O Le Talalelei a Iesu Keriso e Totonugalemu-i-le-Aiga

O le aoaoga faavae O Le Ekalesia a Iesu Keriso o le Au Paia o Aso e Gata Ai e totonugalemu i le aiga. O le malumalu e taua mo la tatou aoaoga faavae i le aiga. O sauniga o loo mauaina iina, e mafai ai e i tatou ona toefoi atu o ni aiga faavavau i le afioaga o lo tatou Tama Faalelagi.

E oo mai i le konafesi aoao ia Aperila 2025, ua 200 malumalu ua fofogaina mai e Peresitene Russell M. Nelson le fauina. Sa fiafia lava o ia e faasilasila mai malumalu fou i le faaiuga o konafesi aoao taitasi, ma sa tatou fiafia uma faatasi ai ma ia. Peitai, ona o le aofaiga tele o malumalu fou o loo i ai nei i le uluai laasaga o le fuafuaina ma le fauina, o lea ua talafeagai ai ona tatou faatelegese le faasilasilaina o malumalu fou. O le mea lea, faatasi ai ma le faamaoniga a le Korama a Aposetolo e Toasefululua, o le a le faasilasila atua ai ni malumalu fou i lenei konafesi. O le a tatou agai atu nei i luma i le sauniaina o sauniga o le malumalu i tagata o le Ekalesia i le lalolagi atoa, e aofia ai le taimi ma nofoaga o le a fauina ai malumalu fou.

O le vaega o la’u lauga lea faatoa ou tuuina atu, na tusia ina ua maliu lo tatou Peresitene pele o Russell M. Nelson. O le vaega o le a sosoo ai, na tusia ma faamaonia i nai vaiaso a o lumanai ai, ae o loo avatu ai lava a’u aoaoga, na musuia e le Alii.

O le folafolaga i le aiga, na fofogaina tonu mai i le 30 tausaga ua mavae, ua tautino mai ai “o le aiga ua faauuina e le Atua” ma “o le totonugalemu lea o le fuafuaga a Le Foafoa, mo le taunuuga e faavavau o Lana fanau.” O loo tautino mai ai foi “o le poloaiga a le Atua i Lana fanau ia fanafanau ma uluuluola ai le lalolagi, ua faamalosia ma faatumauina.” Ma e “matou te toe ta’utino atu foi ua poloai mai le Atua, o mana paia o le foafoaina o fanau, ua na o le va lava o le alii ma le tamaitai ua faaipoipoina faaletulafono, o se tane ma le avā, e tatau ona faaaogaina ai.” I le taimi o avea ma Elder Russell M. Nelson, sa ia aoao ai se aofia o le Iunivesite o Polika Iaga e faapea, o le aiga e “taua i le fuafuaga a le Atua. … O le mea moni, o se faamoemoega o le fuafuaga o le faaeaina lea o le aiga.”

O Le Ekalesia a Iesu Keriso ua lauiloa i nisi taimi o se ekalesia e faatotonugalemu i le aiga. E sa’o lea! O la tatou sootaga i le Atua ma le faamoemoega o lo tatou olaga faaletino o loo faamalamalama mai i tulaga o le aiga. O le talalelei a Iesu Keriso o le fuafuaga a lo tatou Tama Faalelagi mo le manuia o Lana fanau agaga. E mafai ona tatou faapea moni lava o le fuafuaga o le talalelei na muai aoaoina ia i tatou i le aufono a se aiga e faavavau, e faatinoina e ala i o tatou aiga faaletino, ma o lona taunuuga faamoemoeina o le faaeaina lea o fanau a le Atua i aiga e faavavau.

