E Silasila le Alii i le Loto
Na pau le mea e manaomia e le Atua e faataunuu ai Ona faamoemoega ma fesoasoani ia tatou avea ma ē e finagalo o Ia ia avea ai, o le taitasi lea ona liliu atoa atu o ō tatou loto ia te Ia.
Ina ua poloaiina e filifili le tupu fou o Isaraelu mai atalii o Iese, sa fai ane ma le naunautai Samuelu, i le vaai atu i le atalii ulumatua o Iese, o Eliapo, “E moni lava o loo i luma o Ieova le a faauuina e ia.” Peitai sa le o Eliapo le auauna filifilia a le Alii. Sa lapata’ia Samuelu e le Faaola: “Aua e te vaai i lona tino, po o le maualuga o lona tino, aua ua ou tetee ia te ia; aua e le vaai Ieova pei o le vaai a tagata, aua e vaai tagata i le tino, a e vaai Ieova i le loto.”
E ui atonu o Tavita sa le sili ona malosi faaletino pe sili ona tomai i ona uso, ae sa malosi lona loto i le silafaga a le Atua. Sa alofa o ia i le Atua ma lona loto atoa ma sa loloto lona manao e usitai ia te Ia. Sa le masalosalo lona faatuatua i le alofa, mana, ma faamanuiaga folafolaina a le Atua, e pei ona sa ia faaalia mulimuli ane ina ua ia fasia e aunoa ma le fefe ma faatoilalo faatasi ma le fesoasoani a le Alii ia Koliata.
Ua aoao mai i tatou e lea tala e faapea, na pau le mea e manaomia e le Atua e faataunuu ai Ona faamoemoega ma fesoasoani ia tatou avea ma ē e finagalo o Ia ia avea ai, o le taitasi lea ona liliu atoa atu o tatou loto ia te Ia. Sa Ia poloaiina se faitulafono, “Ia e alofa atu i le Alii lou Atua ma lou loto atoa.” Na Ia fetalai atu i le Perofeta o Iosefa Samita, “Faauta, e manaomia e le Alii le loto ma se mafaufau naunautai.” Ma ia sa Nifae, sa tuu atu i ai e le Faaola toetu lenei valaaulia: “Ia outou osi mai mo se taulaga ia te au le loto momomo ma le agaga salamo.”
Aisea e faapena ai? Na aoao mai le Faaola, afai e liliu atoa atu o tatou loto ia te Ia, ona o Lana taulaga togiola, e mafai ona faamanuiaina i tatou i le malosi ma meaalofa faaleagaga tatou te moomia e faatoilalo ai o tatou luitau i le olaga nei, tetee atu ai i faaosoosoga, maua le taitaiga ma le malamalama, ma lagona le olioli ma le filemu i o tatou olaga. “O mea iti foi e tutupu mai ai mea tetele.” Na Ia fetalai e mafai ona Ia “avea mea vaivai ma mea malolosi” ma faamanuia i tatou i mea uma tatou te moomia e manuia ai i lenei olaga faitino ma maua ai le ola e faavavau. “Amuia e loto mama,” na Ia fetalai ai, “aua latou te iloa atu le Atua.”
Ou te talitonu o le mafuaaga lea, po o se vaega, e tele ina faasa’o ai e Iesu Keriso le au tusiupu ma le au Faresaio i le taimi o Lana misiona i le olaga nei. E ui ina maelega i le tausiga o Ana tulafono, ae sa sese mafuaaga na latou faia ai. Na Ia a’oa’i i latou ma fetalai atu, “Ua faalatalata mai ia te a’u lenei nuu i o latou gutu, ma vivii mai ia te a’u i o latou laugutu, a o latou loto ua taumamao ia te a’u.”
O se faamanatu manino lea i Ona soo uma e faapea, ua le na o mea tatou te faia e faatatau i ai—o a tatou upu ma faatinoga—ae pe aisea foi tatou te faia ai mea ua poloaiina i tatou e Iesu Keriso e fai—o tatou manao ma faamoemoega. Na Ia fetalai, “Aua o Aʼu, o le Alii, o le a faamasinoina tagata uma e tusa ma a latou galuega, e tusa ma le manaoga o o latou loto.” E tele atu mea e finagalo ai lo tatou Tama Faalelagi nai lo faatinoga fatufatu o le usiusitai ma auaunaga mai Ana fanau. E finagalo o Ia e fai mea na ma le faamoemoega moni, ona tatou te alolofa ia te Ia ma o tatou loto atoa. E finagalo o Ia ia tatou naunau ia faapei o Ia.
O lenei, afai o le soifua maloloina faaleagaga o o tatou loto o le atugaluga autu lea o le Faaola—o mea o loo Ia sailia i se soo moni—e mafai faapefea ona tatou suesueina o tatou loto ma iloa ai pe o tonu i le silafaga a le Atua?
