e mafai ona faamagaloina o ia. Sa ou fesili i lona igoa, faalogo toto’a, ma valaaulia o ia e talanoa i lona epikopo ma tuu atu se opo telē mo ia. Sa ia aluese atu ma le faamoemoe ia Iesu Keriso.

Sa ou ta’ua le alii talavou i se isi faatasiga. Mulimuli ane, sa ou maua se tusi e lei sainia na amata faapea, “Elder Gong, ua toaiva le ma fanau ma lo’u toalua … ma ua faalua ona ma faamisiona.” Ae “ou te lagonaina pea lava o le a le faatagaina a’u i le malo selesitila … ona sa leaga tele a’u agasala i lo’u talavou!”

Sa faaauau le tusi, “Elder Gong, ina ua e faamatalaina e uiga i le alii talavou na maua le faamoemoe o le faamagaloga, sa tumu a’u i le olioli, ma amata ai ona ou iloa atonu [e mafai ona faamagaloina] au.” Na faaiu le tusi, “Ua ou fiafia foi ia te a’u lava i le taimi nei!”

O le avea ma ni ō le feagaiga e faalolotoina ai ao tatou o mai i le Alii ma le tasi ma le isi i Lona Faletalimalo. E faamanuiaina i tatou uma e le Alii pe a leai se tasi e nofo na o ia. Ma o iloa e ai? Atonu o le tagata tatou te nonofo ai i autafa e ono avea ma a tatou uo sili o le kuki faavaloaga. Tau ina tatou sueina ma le lotomaualalo ma fai se avanoa mo Ia ma le tasi ma le isi, i le talisuaga a le Tamai Mamoe, ou te tatalo ai ma le lotomaualalo, i le suafa paia o Iesu Keriso, amene.