E ui lava i lena matalalaga faaleaoaoga faavae, ae o loo i ai le faafeagai. I le Iunaite Setete o loo tatou pagatia ai mai se tuuitiitia o faaipoipoga ma le fanauina o fanau. Ua toeitiiti atoa le selau tausaga o le aofai o aiga o loo faauluulu i ulugalii faaipoipo ua faaitiitia, ma e faapena foi le aofai o tamaiti fananau mai. O faaipoipoga ma le fananau mai o fanau a tagata o la tatou Ekalesia e sili atu ona lelei, ae ua matua faaitiitia tele foi. E taua tele i le Au Paia o Aso e Gata Ai le ‘aua ne’i aveesea lo latou malamalamaaga i le faamoemoega o le faaipoipoga ma le taua o fanau. O le lumanai lena lea tatou te tauivi atu i ai. “O le Faaeaga o se mataupu faaleaiga,” na aoao mai ai i tatou e Peresitene Nelson. “E na o sauniga faaola o le talalelei a Iesu Keriso e mafai ona faaeaina ai aiga.”.

O le pa’ū i lalo o numera a le atunuu i faaipoipoga ma le fanauina o fanau e mafai ona malamalama i ai i mafuaaga faasolopito, ae o tulaga faatauaina ma faiga masani a le Au Paia o Aso e Gata Ai e tatau ona siitia—ae le o le mulimuli ai—i tulaga ua agai i ai le lalolagi.

I lo’u laitiiti i le 80 tausaga ua mavae, sa ou nofo ai i le faatoaga a o’u matua matutua i se nofoaga lea na toetoe lava o mea uma na tutupu i le aso na i lalo o le taitaiga a le aiga. Sa leai se televise po o nisi lava mea faaeletonika e faalavelaveina ai gaoioiga faaleaiga. I se faatusatusaga, i nuu tutaulaga i aso nei, e toalaiti tagata o le ekalesia e aafia i gaoioiga faifai pea e faatotonugalemu-i-le-aiga. O le soifuaga i nuu tutaulaga ma femalagaaiga i ona po nei, o faafiafiaga faatulagaina, ma fesootaiga saoasaoa tele ua faigofie ai mo le autalavou ona fai o latou fale o ni falemautotogi lea latou te momoe ai ma faia nai meaai i nisi taimi ae o le mea e itiiti ai le taitaiga faamatua o a latou gaoioiga.

O faatosinaga faamatua ua faavaivaia foi e ala i le auala o faigaluega ai le toatele o tagata o le Ekalesia o i ai nei mo se tupe e ola ai. I taimi ua tuanai, o se tasi o faatosinaga maoae lea na autasi ai aiga o le aafiaga o le tauivi faatasi i le tulituliloaina o se sini masani—e pei o le gagauina o le vaomatua mo faatoaga po o le faigaluega ia maua mea e ola ai. O le aiga sa avea o se iunite faatulagaina ma faatautaiina o le gaosiga o le tamaoaiga. O aso nei, o le tele o aiga ua avea ma ni iunite o le faaaogaina o le tamaoaiga lea e le manaomia ai se tikeri maualuga o le faatulagaga faaleaiga ma le galulue faatasi.

A o faaitiitia faatosinaga faamatua, o loo i ai pea i Au Paia o Aso e Gata Ai se tiutetauave na tuuina mai e le Atua e aoao ai a latou fanau e saunia mo lo tatou taunuuga faaleaiga i le faavavau (tagai i le Mataupu Faavae ma Feagaiga 68:25). O le toatele o i tatou e tatau ona faia lenei mea pe afai e le o masani ai o tatou aiga uma. O le tatalaina o faaipoipoga, oti, ma le tete’a o mea moni ia e tutupu. Sa ou oo i lena mea i le aiga lea na ou ola a’e ai.

Na maliu lo’u tama ina ua fitu o’u tausaga, o lea sa tausia ai a’u, o lo’u uso laitiiti ma le tuafafine e se tina ua maliu lana tane. I tulaga sili ona faigata, sa ia agai pea i luma. Sa tuuatoatasi o ia ma le nutimomoia, ae faatasi ai ma le fesoasoani a le Alii, na taialaina ai i matou e ana aoaoga mamana o le aoaoga faavae o le Ekalesia toefuataiina. E ma’eu le ala na ia tatalo ai mo le fesoasoani faalelagi i le tausiga o lana fanau, ma sa faamanuiaina ai o ia! Sa matou ola a’e i se aiga fiafia lea sa avea ai lo matou tama ua maliu o se mea moni i taimi uma. Sa aoaoina i matou e tina e faapea e i ai so matou tama ma sa i ai sona toalua ma o le a avea pea i matou ma se aiga ona o le la faaipoipoga i le malumalu. O lo matou tama ua na o na to’esea mo se taimi le tumau ona sa valaauina o ia e le Alii i se isi galuega ese.

