Ia Faalelei ma le Atua

A o ou suesue i tusitusiga paia, sa ou tau atu i upu na tosina moni i ai la’u gauai, muamua ona e i ai se uiga faapitoa na avea ma taunuuga o aafiaga o lo’u olaga. Sa ou faaaluina la’u matata e faigaluega ai o se tausitusi faapitoa e sueina tulaga tautupe. O lena talaaga, na ta’a’ina ai la’u vaai i le upu faalelei a o o’u faitauina tusitusiga paia. O la’u galuega o le faaleleia o aofaiga e lipotia mai, ma faamaumauga tautupe e ala i le faaaogaina o tomai faatausitusi, suetusi, ma le vailiili. I nisi faaupuga, o la’u sini o le faaogatusa o lipoti tautupe ma pepa o faamatalaga faavae ia mautinoa le sa’o atoatoa ma le tusa ai ma tulafono. Sa ou faia taumafaiga filiga e foia ai faaletonu, ma sa o se mea masani le tuuto o se taimi taua lava e foia ai e oo lava i nai faaletonu laiti.

Sa aioi atu le Aposetolo o Paulo i tagata i Korinito ina “ia lelei ma le Atua.” Ina ia faalelei ma le Atua o lona uiga ia toe faafoi mai ia faaogatusa ma le Atua, pe ia toefuatai ai se sootaga ma le Atua na lapelapea pe motusia ona o a tatou agasala po o faatinoga. Faafaigofie i le faapea, o le faalelei ma le Atua o lona uiga o le faaogatusa o o tatou loto ma faatinoga ma le finagalo o le Atua, e pei ona aoao mai e Peresitene Russell M. Nelson, e tuu atu ia manumalo le Atua i o tatou olaga.

E pei ona aoao mai i tusitusiga paia, ua tatou saoloto e gaoioi ai mo i tatou lava, “e filifili le ala o le oti e faavavau po o le ala o le ola e faavavau.” Ae afai tatou te le filiga, o lenei saolotoga e gaoioi ai mo i tatou lava e ono taitai atu ai i le le mafai ona faaogatusa ma le finagalo o le Atua.

Na aoao mai le perofeta o Iakopo e faapea a oo ina tatou iloa i tatou lava ua le ogatusa pe ua le ogatasi ma le Atua, na pau le auala e mafai ona tatou ausia le faaleleia o le “faalelei ma le [Atua] e ala i le togiola a Keriso.” E tatau ona tatou iloa o le faaleleiga e faalagolago i le alofamutimutivale, e foliga mai ai o le gaoioiga faatamalii o le togiola ua mafai ai ona fai le faaleleiga.

A o e manatunatu loloto i lou lava olaga, mafaufau i le taimi na e lagona ai lou mamao ese mai le Tama Faalelagi ona sa e aluese mai ia te Ia. Mo se faataitaiga, atonu na e faalē filiga i au tatalo, ia te Ia po o le tausiga o Ana poloaiga. E faapei lava ona tatou filifili e faataumamao ese i tatou lava mai le Atua, e tatau ona tatou filifili e amatalia le taumafaiga e faalelei. Sa faamamafa mai e le Alii lo tatou tiutetauave ina ua Ia fetalai, “Faalatalata mai ia te au ma o le a Ou faalatalata atu ai ia te outou; saili mai ia te au ma le filiga ma o le a outou maua ai au; ole mai, ma o le a outou maua ai; tu’itu’i mai, ma o le a tatala atu ai ia te outou.”

E faapefea ona fesoasoani le Faaola ia i tatou e toefuatai ma faalelei lenei sootaga taua? Mo au, e tele lo’u alualu i luma i la’u malaga ina ia faalelei ma le Atua ina ua ou mulimuli i le fautuaga a Peresitene Nelson ma salamo i aso uma. O le mafuaaga ona o le faaleleiga e fautuaina ai le toefuataiga o se sootaga motusia, aemaise i le va o le Atua ma le tagata, e ala i le aveesea o papupuni o le agasala.

