O Le Alofa Togiola o Iesu Keriso

Afai ua e faia ni agasala matuia ma o loo [e] i ai i le faagasologa o le salamo pe ua i ai le manao ia salamo atoatoa ma lagona le olioli le faamatalaina o le faamagaloga, faamolemole ia iloa o lenei vavega o loo faatalitali mai mo oe. O loo faaauau lava ona valaau mai le Faaola, “O mai ia te a’u.”

O le faamalosia o lou faatuatua i lo tatou Faaola, o Iesu Keriso, o le a faamalosia ai se naunautaiga o lou loto ia iloa o Ia, talitonu ia te Ia, ma gauai atu lou loto ia te Ia. Sa fesili Enosa e uiga i lona lava faamagaloga: “Le Alii e, ua faapefea ea ona faia lenei mea?” Na tali atu le Alii, “Ona o lou faatuatua ia Keriso, o lē e te lei faalogo lava pe na e vaai muamua i ai.”

Ma sa faaopoopo mai Moronae, “Afai tou te faafiti outou lava mai mea e le faaleatua uma, ma alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa mo outou,.”

O le liliuese mai le agasala, ae faasaga atu i le Atua, ma le faamalosia o lou faatuatua ia Iesu Keriso o ni amataga matagofie lea. O le gauai atu ma le faamaualalo o lou loto i le Atua e aofia ai le faailoa atu o agasala matuia i lou epikopo po o le peresitene o le paranesi, peitai o lou faamagaloga atoatoa o le a oo mai mai le Faaola. O le faamagaloga o se meaalofa faalelagi na ofoina mai e ala i le alofa tunoa o Iesu Keriso.

O se manao e toe foi moni atu i le Atua e o mai faatasi ma se naunautaiga ia faamaoni atoatoa i lou Tama Faalelagi, ia te oe lava, ma ia i latou o e na faamanualia, ma i lou taitai perisitua. E olioli lou Tama Faalelagi i lou naunautai e sau ia te Ia ma se loto momomo ma le agaga salamo. O le i ai o se agaga salamo o le tuu atu lea o oe lava ma le faamaualalo i aao o le Atua; o le i ai o se loto momomo e aumaia ai le mea ua faamatalaina e le Aposetolo o Paulo o le “faanoanoa faaleatua,” o se moomoo loloto o le loto ia toe foi atu ia te Ia, tusa po o le a lava le tau.

O lou naunautai e taitai atu ai oe i le manao e toe faaleleia mea na e faaleagaina. Peitai o le iloaina o ni isi mea e le au i ai lou malosi e toe faalelei ai, e te tatalo faatauanau ai i le Alii, e ala mai i Lona alofa tunoa, o le a fesoasoani e faamalolo ai i latou ua afaina i taunuuga o au amioga.

O taunuuga o agasala matuia i isi e masani ona matuai faigata lava ona faatoilalo. Pe o e mulimuli i le faataitaiga a atalii o Mosaea, o e sa “taumafai ma le vilivilita’i e toe faalelei manu’a uma sa latou faia”? Talanoa ma i latou e te faaaloalogia e uiga i mea atonu e te le o vaaia.

A o tapena mo lenei tautalaga, sa ou maua mai se imeli faafuasei mai se tasi o loo i le faagasologa o le salamo ma ua manao e toe foi mai i le Ekalesia. O loo pagatia pea lana avā muamua mai le faaleaogaina “o le [laua] faaipoipoga e faavavau, [faafitauli i le fanau], le i ai o se saogalemu faaletupe, … ua tau le [mafai] ona taulima mea e manaomia ai tupe faaalu, [ma] faalogona tiga loloto o le faalataina.”

Sa ia faasoa mai le ala na “lagona ai e lona taitai perisitua e [fai atu ia te ia] e mafaufau ma le agaga tatalo po o a [nisi mea e mafai ona ia faia mo lona faletua muamua ma le fanau].” Faatasi ai ma le faatagaga, ou te faasoa atu ai se vaega o lana imeli:

“Sa [muamua] ou mafaufau o le [tupe] sa ou totogia i le faatonuga mo le teteaga sa lava ma totoe, ae sa faamalosiau mai lo’u peresitene o le paranesi ou te anapogi ma tatalo e uiga i ai. …

“I le taimi muamua, sa ou tauivi ma le manatu o le toe faia o nisi lava mea mo se faaleleia. Talu ai o a’u agasala sa le faatatau i mea tautupe, sa ou mafaufau ai po o le a moni le uiga o le ‘faaleleia limafoai’ … [ae] sa vave ona ou iloaina sa lē na’o tupe sa faatatau i ai.

“Sa feiloai o’u taitai perisitua ma [lo’u toalua muamua] ma la’u fanau ma iloa ai sa tauivi pea i latou ma sa lei faamaloloina.”

