Manatuaina o Mamoe

O Keriso o le Leoleo Mamoe Lelei. E taua mamoe taitasi o le lafu ia te Ia. Sa Ia faapupula maia le mamanu e auauna atu ai, ma sa aoao mai ai i tatou e ala i le upu ma galuega uiga auaumama o se leoleo mamoe lelei, e aofia ai le iloa o au mamoe i o latou igoa, alofa ia i latou, saili o i latou ua leiloloa, fafaga, ma taualuga ai i le toe taitai mai o i latou i le aiga. Ua faamoemoe mai o Ia tatou te faia foi lea mea e tasi o ni Ana leoleo mamoe lagolago.

E mafai ona tatou aoaoina le tele o mea e uiga i le auauna atu i le ala a le Alii, mai le perofeta anamua—ma le leoleo mamoe tulaga ese o—Moronae. Sa soifua o ia i taimi faigata tele, sa leai ni telefoni feaveai, komepiuta, ma le initoneti. Ae sa mafai ona ia manatua ma iloa mamoe. Na faapefea ona fai lenei mea? Tatou te maua sina vaaiga i lana metotia i le Moronae 6. O iina tatou te faitau ai “sa faitauina [tagata o le ekalesia] i totonu o tagata o le ekalesia a Keriso; ma sa ave o latou igoa, ina ia manatua i latou ma tausia i le afioga lelei a le Atua, e faatutumau ai i latou i le ala sa’o. … Sa potopoto soo faatasi le ekalesia, e anapopogi ma tatalo, ma talatalanoa o le tasi i le tasi, e uiga i le soifua manuia o o latou agaga” (Moronae 6:4–5; faaopoopo le faamamafa).

Mo Moronae, sa faatatau mea uma i tagata—igoa! Sa ia faaaogaina le mataupu faavae o le faitau ma faamaumau ina ia mafai ai ona ia manatuaina uma. Ma na matauina foi ē na tautevateva pe na miomiō, ma faatagaina ai le Au Paia e talanoaina lo latou soifua manuia i aufono. E faapei o le leoleo mamoe na tuua le ivasefuluiva (o saogalemu ma malupuipuia, ua ou mautinoa) ae alu e su’e le tasi ua leiloa, (tagai i le Luka 15:4–7), ua talosagaina i tatou ia tau lava ina iloa a tatou lafu—ia matau ma manatua ma ia faapea ona o ma fai.

I le avea ai o se taitai misiona i Initia, ou te manatua le fesili atu i se peresitene talavou o se paranesi e uiga i nisi o ana sini mo le tausaga a sau: “E toafia ni alii o le a e tapenaina e maua le Perisitua Mekisateko?” O le tali vave mai e “Fitu!”

Sa ou tau mānātu pe o fea se vaipanoa na ia aumaia ai lena numera matuai ma’oti! A o lei mafai ona ou tali atu, sa ia tuu maia se fasipepa o tusi faasolo ai i lalo le numera tasi e oo i le fitu. O laina muamua e lima sa i ai igoa—o tagata moni o le a latou valaauina ma lana korama a toeaina ma faamalosiau i ai, ia maua faamanuiaga o le perisitua i o latou olaga. Ioe, e tatau ona ou fesili i ai e uiga i laina ono ma le fitu sa avanoa. “Oi, Peresitene,” sa ia fai mai ai, ma lulu lona ulu ma le faanoanoa, “e mautinoa lava o le a matou papatisoina pe a ma le toalua alii i le aso muamua o le tausaga, o e e mafai ona maua le perisitua i le faaiuga o le tausaga.” Na malamalama lenei taitai maoae i le mataupu faavae o le faitau ma faamaumau.

Sa faatulaga e Keriso Lana Ekalesia i se ala ia faigata ai ona galo se agaga, aua e pele i tatou taitoatasi ia te Ia. O tagata taitasi i se uarota, po o le a le matua po o le itupa, ua i ai tausimea e toatele—o leoleo mamoe—ua i ai tiute o le vaavaaia o i latou, ma ia manatuaina. Mo se faitaitaiga, sa i ai se alii talavou, ua tofia mo lona soifua manuia se au epikopo, uso a auaunaga, faufautua matutua o le autalavou, faiaoga o le seminare, au peresitene o korama, faapea ma nisi—e galulue uma o ni upega o le saogalemu, ua noa mau faatasi i lalo ifo o lena talavou e sapo o ia pe afai e pa’ū. E tusa pe na o le tasi le upega e faatulaga lelei, o le a saogalemu, matauina, ma manatuaina lena alii talavou. Ae peitai, e tele ina tatou maua e leai se upega o faatulagaina lelei. E savavali ese tagata i le puao—ma e leai se isi o matauina. E mafai faapefea ona avea i tatou o ni leoleo mamaoe lelei atu? E mafai ona tatou aoao e faitau ma faamaumau.

