“Pe Sili Mai Lou Alofa ia te A’u?”
Afai tatou te mananao e faaalia lo tatou alofa i le Atua, e ao ona tatou malamalama i le ala Na Te silafia ai lo tatou alofa.
I le faataoto i le atalii faamaumauoa, sa muai faigata i le uso matua ona fai se fiafia ina ua toefoi mai lona uso laitiiti i le mavae ai o se vaitau o ni filifiliga faavalevalea ma le “faamaumauina o oa i se olaga soonafai.” O le faamaualuga ma le faafiaamiotonu o le uso matua na le mafai ai e ia ona talia le olioli i le toefoi mai o lona uso ua salamo. Tatou te ono tuua foi avanoa e pasi ane e aunoa ma le faailoa atu i e pele ia i tatou, e ala i a tatou upu ma faatinoga, lo tatou alolofa faamaoni ia i latou.
E tele faataitaiga mamana i tusitusiga paia o le alofa faamaoni na faasoa ma mauaina: O Naomi ma Ruta, Amona ma le Tupu o Lamonae, le atalii faamaumau ’oa ma lona tamā, le Faaola ma Ona soo.
A oo ina tuu saoloto atu le alofa ma taliaina ma le faamaoni, ona amatalia ai lea o se taamilosaga lelei ma se alofa ua faateleina mo lē e tuuina atu ma lē e taliaina.
O le alofa o le Atua e atoatoa, e le gata, e tumau,ma “e sili ona suamalie.” E faatumulia ai le agaga i le “olioli tele.” Ae ui i lea, e i ai taimi atonu e faigata ai ona tatou iloa le alofa o le Atua i o tatou olaga. Peitai, e matuai loloto le finagalo o lo tatou Tama i le Lagi e atoatoa Lona alofa ia tatou iloaina Lona alofa ua Ia “fetalai mai ai ia i [tatou] e tusa ma lo [tatou] malamalama.” O le a Ia faaali mai Lona alofa mo i tatou i ni auala e mafai ona, tatou iloa taitoatasi. E mafai ona tatou iloa le alofa o le Atua mo i tatou pe a tatou matauina le matagofie o le natura, pe maua tali i tatalo, pe i ai mafaufauga e oo mai i o tatou mafaufau i le taimi tonu e moomia ai, pe iloa taimi suamalie o le olioli. O le faailoaga silisili o le alofa o le Tama Faalelagi mo i tatou lea e olaola i le mafaufau ma le loto, o le taimi na Ia faatagaina ai Lona Alo Pele e ofo mai o Ia lava e fai ma togiola.
Faapei o le uso matua o le atalii faamaumau oa, e tele taimi e faatotonugalemu ai la tatou taulai ia i tatou lava. Tatou te soona nopia’i i le sailia o faamaoniga o le alofa o le Atua mo i tatou ma oo ai ina tatou faagaulemalie pe a tatou le vaai i ai. Ae o le talamoni matagofie e faapea, o le tele o lo tatou taulai i le faaalia o lo tatou alofa mo le Atua, o le tele foi lea ona faigofie ona iloa Lona alofa mo i tatou. Atonu o le ala lea na tali atu ai le Faaola i le fesili “O le fea poloaiga ua sili?” i le valaaulia faigofie lenei ma le taua: “Ia e alofa atu i le Alii lou Atua ma lou loto atoa, ma lou agaga atoa, ma lou mafaufau atoa.”
O nisi taimi, o le ala tatou te faaalia ai lo tatou alofa ia i latou e sili ona pele ia i tatou, e le o le ala talafeagai lea latou te iloa ai le alofa. Atonu e faagaulemalie mo lē foai ma lē talia. Atonu e aoga le fesili ia i latou tatou te alolofa i ai pe faapefea ona latou iloa le alofa ua faaalia. Faapena foi, afai tatou te mananao e faaalia lo tatou alofa i le Atua, e ao ona tatou malamalama i le ala Na Te silafia lo tatou alofa. O le mea e lelei ai, na Ia otooto manino maia i ni auala se tele i tusitusiga paia faapea, e mafai ona tatou faaalia lo tatou alofa mo Ia.
Pe Sili Lou Alofa ia te Au i lo Latou Nei?
I le talanoaga faamalamalama i le va o Peteru ma le Alii toetu i le Sami o Tiperia, ua tatou aoao ai i auala e mafai ona tatou faaalia ai lo tatou alolofa mo lo tatou Faaola.
