Faigofie ia Keriso

I le tolusefulutolu tausaga talu ai, sa ou maua ai lo’u valaauga o se faifeautalai i le Misiona a Iuta Ogden. Ioe, o le sau mai Europa, o nisi o agaifanua i le lotoifale i Iuta e pei o le “sieli-ma karoti” ma “ipu pateta e salagi i le konafeleki”sa fai si ese ia te a’u!

Peitai, sa ou matuai ootia i le tuuto ma le tulaga faalesoo o le toatele o le Au Paia, o le numera manino o tagata e auai i sauniga Faalelotu, ma le fua o polokalama faatino a le Ekalesia. Ina ua uma la’u misiona, sa ou manao ia mautinoa le olioli na ou lagonaina ma le malosi ma le matua faaleagaga sa ou matauina o le a i ai foi mo lo’u aiga i le lumanai. Sa ou naunau e toefoi vave e ola i “atalafoia o mauga o le vavau“

Peitai, sa ese fuafuaga a le Alii. I lo’u uluai Aso Sa i le fale, sa tofia au e lo’u epikopo atamai e auauna o se peresitene o Alii Talavou i le matou uarota. O le auauna ai i lenei vaega ofoofogia o alii talavou, sa vave ona ou aoaoina faapea o le olioli e sau mai le avea ma soo o Keriso, e itiiti se sootaga i le toalaiti po o le toatele o sauniga a le Ekalesia po o le fua o polokalama.

Ina ua ou faaipoipo la i lo’u toalua lalelei o Makareta, sa tonu ia i ma’ua ma le fiafia e nonofo i Europa ma atiae lo ma aiga i lo matou atunuu moni o Siamani. Na ma taufai molimauina ai le mea na aoao mai e Peresitene Russell M. Nelson i le tele o tausaga ua mavae: “O le olioli o tatou lagonaina e itiiti lava se mea e faatatau i tulaga o tatou olaga ao mea uma o loo faatatau i le taulaiga o o tatou olaga.” A tuu le taulai o o tatou olaga ia Keriso ma le savali o Lana talalelei, e mafai ona tatou maua faamanuiaga atoatoa o le avea ma soo i soo se mea tatou te ola ai.

Peitai, i se lalolagi ua faateleina le faasalemausau, lavelave, ma le fenumiai, i savali ma manaoga eseese ua tele ina feteenai, e mafai faapefea ona aloese o tatou mata mai le faatauasoina, ma le faamaaaina o o tatou loto ma tumau ona taulai i “mea manino ma le taua” o le talalelei a Iesu Keriso? I se taimi o le fememea’i, na tuu atu ai e le Aposetolo o Paulo se fautuaga sili i le Au Paia o Korinito e ala i le faamanatu ia i latou e taulai i “le faigofie o loo ia Keriso.”

O le aoaoga faavae a Keriso ma le tulafono o le talalelei e faigofie tele e oo lava i tamaiti laiti e mafai ona malamalama ai. E mafai ona tatou maua le mana togiola o Iesu Keriso ma maua faamanuiaga faaleagaga uma na saunia e lo tatou Tama Faalelagi mo i tatou i le faaaogaina o le faatuatua ia Iesu Keriso, salamo, papatisoina, ma faapaiaina e ala i le meaalofa o le Agaga Paia, ma tumau e oo i le iuga. Na matuai matagofie le faamatalaina e Peresitene Nelson o lenei malaga o le “ala o feagaiga” ma le faagasologa o le avea o se “soo tuuto o Iesu Keriso.”

Afai ua matuai faigofie tele lenei savali, aisea e tele ai ina lagona le faigata tele ona ola i tulafono a Keriso ma mulimuli i Lana faataitaiga? Atonu ua sese ona tatou faaliliuina le faigofie o se mea e faigofie ona ausia e aunoa ma se taumafaiga po o le filiga. O le mulimuli ia Keriso e moomia ai taumafaiga e le aunoa ma suiga faifai pea. E moomia ona tatou “[tuu] ese le tagata natura ae … [avea faapei o se] tamaitiiti.” E aofia ai i lea mea lo tatou “faalagolago i le Alii” ae lafoai le lavelave, pei lava ona faia e tamaiti laiti. O le faaaogaina o le aoaoga faavae a Keriso i se ala faigofie ma le tulimata’i, o le a fesoasoani tatou te maua ai le olioli i o tatou olaga i aso taitasi, aumaia le taitaiga i o tatou valaauga, tali nisi o fesili e sili ona lavelave o le olaga, ma maua ai le malosiaga e feagai ai ma o tatou luitau silisili.