Ua saunia mo i tatou e le Ekalesia ia lipoti ma meafaigaluega e fai ai le mea tonu lena—ia manatua. O le Lipoti Faalekuata o se faataitaiga autu lena. E mafai ai ona tatou faitaua ma faamaumau mo tagata taitoatasi i ni taimi se tele, ma matau ai i latou e misi pe manaomia le tatou fesoasoani ma lo tatou alofa. O le Lisi o Faatinoga ma Faatalanoaga e faailoa mai ai i latou e manaomia la tatou gauai i ai i le taimi nei, faapena foi le lipoti o Tulaga o Pepa Faataga o le Malumalu ma isi. O nei meafaigaluega mo le faitauina ma le faamaumauina e taulai atu ai tatou i tagata. O ai e manaomia se valaauga, se siitaga o le perisitua, po o se fesoasoani e ave se igoa o se tauaiga i le malumalu? O ai e mafai ona tatou fesoasoani i ai ia saunia mo se misiona talai? O ai na misi i lenei masina? E fesoasoani nei meafaigaluega tatou te manatua ai tagata.

Sa ou iloa se aiga mai le Iunaite Setete na talia se tofiga i Aferika. I lo latou uluai Aso Sa, sa latou savavali atu i le iunite e tasi o le Ekalesia i le atunuu, lea sa faafeiloaia ai i latou ma le naunautai. E oo ane i le faaiuga o le taeao, ua tofia le faletua o le alii e avea ma peresitene o le Aualofa ae avea o ia ma taitai o Alii Talavou! Sa ia fesili atu i se peresitene o le paranesi foliga lēlavā pe toafia ni alii talavou na i ai. Sa tusi atu le lima o lenei taitai faamaoni, o le tupulaga muamua, i tua o le potu o le faamanatuga ma fai mai, “Le toalua la e tuu mai o.” Sa alagatatau le le talitonu o le tamaloa, o lea sa ia alu ai ma ave se lisi o le paranesi i le fale, ma sa vave ona ia iloa ai e toa 20 moni alii talavou i le lisi. Sa ia toefoi i le peresitene o le paranesi ma fesili i ai mo ni talavou matutua malolosi, e tautatala i gagana e lua e fai ma ona fesoasoani, ona latou saofafai lea ma i la’ua ma tama e toalua e iloilo igoa.

Ona galulue loa lea ma le filiga nei tagata talavou. I le aluga o masina na sosoo ai, na latou mauaina alii uma na lisiina. Na ala i lea igoa ma lea igoa, na toe talileleia ai na mamoe na sē e a latou paaga ma fafagaina faaleagaga ma le faaletino! I totonu o se tausaga, i soo se Aso Sa, sa 21 le averesi o alii talavou na auai ai. Faafetai mo alii talavou o e na faitauina ma faamaumauina.

O sa’u uo pele, o se alii talavou a’oga ua faauu, na masii atu ma lona aiga i se aai tele i Amerika e faaauau ai ana a’oga. Sa vave tofia o ia e pulefaamalumalu i le korama a toeaina. I si ona popole i lana uluai faatalanoaga ma le peresitene o le siteki, sa ia filima’oti ai e alu e sauniuni. Sa ia ta’u atu i le peresitene o le siteki e tolu ana sini mo le tausaga a sau: (1) 90 pasene le auaunaga, (2) se lesona taua ma le anoa i vaiaso taitasi, ma le (3) se gaoioiga saunia lelei a le korama i masina taitasi.

A o ataata atu i lau u’o, sa fesili atu lenei peresitene atamai o le siteki, “E mafai ona e ta’u mai se igoa o se tagata o le korama e le o toaga mai e mafai ona e fesoasoani ia oo atu i le malumalu ma lona aiga i le tausaga lenei?” O lena mea na te’i ai la’u uo. Sa ia mafaufau toto’a ma maua ai se igoa. “Tusi i lalo,” sa faatonu atu ai le peresitene o le siteki Ona toe fai atu faatolu lea e lenei taitai potomasani lea lava fesili e tasi—ona uma ai lea o le faatalanoaga. Sa savali i fafo lenei alii talavou mai lena faatalanoaga ua aoaoina se tasi o ana lesona aupito maoae e uiga i tulaga faaleautaitai ma le auaunaga. Sa alu atu o ia i le faatalanoaga ma polokalama, lesona, ma gaoioiga. Ae na savali mai o ia i fafo ma ni igoa! O na igoa e fa na iu ina avea o se taulaiga autu o lana auaunaga ma lana korama.