Ou te iloa e toatele isi aiga e le o fiafia tele, ae e mafai e tina nofofua uma ona aoao atu le alofa o se Tama Faalelagi ma faamanuiaga mulimuli ane o se faaipoipoga i le malumalu. E mafai foi ona e faia lena mea! Ua faamautinoa mai e le fuafuaga a le Tama Faalelagi lenei avanoa mo tagata uma. Tatou te faafetai uma lava mo le faaipoipoga i le malumalu ma mo faamanuiaga faamoemoeina o le faamauina o se aiga e faavavau. E pei o lo’u tina, matou te fiafia e sii mai le folafolaga a Liae i lona atalii o Iakopo e faapea o le Atua “o le a ia faapaiaina ou puapuaga mo lou manuia” (2 Nifae 2:2). E faatatau lena mea i aiga uma o le Au Paia o Aso e Gata Ai, o loo atoa pe le o atoa i le taimi nei. O i tatou o se ekalesia faaleaiga.

O la tatou aoaoga faavae ma lo tatou talitonuga i aiga e faavavau e faamalolosia ma fusia ai i tatou. O le a le galo lava ia te a’u le folafolaga a le tamā o lo’u tina, o Harris, a o matou nonofo i lana faatoaga e latalata i Payson, Iuta. Sa ia ta’u mai ia te a’u le tala mata’utia faapea na maliu lo’u tamā i se mea mamao i Denver, Colorado. Sa ou tamoe atu i le potumoe ma tootuli i autafa o le moega, ma tagilotulotu ai. Sa mulimuli mai Tamamatua ia te a’u ma tootuli ifo i o’u tafatafa ma fai mai, “O le a avea a’u ma ou tamā.” O lena folafolaga agamalu o se faataitaiga mamana lea o mea e mafai ona faia e matua matutua e faatumu ai avanoa pe a maliu se tasi o le aiga pe o misi se tasi o le aiga.

O matua—nofofua pe faaipoipo ma isi e pei o matua matutua o e faatumuina lena matafaioi mo tamaiti—o faiaoga sili ia. O a latou aoaoga sili ona mataalia e faia lea e ala i faataitaiga. O le li’o o le aiga o le nofoaga lelei lea e faaalia ma aoao ai tulaga faatauaina e faavavau e pei o le taua o le faaipoipoga ma fanau, o le faamoemoega o le olaga, ma le puna moni o le olioli. O le nofoaga sili foi lea e aoao ai isi lesona taua o le olaga, e pei o le agalelei, faamagaloga, loto pulea, ma le taua o le a’otauina ma le galue faamaoni.

E moni, e toatele tagata o le Ekalesia ua i ai ni tagata pele o le aiga e le taliaina tulaga faatauaina ma faamoemoega o le talalelei. E manaomia e na tagata lo tatou alofa ma le onosai. I le faatatau atu i le tasi ma le isi, e tatau ona tatou manatua o le atoatoa tatou te sailia e le faatapulaaina i tulaga faigata o le olaga faaletino. O le aoaoga maoae i le Mataupu Faavae ma Feagaiga 138:57–59 ua faamautinoa mai ai ia i tatou o le salamo ma le tuputupu a’e faaleagaga e mafai ona faaauau pea i le lalolagi o agaga lea e mulimuli mai i le olaga faitino. O le mea e sili ona taua, a o galulue faatasi aiga e fefaamalosia’i le tasi ma le isi, e tatau ona tatou manatua uma o agasala ma faaletonu e le maalofia lea e tatou te aafia uma ai i lenei olaga faitino e mafai ona faamagaloina e ala i le salamo ona o le Togiola mamalu ma lavea’i a Iesu Keriso.