Ae e mafai faapefea ona tatou faatinoina lenei faigofie i la tatou malaga umi o le olaga o ni soo o Keriso? Na faamanatu mai e Peresitene Nelson ia i tatou ia tulimata’i atu i “upumoni mamā, aoaoga faavae mamā, ma faaaliga mamā” a o tatou saili e mulimuli i le Faaola. O le fesili e le aunoa, “O le a se mea o le a finagalo le Alii o Iesu Keriso ou te faia?” e faaali mai ai taitaiga o’oo’o. O le mulimuli i Lana faataitaiga e tuuina mai ai se ala saogalemu e ui ai i le le mautonu ma se aao agaalofa, taiala e pipii i ai mai lea aso i lea aso. O Ia o le Alii o le Filemu ma o le Leoleo Mamoe Lelei. O Ia o lo tatou Fesoasoani ma le Faaola. O Ia o lo tatou Papa ma le Malutaga. O Ia o se Uo—lau uo ma la’u uo! Ua Ia valaaulia i tatou uma ia alofa i le Atua, tausi Ana poloaiga, ma alofa i o tatou tuaoi.

A tatou filifili e mulimuli i Lana faataitaiga ma agai i luma ma le faatuatua ia Keriso, talia le mana o Lana Togiola, ma manatua a tatou feagaiga, e faatumulia o tatou loto i le alofa, e siitia e le faamoemoe ma le faamalologa o tatou agaga, ma suia le inoino e le lotofaafetai ma le onosai e faatalitali ai mo faamanuiaga folafolaina. E i ai taimi, e ono moomia ai lo tatou faataumamao mai o i tatou lava mai se tulaga e le manuia, pe saili se fesoasoani faapolofesa. Ae i tulaga uma lava, o le faaaogaina o mataupu faavae faigofie o le talalelei o le a fesoasoani tatou te faatautaia luitau o le olaga i le ala a le Alii.

Tatou te manatu faatauvaa i nisi taimi i le malosi tatou te maua mai faatinoga faigofie e pei o le tatalo, anapogi, suesueina o tusitusiga paia, salamo i aso taitasi, aai ma feinu i le faamanatuga i vaiaso taitasi, ma le auai e le aunoa i le maota o le Alii. Ae a tatou iloa e le moomia ona tatou “faia ni mea tetele” ae faatotonugalemu i tatou lava i le faaaogaina o aoaoga faavae autu mama ma le faigofie, ona amata lea ona tatou vaai i le ala e “galue matagofie” ai le talalelei mo i tatou, e oo lava i tulaga e sili ona faigata. Tatou te maua le malosi ma le “talitonu mautinoa i luma o le Atua,” e tusa lava pe tatou te oo i le lototiga. Ua faamanatu mai ia i tatou e Elder M. Russell Ballard i le tele o taimi, “O totonu o lena faigofie [tatou] te maua ai le … filemu, olioli, ma le fiafia.”

O le faaaoga o le faigofie o loo ia Keriso, tatou te faamuamua ai tagata i lo faagasologa ma sootaga faavavau i lo amioga faataimi-pupuu. Tatou te taulai i “mea e sili ona taua” i le galuega a le Atua mo le faaolataga ma le faaeaga nai lo le pa’ulia i le pulea o a tatou auaunaga. Tatou te faasaolotoina i tatou lava e faamuamua mea e mafai ona tatou faia nai lo le lofituina i mea e le mafai ona tatou faia. Na faamanatu mai e le Alii ia i tatou: “O le mea lea, aua le faavaivai i le faia o mea lelei, ona o lo o oulua faataatiaina le faavae o se galuega tele. Ma e mai mea iti e tutupu mai ai mea tetele.” Oka se faamalosiauga mamana e galulue i le faigofie ma le lotomaualalo, pe o a lava tulaga o tatou i ai.

O lo’u tinamatua o Marta Cziesla o se faataitaiga matagofie o le faia o “mea iti ma le faigofie” e faataunuu ai mea tetele. Matou te faaigoaina ma le meloalofa o ia o Oma Cziesla. Sa talia e Oma le talalelei i le tamai nuu o Selbongen i Prussia Sasae faatasi ma le tina o lo’u tinamatua i le aso 30 Me, 1926.

Marta Cziesla (taumatau) i le aso o lona paptisoga.

Sa alofa o ia i le Alii ma Lana talalelei ma sa naunau e tausi feagaiga sa ia osia. I le 1930 sa faaipoipo o ia i lo’u tamamatua, sa le o ia o se tagata o le Ekalesia. I le taimi lea, na oo ina le mafai e Oma ona alu i sauniga Lotu, ona e tele itula le mamao o le faatoaga a lo’u tamamatua mai le aulotu na aupito lata ane. Ae sa taulai o ia i le mea sa mafai ona ia faia. Sa tatalo pea Oma, faitau tusitusiga paia, ma usu pese o Siona.

Atonu na manatu nisi tagata ua le o toe malosi i lona faatuatuaga, ae sa matuai le sa’o lena tala. Ina ua fananau mai lo’u tamā ma lona tuafafine, sa leai se perisitua i le aiga leai ni sauniga Lotu ma leai ni sauniga na lata ane, sa ia toe faia foi le mea sa mafai ona ia faia, ma taulai i le aoaoina o lana fanau “e tatalo, ma ia savavali sa’o i luma o le Alii.” E faitau atu o ia ia te i la’ua mai tusitusiga paia, latou te usuina pese o Siona, ma tatalo ma i la’ua—i aso uma. O se aafiaga e 100 pasene le faatotonugalemu o le Ekalesia i le aiga.

