Faatomuaga
Ua tatou agai atu nei i luma ma taualumaga o le konafesi aoao faaleafatausaga e pei ona fuafuaina, faatasi ai ma failauga ma musika na tofia e Peresitene Nelson i le mavae ai o masina o tapenaga.
O’u uso e ma tuafafine pele, ua tatou potopoto a o tatou faanoanoa i le tuumalo o lo tatou Peresitene pele o Russell M. Nelson. Ou te tautala atu ia te outou o le Peresitene o le Korama a le Toasefululua, o le tofiga lea ua uma ona lagolagoina ai au i uarota, ma siteki taitasi ma le konafesi aoao i le fitu ma le afa tausaga ua mavae.
Tatou agai i luma ma taualumaga o le konafesi aoao faaleafatausaga faatasi ai ma le au failauga ma musika na tofia e Peresitene Nelson i le mavae ai o masina o tapenaga. Na pau nei o faaopoopoga, o la’u faamatalaga tomua, ma lo’u lauga ai i le taimi o Peresitene Nelson i le sauniga faaiu i le aoauli o le Aso Sa.
O le uluai taimi lenei i le tusa ma le 75 tausaga, ua maliu ai se Peresitene o le Ekalesia i ni nai aso a o loma se konafesi aoao. Ua manaomia ai lo tatou fuafuaina o le ala e mafai ai ona faia fonotaga taua faaleautaitai e fesootai ma le konafesi aoao faapea foi sauniga masani o le konafesi, i le taimi lava e tasi e faatulaga ai lona falelauasiga i se taimi vave e mafai ai. Na malamalama Peresitene Nelson i le taua o le konafesi aoao e tuu atu ai le taitaiga i le Au Paia i masina a sau. Tatou te faamamalu ia te ia e ala i le mulimuli i le faasologa fuafuaina o le konafesi na ia faamaoniaina.
I le taimi lenei o le faanoanoa, ua maea ona faia se sauniga e saafiafi ai ia Peresitene Russell M. Nelson a o lei amataina a tatou sauniga o le konafesi aoao, ona faatulaga ai lea o lona falelauasiga i se taimi vave lava pe a maea le konafesi. Ua faia nei mea uma faatasi ai ma le faamaoniga a le aiga o Peresitene Nelson ma le Korama a le Toasefululua.
Talu ai o i tatou uma na tofia e lauga i le konafesi aoao e fia mananao e tuuto atu lo tatou taimi atofaina e saafi patino atu ai ia Peresitene Nelson, o lea ua matou talosagaina ai le au failauga uma o le konafesi ina ia matuai tuuitiitia na saafiafiga, ae tuu atu i le falelauasiga, lea ua amata ona fuafuaina.
O la’u lava saafiafiga puupuu—e talafeauga ma lenei konafesi ma saafiafiga ua uma ona tuuina atu—o lenei: Sa ou alofa ma fiafia ia Russell M. Nelson ma e tele atu mea na ou aoao mai e uiga i le talalelei ma le taitaiga o le talalelei mai i la ma’ua faigauo umi ma le mafutaga ma ia nai lo se isi lava taitai ua ou iloaina patino. O ia o lo tatou faaa’oa’o ma o se auauna ma se soo o le Alii o Iesu Keriso. Ou te molimau atu ai i nei mea, i le suafa o Iesu Keriso, amene.