Talu ai nei, ina ua ma foi mai ma lo’u toalua mai le ma misiona i Potukale, sa faia ni a ma suega faalesoifua maloloina e iloilo ai lo ma tulaga faaletino. O nisi o na suesuega na taulai i le maloloina o o ma fatu—pei o suesuega o toto, tata o fatu, ma suega o le popole. Ou te talitonu ua saunia foi e le Faaola mo i tatou se seti o suega faaleagaga e mafai ona tatou faaaogaina e iloilo ai tulaga faaleagaga o o tatou loto. Se’i ou faasoa atu ni nai suega.
Iloiloina o Lou Loto i Suega Faaleagaga
Muamua, o La Tatou Taulaiga, O Faamuamua ma Faamoemoega
“Aua o le mea ua i ai lo outou oa, e i ai atoa foi ma o outou loto,” na aoao mai ai Iesu. O ’oa o se mea e taua ia i tatou, o se mea tatou te tuuto i ai taumafaiga ma le gauai. A tatou filifili e faaalu lo tatou taimi ma taulai la tatou gauai, faapea foi mea e faaosofia tatou e fai mea tatou te faia, e tele mea e ta’u mai ai e uiga i o tatou loto. Na lapatai mai le Faaola e faapea e ui ina toatele i latou Na te valaauina, ae toaitiiti e filifilia “aua ua pupu tele o latou loto i mea o lenei lalolagi ma [ua latou] saili i viiga a tagata.” Pe ou te faia le Faaola ma faamuamua i lo’u olaga? Pe o tuutasi la’u vaai i Lona mamalu i mea uma ou te fai?
Lua, Lo Tatou Naunautai e Usitai i Poloaiga a le Atua
I tusitusiga paia atoa, ua faafesootai ai e le Alii ma Ana perofeta le faamaualuga ma le le usiusitai ma se loto ma’a’a. Na apoapoai atu Nifae i ona uso ma faapea atu: “E faapefea ona outou lē tausia o poloaiga a le Alii? E faapefea ona outou fano, ona o le ma’a’a o o outou loto?” I le Au Paia i Misuri, na lapatai atu ai le Alii, “Ae o ia o lē e lē faia e ia se mea seia poloaiina ai o ia, ma talia se poloaiga ma le loto masalosalo, ma ia tausia ma le paie, o ia lava lea e tausalaina.” E ui e le o faamoemoe le Faaola ia atoatoa i le tausiga o Ana poloaiga, ae ua Ia fetalai mai ia tatou mananao ma tauivi e tausia ma o tatou loto atoa.
Tolu, O Lo Tatou Ma’elega i le Suesueina o Tusitusiga Paia ma le Sailia o Faaaliga
Na apoapoai le Alii ia Oliva Kaotui e “teu nei upu i lou loto.” Ua valaaulia i tatou e saili tusitusiga paia ma le filiga, ma e ala i le mana o le Agaga Paia, saili ia maua le malamalama ma se molimau i le moni o le talalelei i o tatou loto.
Na aoa’i e le perofeta o Apinati ia faitaulaga a le Tupu amioleaga o Noa i le le faia o na mea, i le faapea atu, “Tou te lei faaaogaina o outou loto tou te malamalama ai, o lea, sa outou le popoto.” Pe o o’u faia se taumafaiga faamaoni e suesue ai tusitusiga paia i aso taitasi ma faaaoga lo’u loto e malamalama ai e ala i le tatalo?
Fa, O Tatou Mafaufauga ma Upu
Na aoao mai le Faaola e faapea, “e alu a’e mai le loto o le manatu leaga” ma “o le tele o mea i le loto e tautala mai ai le gutu.” O le uiga auau mama o o tatou mafaufauga ma upu o se faailo lelei lea o le mama o o tatou loto. Pe o o’u faatupuina se anoanoa’i o mafaufauga leaga e uiga i faatinoga po o faamoemoega o isi, pe o a’u lava foi? Pe o vave tele ea lo’u faamasinosino ma ta’usalaina isi? Pe o o’u saili e sue ni ’alofaga po o le tauamiotonuina o a’u measese? Ae faapefea a’u upu? Pe o siitia ma musuia ai i latou o siomia a’u? Pe o fatu soo ai ni feteenaiga ma le feitagai?
Ina ua mae’a a’u suega o le tino, sa fai mai lo’u fomai, o le aotelega sa maloloina lo’u fatu —ae sa i ai ni nai popolega sa moomia ona foia, a o le’i oo ina matuia. Ona ia fautua maia lea o nai suiga ou te ola ai. E faapena foi, a o e faatinoa lenei iloiloga faaleagaga o lou loto ma matauina ai ni nai auga e le lelei ua amata ona fetolofi mai i totonu, faamolemole aua le fefe! Ua saunia e le Faaola vailaau faaleagaga aupito sili ona lelei ma togafitiga e fesoasoani ia te oe. Ua Ia folafola mai foi e avatu ia te oe se loto fou! O ni nai faatinoga nei e mafai ona faaleleia ai le malosi faaleagaga o lou loto.
