Tauaveina o le Suafa o Iesu Keriso

I le 2018, i le Iunivesite o Iuta, sa fofoaina ai se tulaga faapolofesa faapitoa sa faaigoaina o le “Dr. Russell M. Nelson ma Dantzel W. Nelson o le Taitaifono Faaperesitene i Cardiothoracic Surgery [Taotoga o Fatu]”—cardio, o lona uiga o le “fatu,” ma le thoracic, lona uiga o le “fatafata.” Na faamamaluina ai le galuega taua a Peresitene Nelson o se fomai tipitipi o le fatu ma le lagolago sa ia mauaina mai lona faletua, ua tuumalo o Dantzel. O le tulaga faapolofesa sa totogiina i se tupe na fuafuaina ia āu i le lumanai. O le tagata na filifilia mo lea ituaiga o tulaga faapolofesa taua e mauaina le faailoaga aloaia, lagolago i le totogi, ma tupe mo suesuega.

O le uluai fomai tipitipi na filifilia e umia le tulaga faapolofesa o Dr. Craig H. Selzman, o se fomai tomai o le fatu e le o se tasi o la tatou ekalesia. I le sauniga e tauaaoina ai lenei tulaga faapolofesa ia Dr. Selzman, e toatele malo taua sa auai ai, e aofia ai Peresitene Nelson ma lona faletua o Sister Wendy W. Nelson. I le taimi o le sauniga, sa saunoa ai ma le tauagafau Peresitene Nelson i le amataga o lana matata mo taotoga.

Ona faasoa ai lea e Dr. Selzman le uiga ia te ia o le tofia ai i lenei tulaga faapolofesa. Sa ia faamatala faapea i le fa aso na muamua atu, i le mavae ai o se aso umi i le potu tipitipi, sa ia iloa ai e i ai se ma’i na moomia ona toe faia se taotoga. Sa vaivai o ia ma lē fiafia, i le iloa o le a tatau ona ia toe faaalu se isi po i le falemai.

O lea afiafi, sa faia ai e Dr. Selzman se talanoaga suia olaga ma ia lava. I le taimi lea, sa ia mafaufau: “O le Aso Faraile, o le a tofia ai a’u i se tulaga faapolofesa ua faaigoa ia Dr. Nelson. Sa iloa o ia i taimi uma o se tasi e pulea ona lagona, taulima tagata uma ma le faaaloalo, ma e le itaitagofie lava. Ona o lea o le a soota’i lo’u igoa i lona [igoa], ua tatau ona ou taumafai ia avea atili e pei o ia.” Ua leva ona avea Dr. Selzman ma se fomai tipitipi magafagafa. Ae sa ia manao ia lelei atili atu.

I le taimi ua tuanai, atonu sa nofouta lana ‘au tipitipi i lona vaivai ma faagaulemalie ona masalo sa ia faaalia i ona uiga ma lona leo. Ae i le potu tipitipi i lena po, sa faia ai e Dr. Selzman se taumafaiga faautauta ina ia faapitoa lona lagolago ma le malamalama i lana ‘au. Sa ia lagonaina na faia ai se eseesega ma tonu ai e faaauau ona taumafai ia atili ai ona pei o Dr. Nelson.

Lima tausaga mulimuli ane, sa foai atu ai e Peresitene Nelson ana pepa faapolofesa i le Iunivesite o Iuta. Na malaga mai malo faaaloalogia mai le iunivesite e faafetai aloaia ia Peresitene Nelson. I le taimi o lea faamoemoe, na toe saunoa ai Dr. Selzman. I le ta’ua ai o mataitusi amata o suafa o Peresitene Nelson, RMN na ia saunoa ai, “E i ai se aganuu ‘RMN’ ua manogi sasala nei i le Vaega o le Taotoga o Fatu i le Iunivesite o Iuta.”

I tulaga faagaulemalie na faamatala ai e Dr. Selzman: “Ua ou faia le mea lea ua tatou aoao atu nei i tagata o tatou tolenia e fai—tulimatai, faapasi, ma fai le mea sili e te mafai. Ua ola lenei aganuu ia i matou i aso uma. Matou te tuu atu pine o igoa i tagata uma i le matagaluega ma tagata fou taitasi o loo aoaoina. I le pito i lalo o le pine o i ai mataitusi ‘RMN’ O le aganuu RMN o le faavae i a matou aoaoga faamasani; matou te aoao atu i tagata uma.” Ua faaleleia e Dr. Selzma ma le loto i ai ona uiga faaalia na i ai muamua ma famoemoega ona ua soota’i nei lona igoa i le suafa o Peresitene Nelson.