“Ua fetalai atu Iesu ia Simona Peteru, Simona, le atalii o Iona, pe sili mai lou alofa ia te a’u nai lo latou nei? Ua fai atu o ia ia te ia, Ioe, le Alii e; ua e silafia ou te alofa ia te oe.”
O le fesili autu na fesiligia ai e le Alii o le “Pe sili mai lou alofa ia te a’u nai lo latou nei?” Tatou te faaalia lo tatou alofa i le Alii pe a tatou tuu o Ia i luga atu o “latou nei,” ma o “latou nei” e mafai ona o soo se tasi, soo se gaoioiga, po o soo se mea lava e aveesea ai o Ia mai le avea ma tosinaga sili ona taua i o tatou olaga.
O le a le lava lava le taimi i se aso, se vaiaso, se masina, po o se tausaga e fai uma ai mea e mananao pe moomia e ausia. O se vaega o le suega i le olaga nei, o le faaaoga o punaoa taua o le taimi mo mea e sili ona taua mo lo tatou lelei e faavavau, ma ia lafoai na mea e faalētāua.
Na saunoa Peresitene Russell M. Nelson: “O le fesili mo i tatou taitasi … e tutusa lava. O e loto e avea le Atua ma faatosinaga sili ona taua i lou olaga? Pe o le a e faatagaina Ana afioga, Ana poloaiga, ma Ana feagaiga e faatosinaina mea e te faia i aso taitasi? Pe o le a e faatagaina Lona siufofoga ia faamuamua i lo se isi lava leo? O e loto e faataga soo se mea o finagalo o Ia e te faia ia faamuamua i lo isi faamoemoega uma? O e loto e tofatumoanaina lou loto i Lona finagalo?” Tatou te faapupula lo tatou avea ma soo ma le alofa mo le Atua pe a tatou faia o Ia ma faamuamua pito i luga.
Fafaga A’u Mamoe
I le fuaiupu e sosoo ai o lenei lava talanoaga i le va o Peteru ma le Faaola, tatou te aoao ai i se isi auala e silafia ai e le Alii faailoaga o lo tatou alofa: “Na toe fetalai [le Alii] ia te ia mo le taimi lona lua Simona, le atalii o Iona, pe sili mai lou alofa ia te a’u? Ua fai mai o ia ia te ia, Ioe, le Alii e; ua e silafia ou te alofa ia te oe. Ona fetalai atu lea o Ia ia te ia, Ia e fafaga i a’u mamoe.”
Tatou te faaalia lo tatou alofa mo le Tama Faalelagi, pe a tatou auauna atu, faalogo, alolofa, siitia, pe auauna atu i Ana fanau. O lena auaunaga atonu e faigofie e pei o le vaai moni atu i isi e aunoa ma le faamasinosino. I le vaega e 76 o le Mataupu Faavae ma Feagaiga, tatou te tepa ai i uiga o i latou o le a mautofi i le mamalu selesitila: “Latou te vaai e pei ona vaaia i latou, ma iloa pei ona iloa i latou.” Latou te vaai atu i isi e pei ona silasila ai le Atua ia i latou, Na Te silasila foi ia i latou i le mea e mafai ona avea ai i latou, faatasi ma le gafatia paia ma le mamalu.
I le mavae ai ona toefoi i le fale mai la’u misiona, sa ou tauaveina le pisinisi o le tausiga o fanua, lea sa matou amataina ma o’u uso a o talavou. Sa ou pisi foi i a’u suesuega i le iunivesite. I se tasi vaiaso o le tautotogo, o le mamafa o timuga ma suega faaiu sa faamalumalu mai, na lofituina ai a’u ma tuai ai galuega i laufanua.
Sa manino le lagi i le ogatotonu o le vaiaso, ma sa ou fuafua ai e tulituli galuega i laufanua pe a mae’a a’u vasega. Ae ina ua ou taunuu i le fale, ua leai la’u loli ma masini. I lo’u fiailoa, sa ou asiasi i laufanua sa faatulaga, ua taufai mae’a uma ona moa faalelei. I le laufanua mulimuli i le lisi, sa ou vaaia ai lo’u uso laitiiti o savali i tua o le moa. Na ia iloa mai a’u, ma ata, ma talotalo mai. O le faatumuina i le faafetai, sa ou opoina o ia ma faafetai atu i ai. O le faatinoga ’anoa o le auauna atu, na matuai faamalosia loloto ai lo’u alofa ma le lotofaamaoni mo ia. O le auauna o le tasi i le isi, o se ala e lē mafaaseseina tatou te faaalia ai lo tatou alofa mo le Atua ma Lona Alo Pele.