Faaleleia o Le Soifua Maloloina Faaleagaga o Lou Loto
Muamua, Faamalosia La Oulua Sootaga ma Keriso
A o tatou tuuto atu se taimi i aso taitasi e faalatalata atu ai ia Keriso, e suia o tatou loto. O le suesue o tusitusiga paia i aso taitasi, faatasi ai ma se tatalo faamaoni ma le anapogi e le aunoa, o le a faateleina ai lou alofa mo le Faaola ma faamalosia ai lou faatuatua ma manao e salamo ma tuuina atu ma le lotomaualalo lou loto i le Atua. Mafaufau i le faataitaiga mai ia Nifae: “O lea, na ou tagi atu i le Alii; ma faauta sa asiasi mai o ia ia te a’u, ma faamaluluina lo’u loto sa oo ina ou talitonu i upu uma na tautala mai ai lo’u tamā.”
A o faaauau ona tatou faafaileleina le fatu o le faatuatua e ala i o tatou manao amiotonu ma faatinoga, o le a tatou maua lea lava faapaiaga o o tatou loto e pei o sa Nifae: “Sa latou anapopogi ma tatalo soo, ma sa faasolo malolosi ma atili malolosi ai i lo latou lotomaualalalo, ma mausali ma atili mausali ai i le faatuatua ia Keriso, seia oo ina faatutumuina o latou agaga i le olioli ma le faamafanafanaga, ioe, seia oo ina faamamaina ma faapaiaina o latou loto, o le faapaiaga lea e oo mai ona o lo latou tuu atu o o latou loto i le Atua.”
Lua, Faaogatusa Lou Loto ma Lona Finagalo
Na aoao mai le Faaola, “Afai tou te alolofa mai ia te a’u, tausi mai a’u poloaiga.” Ua Ia valaaulia i tatou e faatino lo tatou alofa e ala i le osia ma le tausia o feagaiga ma Ia. A o tatou tauivi i aso taitasi e tausi Ana poloaiga, ia salamo faamaoni mai a tatou agasala, ma faaauau pea i le tauaveina o Lona suafa i o tatou luga ma faaogatusa o tatou loto ma Lona finagalo, e mafai ona faamanuiaina i tatou i le mafutaga faifaipea ma le Agaga Paia.
Na molimau mai Nifae, “Ua ou iloa afai tou te mulimuli i le Alo ma le faamoemoe atoa o le loto ma lē faia se pepelo ma se faaoleole i luma o le Atua, ae ma le manatu tonu i ai ma salamo ia outou agasala, ma molimau atu i le Tama ua outou loto e ave i o outou luga le suafa o Keriso, i le papatisoga … , ona outou maua lea o le Agaga Paia.” O le a taiala oe e le Agaga Paia ma fesoasoani ia te oe ia iloa le finagalo o le Alii ma faia filifiliga lelei.
O Le Mea Mulimuli, Auauna Atu i le Atua ma Isi ma Lou Loto Atoa
Ua valaaulia tagata uma e le Faaola e “auauna atu ia te ia ma lou loto atoa.” A tatou filifili e faia mea taitasi ua poloaiina i tatou e le Alii e fai—e pei o le tausia o poloaiga, aai ma feinu i le faamanatuga, tapuai i le malumalu, ma auauna atu i isi—ma se loto faamaoni ma le faamoemoega moni, o le a avea faatinoga taitasi o le auaunaga ma le tapuai o se aafiaga faaleagaga mamana e faamalosia ai lo tatou faatuatua ma le molimau ma faatutumu ai o tatou loto i le olioli ma le alofa i le Atua ma o tatou uso a tagata.
O loo talafeauga lava le fesili a le perofeta o Alema i aso nei: “Pe na fananau mai ea outou faaleagaga i le Atua? Ua outou maua ea ona foliga i o outou mata? Ua oo ea lenei liuga tele i o outou loto?”
Uso e ma tuafafine, ou te valaaulia outou e tuu atu o outou loto atoa i le Faaola i le aso nei. Ia faamaoni ma i ai se faamoemoega o faatinoga ma auaunaga taitasi. Faataatia ese faalavefau o le lalolagi ma tauivi ia maua se taimi ’anoa mo le Alii i aso uma o outou olaga. Salamo ma foi mai ia te Ia ma lou loto atoa, ona Ia faamagaloina lea o oe ma siomia oe i aao o Lona alofa. Aua le sailia mea o lenei lalolagi, ae filifili ia manatu tasi i Lona mamalu ma saili mea e sili atu. E silafia e Ia ou mafaufauga ma manaoga o lou loto, ma a e sau ia te Ia, o le a Ia faamanuia oe i le malosi, mautinoa, filemu, ma le olioli i lenei olaga ma se nofoaga i Lona malo selesitila mo le faavavau atoa.
Ou te iloa o loo soifua Iesu Keriso. O Ia o lo tatou Togiola. Ma e alofa o Ia ia te oe ma a’u ma Lona loto atoa. I le suafa o Iesu Keriso, amene.