O lea soloa’iga o mea na tutupu na aofia ai Dr. Selzman na mafua ai ona ou fesili ifo ia te au lava: “Na faapefea ona ou suia talu ona soota’i lo’u igoa i le suafa o Iesu Keriso? Pe na ou faaaogaina se aganuu faaKeriso o se taunuuga? Pe sa ou taumafai ma le faamaoni ia lelei atili ma ia pei o Ia?”

I le aafiaga o Dr. Selzman, ua mafai ai ona tatou vaaia pe ā ma le lima faatusatusaga ia tatou te tauaveina ai i o tatou lava luga le suafa o Iesu Keriso. E ui o lena faagasologa e amata i le papatisoga, e le mae’a sei vagana ai ua tatou mamā atili ma paia ma avea atili e pei o Ia.

O le faatusatusaga muamua o le faailoaga. O le tofiga o Dr. Selzman i le tulaga faapolofesa o Nelson e soota’i ai lona igoa i le igoa o Peresitene Nelson, ma sa amata ai e Dr. Selzman ona faailoa faatasi ma Peresitene Nelson. A tatou tauaveina i o tatou lava luga le suafa o Iesu Keriso, ua tatou soota’ia o tatou igoa i Lona [suafa]. Ua tatou faailoa faatasi ma Ia. Ua tatou avea fiafia o ni Kerisiano. Tatou te faailoaina le Faaola ma tutu atu ma le lotototoa e faitaulia o ni Ana.

E fesootai vavalalata i le faailoaga ia se isi faatusatusaga o le—manatuaina. A alu Dr. Selzman i lona ofisa, e tosina ona mata i le pine na ia maua ina ua tofia o ia i le tulaga faapolofesa o le Nelson. O lenei pine e faamanatu atu ai ia te ia i aso taitasi le aganuu RMN. Mo i tatou o le aai ma feinu i le faamanatuga i vaiaso taitasi e fesoasoani tatou te manatua ai Iesu Keriso i le vaiaso atoa. A o tatou aai ma feinu i le faamanatuga, tatou te faia e manatua ai le tau na Ia totogia ina ia togiolaina i tatou. Tatou te toe osifeagaiga e manatua o Ia, faailoa Lona silisiliese, ma talisapaia Lona agalelei. Tatou te saga faailoaina ai ua na o Lona alofa tunoa lava e faasaoina ai i tatou mai le oti faaletino ma le faaleagaga.

O le manatuaina o lona uiga ua tatou mulimuli i le fautuaga na tuuina mai e Alema le perofeta o le Tusi a Mamona. Tatou te “tuu atu a [tatou] mea uma i le Alii, ma soo se mea [tatou te] o i ai ia tuu atu i le Alii; … ia tuu atu o [tatou] manatu uma i le Alii … ma ia tuu atu [o tatou] alofaaga uma [o o tatou loto] i le Alii e faavavau.” E tusa lava foi pe a tatou nopiai i isi mataupu, e tumau lava lo tatou mafaufau ia te Ia, pei lava ona tatou manatua o tatou lava igoa, tusa lava pe o a isi mea tatou te taulai i ai.

O se taunuuga o le manatuaina o mea na faia e le Faaola mo i tatou o se faatusatusaga lona tolu—faaa’oa’o. Sa amata e Dr. Selzman ona faaa’oa’o ia Peresitene Nelson ma le aganuu RMN. Ua ou talitonu o le aganuu a Peresitene Nelson ua na o se faailoaga o lona avea ma soo o Iesu Keriso i lona soifuaga atoa. Mo i tatou, o le tele ona tatou faailoa faatasi ma ia ma manatua Iesu Keriso, o le tele foi lea o lo tatou mananao ia avea e pei o Ia. I le avea ai ma Ona soo, tatou te suia mo le mea sili atu pe a tatou tulimatai atu ia te Ia, e sili atu nai lo lo tatou taulai ia i tatou lava. Tatou te tauivi ia avea e pei o Ia ma saili ina ia faamanuiaina i Ona uiga faaleatua. Tatou te tatalo faatauanau ia faatutumuina i le alofa moni, le alofa mama o Keriso.

E pei ona sa aoao mai e Peresitene Nelson ia Aperila: “A o avea le alofa mamā o se vaega o lo tatou natura, o le a mou ese mai ia i tatou le naunauga e tuumaualaloina isi. O le a tatou le toe faamasinoina isi. O le a tatou maua le alofa mamā mo soo se ituaiga o tagata. O le alofa mamā i tagata uma … e taua mo lo tatou alualu i luma. O le alofa mamā o le faavae o se uiga faaleatua.” Faatasi ai ma le alofa mama, tatou te saili e, ”atia’e, … ma faalautele” isi meaalofa faaleagaga mai le Faaola, e aofia ai le amiosa’o, onosai, ma le filiga.