I le 1945, sa tautua ai lo’u tamamatua i le taua e mamao ese mai le aiga. Ina ua latalata ane fili i lo latou faatoaga, sa ave e Oma lana fanau laiti e toalua ae tuua le faatoaga pele ae saili le sulufaiga i se nofoaga e sili ona malu. I le mavae ai o se malaga faigata ma le taufaamata’u, sa iu ina latou maua le sulufaiga ia Me o le 1945 i Siamani i matu. Sa leai se mea na totoe vagana ai ofu i o latou tino. Ae sa faaauau pea Oma i le mea sa mafai ona ia faia: sa ia tatalo faatasi ma lana fanau—i aso uma. Sa ia usuina faatasi ma i latou pese a Siona sa ia taulotoina i le loto—i aso uma.

Sa matuai faigata le olaga, ma mo le tele o tausaga sa na ona taulai atu i le faamautinoa e i ai meaai i luga o le laulau. Ae i le 1955, i le taimi o 17 tausaga o lo’u tamā, sa alu ai o ia i le aoga faalematātā i le aai o Rendsburg. Sa ia pasia se fale ma vaaia ai sina faaupuga laitiiti i fafo sa faitauina “Kirche Jesu Christi der Heiligen der Letzten Tage”—“O Le Ekalesia a Iesu Keriso o le Au Paia o Aso e Gata Ai.” Sa ia manatu, “E malie: o le lotu lea a Tinā.” O lea, ina ua sau i le fale, sa ia ta’u atu ia Oma na ia maua lana lotu.

E mafai ona e vaai faalemafaufau i ona lagona i le mavae ai o le toetoe 25 tausaga o leai se fesootaiga ma le Ekalesia. Sa filimaoti o ia e alu i le Aso Sa na sosoo ai ma tauanau lo’u tamā la te o. O Rendsburg sa silia ma le 20 maila (32 km) le mamao mai le tama’i nuu sa latou nonofo ai. Ae o le a le avea lea ma mea e taofia ai Oma mai le alu i le lotu. O le Aso Sa na sosoo ai, sa tulioso ai ma lo’u tamā i lana uila ma tietie loa i le lotu.

Ina ua amata le sauniga faamanatuga, sa nofo lo’u tamā i le laina nofoa pito i tua, ma le faamoemoe ia vave ona uma. O le lotu lea a Oma ae le o sana. Sa le’i faamalosiau le mea na ia vaaia: sa na o ni nai olomatutua na auai ma faifeautalai talavou e toalua sa faatinoina ma le manuia mea uma i le sauniga. Ona amata lea ona latou pepese, ma sa latou usuina pese o Siona lea na faalogo i ai lo’u tamā a o laitiiti: “Omai, Omai, Omai, Outou le Au Paia,” “Lo’u Tama e,” “Viia Le na Fetaiai ma Ieova.” O le faalogo atu i lenei lafu laitiiti o usuina pese sa ia iloaina talu lona laitiiti na tuia ai lona loto, ma sa ia iloaina vave e aunoa ma se masalosalo e moni le Ekalesia.

O le uluai sauniga faamanatuga na auai ai lo’u tinamatua i le mavae ai o le 25 tausaga, o le sauniga lea na maua ai e lo’u tamā se faamautinoaga patino i le moni o le talalelei toefuataiina a Iesu Keriso. Na papatiso o ia i le tolu vaiaso mulimuli ane i le aso 25 Setema, 1955, faatasi ai ma lo’u tamāmatua ma lona tuafafine.

Ua silia ma le 70 tausaga talu mai lena sauniga faamanatuga toalaiti i Rendsburg. E tele ina ou mafaufau ia Oma, pe o ā ona lagona i na po tuuatoatasi, ma faia mea iti ma faigofie sa mafai ona ia faia, e pei o le tatalo, faitau, ma usu pese. A o ou tu atu iinei i le aso i le konafesi aoao ma talanoa atu e uiga i la’u Oma, o lona naunautai e tausia ana feagaiga ma faalagolago i le Alii e ui i ana tauiviga, ua faatumulia ai lo’u loto i le lotomaualalo ma le faafetai—e le gata mo ia ae o le anoanoai o a tatou Au Paia ofoofogia i le lalolagi atoa o e o loo taulai i le faigofie ia Keriso i o latou tulaga luitauina, atonu e itiiti se suiga ua vaaia nei, ae talitonu o le a oo mai mea tetele i se aso i le lumanai.

Na ou aoaoina mai o’u lava aafiaga o mea iti ma faigofie o le talalelei ma le taulai atu ma le faamaoni ia Keriso, e taitai atu ai i tatou i le olioli moni, e aumaia ai vavega tetele, ma tatou maua ai le talitonuga mautinoa o le a faataunuuina uma faamanuiaga folafolaina. E moni lenei mea mo outou ma e moni foi mo au. I upu a Elder Jeffrey R Holland, “E vave oo mai nisi faamanuiaga, o nisi e tuai, o nisi e le oo mai vagana le lagi; ae mo i latou e taliaina le talalelei a Iesu Keriso, e oo mai lava.” Ou te molimau atu ai foi i nei mea, i le suafa o Iesu Keriso, amene.