O se tasi o faaleleiga maoae, ua tatou faitau ai i tusitusiga paia o Enosa. Sa i ai se mea i lona olaga e lei ogatusa ma le Atua. Sa ia faataitaia ai le faalagolago i le Togiola a Iesu Keriso e faalelei ai ma le Atua. Sa ia faamatalaina lona manao e salamo, lona lotomaualalo, lana tulimataiga, ma lona filima’otiga. O lana faaleleiga ma le Atua na faamautu ina ua oo mai se leo ia te ia, ma faapea mai, “Enosa e, ua faamagaloina au agasala, ma o le a faamanuiaina oe.” Na iloa e Enosa le aafiaga na faia e le salamo ma le faaleleiga ia te ia ina ua ia fai mai, “Ma o a’u o Enosa, sa ou iloa e le mafai ona pepelo le Atua; o le mea lea, sa tafi ese ai lo’u lagona o o’u sese.”

O le faaleleiga e aumaia ai e le gata i le toomaga mai lagona o le ta’usalaina ae faapea foi le filemu i o tatou loto ma faatasi ma isi. E faamaloloina ai sootaga, faamalūlūina loto, ma faamalolosia lo tatou avea ma soo, ma aumaia ai le talitonuga mautinoa faateleina i luma o le Atua. O le mea ua aumaia ia a’u le faamoemoe tele ma le talitonu mautinoa o se isi fua o le faaleleiga na faamatala mai e Enosa ina ua ia fai mai, “Ma ina ua uma ona faalogo atu o a’u o Enosa i nei upu, sa amata ona le maluelue o lo’u faatuatua i le Alii.”

A o o’u tamaitiiti, sa i ai se faatoaga vine telē o le tamamatua o lo’u tina. Sa ou maua le avanoa e faigaluega ai i le faatoaga, aemaise i le taumafanafana i le taimi o le seleselega o vine. A o ou laitiiti lava, sa ou iloa ai o le tele o lo’u aofia ai o le tuu mai lea o se pakete ona tuli lea o a’u i luga o se laau e tau mai vine.

Sa tele le suiga o le seleselega o vine ina ua faatau e lo’u tamamatua se masini e ta’u o le lūlū vine. E opo e le masini lea le ogalaau ma lūlū, ona toulu ifo ai lea o vine i luga o upega sa faaaoga e ao ai vine. Sa ou matauina, a amata lūlū e le masini le laau, toetoe o vine uma lava e toulu ifo mai le laau i ni sekone. Sa ou matauina foi sa lei afaina pe na lūlū le laau mo le 10 sekone po o le minute atoa, e i ai a ni vine e le toulu. E matuai lē maluelue lava.

E mafai ona lūlū ese vine mai se laau ona o le faamatuu mai o le mone o le etilene. O le mone lea e afua ona faavaivaia atufola o sela i le va o le lālā fua o vine ma le laau. O lea e faigofie ai ona mafati ese mai le lālā o vine ua pula mai le laau, ona ua vaivai le sootaga..

I tusitusiga paia, ua tatou aoao ai e faapea o le lala o Iese o se upuvaliata mo le Mesia, o Iesu Keriso, o lē sa valoia e afio mai le gafa o Iese, le tamā o le Tupu o Tavita. E faapei lava ona faavaivaia e le etilene le sootaga o se lala vine ua pula, e mafai foi e le le usiusitai, masalosalo, ma le fefe ona faavaivaia le sootaga i le lala o Iese, po o Iesu Keriso, ma faatagaina ai i tatou ia faigofie ona luluina ma vavaeese mai ia te Ia. Po o le a lava lo tatou faamaoni, e tatau lava ona puipuia i tatou mai le faavaivaia o lo tatou sootaga ia Iesu Keriso.