O le faaa’oa’o ia Iesu Keriso e taitai atu ai i tatou i se faatusatusaga lona fa—faaogatusa ma Ona faamoemoega. Tatou te auaifaatasi ma Ia i Lana galuega. I le avea ai o se fomai tipitipi, o Dr. Nelson sa lauiloa o se faiaoga, se fomai, ma se tagata suesue. O le pine o le igoa sa faaaoga i le matagaluega a Dr. Selzman o loo faamamafa ai nei taumafaiga, e tino mai ai upu o le aoao atu, faamalolo, ma le iloa ai. Mo i tatou, o se vaega o le tauaveina i o tatou lava luga le suafa o Iesu Keriso e aofia ai le faaogatusaina ma le loto i ai, faamoemoe, ma le naunautai o a tatou sini ma Ana. Tatou te auai faatasi ma Ia i Lana galuega pe a tatou “alofa, faasoa, ma valaaulia.” Tatou te auai faatasi ma Ia i Lana galuega, pe a tatou auauna atu i isi, aemaise i latou ua agavaivai ma i latou na faamanualia, nutimomoia, ma olopalaina e o latou aafiaga faalelalolagi.

Tatou te tauaveina atoatoa la i o tatou lava luga le suafa o Iesu Keriso e ala i le faailoaga, manatuaina, faaa’oa’o, ma faaogatusaina. O le faia o nei mea e fa e taitai atu ai tatou i se faatusatusaga lona lima—faamanaina. Tatou te maua le mana ma faamanuiaga a le Atua i o tatou olaga. O le tulaga faapolofesa o le Nelson ua maua ai e Dr. Selzman le faailoaga ma tupe e lagolago ai, o loo ia faaaogaina e suia ai le aganuu i lana matagaluega. Na te faaaogaina lenei “faamanuiaga o le mana” e fesoasoani ai i isi. I se ala foi faapena, a tatou tauaveina i o tatou lava luga le suafa o le Faaola, e faamanuiaina e lo tatou Tama Faalelagi i tatou i Lona mana e fesoasoani ai tatou te faataunuuina la tatou misiona i le olaga nei.

A o tatou osia feagaiga faaopoopo ma le Atua, tatou te tauaveina atili ma le atoatoa i o tatou lava luga le suafa o Iesu Keriso. O lea la, ua faamanuiaina i tatou e le Atua i le tele o Lona mana. Pei ona sa aoao mai Peresitene Nelson, “O tagata taitoatasi e osia feagaiga i vai papatiso ma i totonu o malumalu—ma tausi i ai—ua ia faateleina le avanoa e maua ai le mana o Iesu Keriso. … O le taui mo le tausiga o feagaiga ma le Atua, o le mana faalelagi—lea e faamalosia ai i tatou e tetee atili atu ai i o tatou tofotofoga, faaosoosoga, ma lototiga.”

Ua atili ai ona tatou taliagofie faaleagaga. E tele atu lo tatou lotototoa e faafetaiaia ai tulaga e foliga e le mafai. E faamalolosia atili i tatou i a tatou faaiuga e mulimuli ia Iesu Keriso. E faanatinati atili ona tatou salamo ma toefoi atu ia te Ia pe a tatou solitulafono. E oo ina sili atu lo tatou faasoa atu o Lana talalelei i Lona mana ma le pule. Tatou te fesoasoani ia i latou e le tagolima ae ia faaitiitia le faamasinosino. E faatumauina se faamagaloga o a tatou agasala. E sili atu lo tatou filemu, ma e sili atu ona tatou fiafia aua e mafai ona tatou olioli i taimi uma. O le a siomia i tatou i Lona mamalu, ma o le a tausia i tatou e Ana agelu.

Ua valaaulia i tatou e le Faaola “O mai i le Tama i lo’u igoa, ma mauaina lona atoaga i le taimi e tatau ai.” Ou te uunaia outou ia faia lenei mea. O mai i lo tatou Tama Faalelagi. Ave i ou lava luga le suafa o Iesu Keriso. Faailoa faatasi ma Ia. Manatua pea o Ia. Tauivi e avea e pei o Ia. Auai faatasi ma Ia i Lana galuega. Maua Lona mana ma faamanuiaga i lou olaga. Tamau Lona suafa i lou loto, ma le naunautai ma le faamoemoe. O lea mea e tuu atu ai ia te oe e “tu” i luma o le Atua ma faaagavaaina ai oe e avea le Faaola ma ou faufautua. O le a avea oe o se suli faaeaina i le malo o lo tatou Tama i le Lagi, o se suli-faatasi ma Lana Ulumatua, lo tatou Faaola ma le Togiola alofa.

O loo soifua o Ia. Ua ou matuai iloaina. E alofa o Ia ia te oe. Na Ia foai mai Lona soifua mo oe. Ua augani mai o Ia ia te oe ia sau i le Tama e ala ia te Ia. I le suafa o Iesu Keriso, amene.