“O la’u sini fou o le ia agai i luma ma le faatuatua. … Sa ou faailoa atu lo’u manao e fesoasoani e aunoa ma se taui. … Sa tonu ou te [auina atu i lo’u toalua muamua se aofaiga patino] mai a’u totogi taitasi, o se vaega tele lea o lo’u totogi atoa. Ae ou te lei faia le peimeni muamua, sa [oo mai i lou mafaufau e manaomia ona ou] totogi atu [le faaluaina o lena aofaiga].

“Ua ou aoaoina o le toe faaleleia e le na o tupe e faatatau i ai. E faatatau i le tuuto atu ma le lotomaualalo o lou ola i le Alii. … O le tupe e fesoasoani e suitulaga ai mea na ou aveesea mai lo’u aiga ona o a’u filifiliga le lelei. E faatatau i le osia ma le tausia o folafolaga e aunoa ma le faamoemoe e toe maua mai se mea, ma fesoasoani ia te ia ia le popole e uiga i pili ina ia mafai ona ia sailia le Agaga.”

O au taumafaiga e faalelei mea ua e faaleagaina atonu e leai se mea a tupe e fai i ai, ae a o e talanoa atu ma le lotomaualalo i le Alii, e mafai ona e iloa ai e tele atu ni mea e mafai ona e faia.

A o e sailia le faamagaloga a le Alii, ia onosai a o e faatalitali i Lana faamaoniga atoa. Mafaufau i le mau lenei:

“Sa latou faamaualaloina i latou lava … i le loloto o le lotomaualalo; ma … tagi faatauanau atu i le Atua; ioe, … i le aso atoa. … [Ae] sa telegese ona faafofoga mai o le Alii i la latou tagi atu ona o a latou amioletonu.”

“Ae ui i lea sa faafofoga mai le Alii ia latou tagi, ma amata … ona faamāmāina a latou avega; … ma … latou amata ona faasolo ina manuia.”

Ia onosai, a o faasolo ina tuuina atu e le Alii ia te oe Ana faamanuiaga ma faamaoniga.

I le taimi a le Alii, o le a e lagona ai Lona siufofoga o ta’u atu ia te oe, “Ia tuu nei mea ia le toe faalavelave ia te oe.” E i ai se aso, a o faaauau ona e liliu atu i le Faaola, o lou Tama Faalelagi o le a ave “ese le lagona ta’usalaina mai [lou loto], e ala i galuega a lona Alo.”

Mo oe o lē ua faamanu’alia ma le le amiotonu e ala i agasala matuia a se isi, ou te matuai manao lava e faasoa atu le alofa ma le agaalofa o le Faaola, Lana faamafanafanaga ma le filemu.

O le faanoanoa na outou lagona, le loto nutimomoia, le aveesea o mea uma, le lagona tiga o le faalataina, le faatitōina o lou olaga e pei ona e vaaifaalemafaufau i ai—ou te avatu ia te oe la’u faamautinoaga atoa, o loo silafia ma e alofa lou Faaola ia te oe. Aapa atu ia te Ia. O Ia o lou faamafanafanaga ma le malosiaga; o le a Ia auina mai Ana agelu e sapasapai oe. O afea o le a uma ai ou tiga, te’a ai lou faavauvau, ma galo ai manatuaga le manaomia? Ou te le iloa. Ae o le mea lenei ua ou iloa: O loo ia te Ia le mana e aumaia ai le matagofie mai lefulefu o ou puapuaga.

O o tatou uso ma tuafafine pele o Grand Blanc, Michigan, faatasi ai ma lo latou faatuatua le faavaivai ia Iesu Keriso, ma lo latou lototetele ma le le manatu faapito, ua latou mauaina ma o le a matua mauaina, i vaiaso ma masina a sau, le alofa ma le alofa tunoa le mafaatusalia o le Faaola.

A o faaauau ona e tuu atu lou faatuatuaga ia te Ia, o le a liua ai ou ao pogisa ma tagitu’i i le ita i po i loimata maligi o le olioli ma le filemu i le malama o le taeao. “E liua lou tiga e avea ma olioli. … E le aveeseina foi e se [tasi] lo outou olioli.” O le a oo mai lena taimi. Ou te molimau atu o le a oo mai.

O le alofa togiola o Iesu Keriso e mafai ona maua i tulaga e sili ona faigata, ae tatou te manaomia uma e le aunoa le alofa tunoa togiola o lo tatou Faaola. Na aoao mai Peresitene Dallin H. Oaks: “Ona o Lona aafiaga togiolaina i la le tino, ua mafai ai e lo tatou Faaola ona faamafanafana, faamalolo, ma faamalosia alii ma tamaitai uma i soo se mea, ae ou te talitonu ua na o i latou lava o ē e saili atu ia te Ia ma ole atu mo Lana fesoasoani, na te faia i ai. Sa aoao mai le Aposetolo o Iakopo: ‘Ina faamaulalo ia i luma o le Alii, ona faamaualugaina lea o outou e ia’ (Iakopo 4:10). Tatou te agavaa mo lena faamanuiaga pe a tatou talitonu ia te Ia ma tatalo mo Lana fesoasoani.”