I le avea ai o se taitai misiona, sa ou asiasi ai i se tasi o a’u paranesi i le taeao o se tasi Aso Sa. Sa ou matauina le tago soo o le peresitene o le paranesi ma aveane se kata mai lana taga ma tusitusi ai. Sa tonu ou te fesili i ai e uiga i lena mea pe a uma le tatalo faaiu. Na uma loa lava le sauniga, ma a o lei mafai ona ou fesili i ai e uiga i le kata, sa nanati mai le taitai misiona o le paranesi i le pulelaa lea na tuu atu i ai le pepa. Sa vave ona ou mulimuli atu i lenei taitai naunautai i lana fonotaga faamaopoopo faalevaiaso a faifeautalai o le paranesi. A o lei amata, sa ia aumai i fafo le pepa mai lana taga. Sa tumu i igoa o tagata o le au paia sa lei auai i le sauniga faamanatuga. I ni nai minute, sa tofu filifilia e tagata taitasi o le aufono se igoa pe lua, ma tautino e asia i latou i lena lava aso ia mautinoa o la e seki ma faailoa i ai na misia lava i latou. Ia o le faitauina lena ma le faamaumauina.

Ou te manatua se itu, e tele itula e malaga ai i se vaalele mai le malumalu pito i lata ane, lea sa avea ai le tausisia o se pepa faataga aoga o se faamuamua maualuga, e ui lava i le mea moni e faapea, atonu o le a le faaaogaina lava. O Aso Sa muamua o masina taitasi, sa faaaoga ai e taitai a latou meafaigaluega e faitau ai e faamaumau ai o latou tagata ua maua faaeega paia. A latou maua se pepa faataga e le o mamao ona uma lea o le aogā, o le a faatulaga e le failautusi faapitoa se aso o le faatalanoaga e faafou ai. O tagata na uma le aoga o pepa faataga sa fautuaina, ona latou saili lea e fesoasoani ia i latou e toefoi i le ala o feagaiga. Sa ou fesili pe toafia o latou tagata ua maua faaeega paia o i ai se pepa faataga aoga. O le tali o se pasene maoae e 98.6. Ina ua fesiligia e uiga i le toaono ua uma le aoga o pepa faataga, sa mafai ona faailoa mai e taitai i latou i igoa, ma faamatala mai taumafaiga ua faia e toe aumai ai i latou!

I nai tausaga ua mavae, sa toe me’i atu lo’u aiga i Amerika. Sa matou fiafia e auai i le ekalesia iinei ina ua mavae tausaga ofoofogia e 26, i iunite laiti ifo ma tumamao. Sa valaauina au o se faifeautalai o le uarota. Sa maoae so matou taitai misiona o le uarota ma sa faia mea matagofie ma aoaoina tagata ofoofogia. Sa ou talosaga e auai i se fonotaga a le aufono a le uarota e matau ma maua mai ai se fesoasoani i uo sa matou galulue i ai. Sa ou te’i ona na pau le mea sa talanoaina o se gaoioiga o loma a le uarota. Sa ou alu atu i le taitai misiona a le uarota ina ua uma ma avatu i ai so’u manatu na te lei maua le avanoa e toe foi ma lipoti atu i o matou tagata. O lana tali? “Oi, ou te le faia lava se lipoti.”

Sa ou faatusatusaina lena i se fonotaga a le aufono o le paranesi i Lahore, Pakisitana, lea sa ou auai i nai vaiaso talu ai. O lea vaega toalaiti, sa nonofo faataamilo faatasi i se tamai laulau, ma na pau le mea sa latou talanoaina o tagata. O igoa. Sa tofu lipoti mai taitai e uiga i o latou tulaga faatausimea ma tagata taitasi ma aiga sa latou popole i ai. Sa maua e tagata uma se avanoa e faaopoopo ai o latou mafaufauga i auala sili sa latou mafaia e faamanuia ai i latou na talanoaina. Na faia fuafuaga ma tuuina atu tofitofiga. Se lesona ina a matagofie o le faitau ma faamaumau e ala i igoa mai o tatou uso ma tuafafine o le uluai tupulaga [ua auai i le Ekalesia].

I le Ekalesia a Iesu Keriso, ua aoaoina i tatou e perofeta ua mavae ma perofeta o i ai nei—ma e ala i le mamanu na faatuina e lo tatou Faaola—i le ala e auauna atu ai. Tatou te ave igoa, tatou te manatua, ma tatou fefautuaai mo le soifua manuia o agaga. O taitai latou te faia lenei mea, o le a lē uma lava mataupu e talanoaina i a latou fonotaga faaleaufono! E aoga lelei le mataupu faavae o le faitau ma faamaumau. O le ala lea a le Alii. E mafai ona sili atu mea tatou te faia. I le Atua, o lē na foafoaina le atulaulau ma pulea mea uma, o lenei galuega—o Lana galuega ma le mamalu—e patino a’ia’i. Ma e tatau foi ona faapea mo i tatou taitoatasi, o ni meafaigaluega i Ona aao i Lana galuega ofoofogia o le faaolataga ma le faaeaga. O le a tulai mai ai vavega i olaga o tagata moni. I le suafa o Iesu Keriso, amene.