I le Mataupu Faavae ma Feagaiga, e oo lava i le au faatuatua o loo tuuina i ai se lapataiga: “Peitai ua i ai se avanoa e mafai ai ona pa’ū o le tagata mai le alofa tunoa ma alu ese mai le Atua soifua.” Ua faaauau le Alii, “Ioe, … e oo lava ia te i latou o e ua faapaiaina ia faaeteete foi.” Ina ia aloese mai le pa’ū, “O lea ia faaeteete le ekalesia ma tatalo e le aunoa, ne’i pauu atu i latou i faaosoosoga.”

Atonu e faatusa e se tasi le tulaga o le faigofie ona luluina i le mea ua faamatala mai i tusitusiga paia o le matutua mo le faafanoga ma taunuuga o loo faamalumalu mai mo faatinoga. E mafai foi ona faaaoga le fasifuaitau i se tulaga lautele atu e faapatino mai ai se tulaga ua pala, piopio, pe ua faiifo ma ono lamatia ai se mea e solovī i lalo pe faaleagaina.

O le a le mea e faatusa i ai lea matua? Pe o lona uiga o le mafai ona tatou oo i se tulaga e le mafai ai ona tatou sui? E leai, ou te manatu o le uiga ua mafai ona tatou taunuu i se tulaga i le taimi tatou te le mananao ai e sui. O le vaifofo i le oo ina ua matutua mo le faafanoga o le faia o na mea o le a faamalolosia ai lo tatou sootaga ia Iesu Keriso. Pei ona ta’ua, o le salamo na taitai ai Enosa i le tulaga o le faatuatua e lemaluelue. E i ai le malosiaga i le salamo—e le aunoa, vave, ma salamo faalausosoo. Na aoao mai i tatou e Peresitene Nelson, “E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani, i aso taitasi i le salamo.”

E faaopoopo atu i le talaiina atu o le salamo, na aoao mai e Iakopo e faapea, o le iloaina o le aao o le Atua i o tatou olaga, saili ma mauaina faaaliga, ma faalogo i le Atua pe a Ia fetalai e fesoasoani uma ia i tatou ia aua ai nei luluina. Na aoao mai Iakopo, “O le mea lea, matou te suesue ai i perofeta, ma sa matou maua faaaliga e tele ma le agaga o valoaga; ma o le i ai o nei molimau uma ua matou maua ai se faamoemoe, ma le maluelue ai o lo matou faatuatua.” O le faalogologo ma gaoioi i upu ma valaaulia a perofeta ma aposetolo e mafai ona faatumuina i tatou i le faamoemoe, talitonu mautinoa, ma le malosi, e taunuu i le luluina o lo tatou faatuatua.

Ua ou aoaoina faapea o se manao e faalelei ma le Atua e tatau ona o faatasi ma se manao e salamo. O le salamo ma le iloa o faamanuiaga o le Togiola a Iesu Keriso e tau atu ai i le faatuatua e le maluelue. O le faatuatua e le maluelue e tau atu i se manao e faalelei i taimi uma ma le Atua. O se mamanu faataamilo, pe fai ma toe fai.

Uso e ma tuafafine, ou te valaaulia outou ina ia faalelei ma le Atua e ala i le Togiola a Iesu Keriso. Ou te molimau atu o le osia ma le tausia o feagaiga e malolosi ai o tatou sootaga, ma aloese ai mai le oo ina matutua mo le faatafunaga. Ou te molimau atu o le faalelei ma le Atua, e ala i le Togiola a Iesu Keriso, e tau atu ai i le faatuatua e le maluelue.

Ua ou iloa e alofa le Tama Faalelagi ia te oe ma a’u, ma sa Ia auina mai Lona Alo Pele, o Iesu Keriso, e avea ma o tatou Faaola, Togiola, ma le Faaleleia Sili. Ou te molimau atu ai ia Iesu Keriso, ma ou te faia ai i le suafa o Iesu Keriso, amene.