O lo tatou Faaola o Iesu Keriso o lo tatou faataitaiga sili lea. O le a faamanuiaina i tatou pe afai tatou te faataitaia o tatou olaga i Ana aoaoga ma le ositaulaga o le tagata lava ia. O le mulimuli ia Keriso ma le tuuina atu o i tatou lava i le auauna atu i le tasi ma le isi o le vaifofo sili lea mo le manatu faapito ma le faaloloto o le tagata mo na o ia lava lea ua foliga mai ua taatele i le taimi nei.

Ua i ai foi i matua se tiute e aoao a latou fanau ia iloa fai feau ma galuega masani e ese mai mataupu faavae o le talalelei. E lotogatasi le aiga pe a latou faia faatasi ni mea anoa. O togalaau faaleaiga e fausia ai mafutaga faaleaiga. O aafiaga fiafia faaleaiga e faamalosia ai sootaga faaleaiga. O tolauapiga, gaoioiga o taaloga, ma isi gaoioiga faafiafia e faapitoa lava le taua e fusia ai aiga. E tatau i aiga ona faatulaga faatasiga faaleaiga e manatua ai tua’a, lea e taitai atu ai i le malumalu.

E tatau i matua ona aoaoina fanau i tomai faavae o le olaga, e aofia ai le galulue i le fanua ma le fale. O le aoaoina o gagana o se sauniuniga aoga mo le galuega faafaifeautalai ma le olaga i ona po nei. O faiaoga o nei mataupu e mafai ona avea ma matua po o matua matutua po o tagata o le aiga lautele. E uluuluola aiga pe a latou aoao o se vaega ma fefautuaai faatasi i mataupu uma o loo popole i ai le aiga ma ona tagata.

Atonu e fai mai nisi, “Ae e leai ma se matou taimi mo se mea o na mea.” Ina ia maua se taimi e fai ai mea e taua moni lava, o le a iloa e le toatele o matua e mafai ona latou ki e faaola o latou aiga pe afai latou te ki e tape uma a latou masini faatekinolosi. Ma matua, ia manatua, o le mea e mananao moni i ai na tamaiti mo le ‘aiga afiafi o le taimi e faatasi ai ma outou.

E oo mai faamanuiaga maoae i aiga pe afai latou te tatalo faatasi, tootutuli i le po ma le taeao e ofo atu le faafetai mo faamanuiaga ma tatalo mo popolega masani. E faamanuiaina foi aiga pe a latou tapuai faatasi i sauniga faaleEkalesia ma i isi faatulagaga o faigalotu. O noataga faaleaiga e faamalosia foi e tala faaleaiga, fatuina o tu masani faaleaiga, ma le faasoaina atu o aafiaga paia. Sa faamanatu mai e Spencer W. Kimball ia i tatou e faapea “o tala o musumusuga mai o tatou lava olaga ma tala o o tatou augatama … o ni meafaigaluega mamana faafaiaoga.” E masani lava o puna sili ia o musumusuga mo i tatou ma a tatou fanau.

Ou te molimau atu o Iesu Keriso o le Alo Pele e Toatasi o le Atua, lo tatou Tama e Faavavau. Ua Ia valaaulia i tatou e mulimuli i le ala o feagaiga lea e tau atu i se faatasiga faaleaiga faalelagi. O mana o faamauga o le perisitua, na faatonutonuina e ki na toefuatai mai i le Malumalu o Katelani, ua aumaia faatasi ai aiga mo le faavavau (tagai i le Mataupu Faavae ma Feagaiga 110:13–16). O loo faaaogaina i le taimi nei i se aofaiga faatupulaia o malumalu o le Alii i le lalolagi atoa. E moni lenei mea. Ia avea i tatou ma se vaega o lea mea, ou te tatalo ai, i le suafa o Iesu Keriso, amene.