Tautino Lona Aao i Mea Uma
Tatou te faailoa foi lo tatou alofa mo le Atua e ala i le i ai o se loto e tumu i le faafetai. Na fetalai le Alii, “Ma ua leai se mea e faatausuai ai le tagata i le Atua … tau lava o i latou o e latou te le tautinoina lona aao i mea uma.” Tatou te faaalia lo tatou alofa mo le Atua e ala i le faailoa o Ia o le faapogai o mea lelei uma i o tatou olaga.
I popofou o le faalauiloaina o se kamupani, ma te tatalo ai ma le faatauanau ma la’u pa’aga faapisinisi a o lei amataina ni fonotaga taua, e ole atu ai mo le fesoasoani a le Tama Faalelagi. O lea taimi ma lea taimi, sa tali mai ai e le Atua a ma tatalo, ma sa sologa lelei a matou fonotaga. I se tasi fonotaga, sa fai mai ai la’u pa’aga faapisinisi, sa vave ona ma ole atu mo se fesoasoani ae tuai ona ma tuu atu le faafetai. Na amata mai lena taimi, sa ma faia ai o se mausa le ofo atu o tatalo o le loto faafetai, e faailoa atu le aao o le Alii i mea na faamanuiaina ai i ma’ua. Tatou te faaalia lo tatou alofa i le Atua ma “se uiga faaalia o le lotofaafetai.”
Afai Tou te Alolofa Mai ia te Aʼu, Ia Outou Tausi i Aʼu Poloaiga
O se tasi auala tatou te faaalia ai lo tatou alofa mo le Tama Faalelagi ma Lona Alo Pele o le filifili e usitai ia i La’ua. Na fetalai mai le Faaola, “Afai tou te alolofa mai ia te a’u, tausi a’u poloaiga.” O le ituaiga o usitai e le tauaso pe faamalosia, ae o se faaaliga naunautai faamaoni o le alofa. E finagalo le Tama oi le Lagi ia i tatou ia mananao e usiusitai. Ua faaigoa e Sister Tamara W. Runia lea mea o le “usitai agaalofa.” Fai mai a ia, “E ui e leai so tatou usitai atoatoa ae, tatou te taumafai e usitai agaalofa nei, ma filifili ma toe filifili e tumau ai, ona tatou te alolofa ia te Ia.”
Na tuu mai e le Tama Faalelagi ia i tatou le faitalia e musuia ai i tatou ia mananao e filifili o Ia. O Lana galuega ma le mamalu e le na ona aumaia o lo tatou ola e faavavau ae o loo aofia ai foi se faamoemoe faapea o lo tatou naunautaiga sili o le toefoi atu lea ia te Ia. Peitai, o le a Ia le faamalosia lava i tatou e usitai. I le viiga “Know This, That Every Soul Is Free,” tatou te usuina ai:
A o avea ma taitai misiona, sa musuia ai i ma’ua ma lo’u toalua o Christina e le tele o faifeautalai sa filifili e usiusitai, e le gata ona o se tulaga faatonuina o se faifeautalai, ae ona sa latou mananao e faaalia lo latou alolofa mo le Alii i le filifili ma le lotomaualalo e fai Mona sui.
Na saunoa Elder Dale G. Renlund, “O le sini a lo tatou Tama Faalelagi i tulaga faamatua, o le lē tuu atu lea i Ana fanau ia faia le mea sa’o; ae o le tuu atu lea i Lana fanau e filifili e fai le mea sa’o ma mulimuli ane avea e faapei o Ia. E na’o Lona finagalo lava ia tatou usiusitai atu, o le a Ia faaaogaina taui ma faasalaga vave e uunaia ai a tatou amioga.” Tatou te faaalia lo tatou alolofa i le Atua pe a tatou filifili e usitai ma mulimuli ia te Ia.
E silafia e lo tatou Tama Faalelagi ma lo tatou Faaola lo tatou faailoaga o le alofa mo i La’ua, pe a tatou faamuamua i La’ua i o tatou olaga, auauna le tasi i le isi, faailoa ma le lotofaafetai faamanuiaga uma mai ia i La’ua ma filifili e usiusitai ma mulimuli ia i La’ua.
Ou te molimau atu o i tatou taitoatasi o se atalii/afafine moni o le Atua, ma e atoatoa Lona alofa ia i tatou. Ou te molimau atu ua naunau o Ia ia tatou iloa Lona alofa i auala tatou te iloa ma malamalama ai. Ma o le feteenaiga matagofie o le a tatou iloa Lona alofa mo i tatou a o tatou faaalia lo tatou alofa mo Ia. I le suafa o Iesu Keriso, amene.