Na ou maua le faatagaga mai la’u uo pele ma le Pulega Aoao o Fitugafulu faamalolo manumalo, o Elder Robert E. Wells, ua 97 nei tausaga o lona soifua, e faasoa atu lona aafiaga ua silia ma le 60 tausaga talu ai:

A o nonofo ai i Parakuei i le 1960 ma faigaluega o se teutupe faavaomalo, o Robert Wells, sa 32 ona tausaga i lena taimi, ma o lona faletua o Meryl, sa o ni pailate uma i la’ua i ni vaalele eseese se lua, sa felelei atu i le aiga mai Iurukuei ia Parakuei. O le fetaui ai ma ao mafiafia, na le maua ai e Robert ma Meryl se vaaiga o le alavaa ma fesootaiga i le leitio mai le tasi ma le isi. Sa vave ona tulaueleele Robert, lea sa ia iloa ai na lavea le vaalele a lona faletua. Sa lei faasaoina ai lona faletua po o ni uo se toalua sa latou felelei faatasi. O lana fanau, sa i le fale i Asunción, o o latou matutua sa fitu, lima, ma le lua.

Sa saunoa Elder Wells e uiga i lona faavauvau:

“O le a faavavau ona le lava upu e faamatala ai le tiga na maena a’e i lo’u loto, ma faoa atoa ai o’u faalogona ma pepē ai o’u sane. Sa le matū le maligi o loimata o’oo’o o le faanoanoa. O le mea na atili ai le leaga, a o taumafai lo’u mafaufau e taulima le mea moni pagatia o le maliu o lo’u toalua, sa ou oo foi i le tausalaina tele mo le lagonaina o a’u lava na mafua ai le lavea [o le vaalele].”

Sa tuuaia e Robert o ia lava mo le le siakia mae’ae’a o le vaalele ma mo le le tuuina atu i lona faletua o ni faatonuga lelei mo le aveina o le vaalele. Sa ia manatu sa ta’usalaina o ia i le faatamala.

Na fai mai Robert:

“Sa oo lou mafaufau i se fenumia’i pogisa. … Sa na ona ou ola—[mo la’u fanau], na leai lava se isi mea.”

“Sa … leai sou manao e faaauau pea.”

I le aluga o taimi, sa faamanuiaina ai Robert i se aafiaga faaleagaga loloto. Sa ia faamatalaina:

“I se tasi afiafi, pe o se tausaga mulimuli ane, a o o’u tootuli e tatalo, sa tupu ai se vavega. A o o’u tatalo ma augani atu i lo’u Tama Faalelagi, sa ou lagonaina le pei na oo mai le Faaola i o’u autafa ma na ou faalogoina se leo o saunoa mai i upu nei i lo’u loto ma i o’u taliga: ‘Robert, ua totogi i la’u taulaga togiola au agasala ma au measese. Ua faamagalo oe e lou toalua. Ua faamagalo oe e au uo. O le a Ou siitia lau avega. …’

“Mai lena taimi, na siitia ese ai ma le ofoofogia le avega o le ta’usalaina [ma le faanoanoa] mai ia te a’u. Ua laveaiina a’u! Sa ou malamalama i le taimi lava lea i le manao aoao o le Togiola a le Faaola ma … na faatatau tonu lava ia te a’u. … Sa ou … maua le malamalama ma le olioli lea e pei ou te lei iloaina muamua lava. … Sa tuuina mai ia te a’u se meaalofa ou te le’i galue ai—o le meaalofa a le Alii o le alofa tunoa. … Ou te le’i agavaa ai—e leai se mea na ou faia na alagatatau ai ona ou maua, ae sa Ia tuuina mai lava ia te a’u.”

Uso e ma tuafafine, tau ina ia taitoatasi i tatou ona “faapaiaina … ia Keriso i le alofa tunoa o le Atua, e ala i le faamaligiina o le toto o Keriso, …, ina ia … paia, ua aunoa ma se ila.”

Ou te molimau atu i le alofa, le alofa mutimutivale, ma le alofa tunoa o lo tatou Faaola ma le Togiola. O loo soifua o Ia. O i tatou o Ana; o i tatou o fanau o le feagaiga. A o tatou talitonu ia te Ia, mulimuli ia te Ia, ma faatuatua ia te Ia, o le a Ia siiae i tatou mai o tatou faanoanoaga ma a tatou agasala. Ma, i tua atu o lenei olaga faaletino, i le maota o lo tatou Tama, o le a tatou nonofo ai faatasi ma Ia e faavavau, faavavau lava. I le suafa o Iesu Keriso, amene.