O Le Meaalofa e Faavavau o le Molimau

E silafia e Ia mea uma ma e ona le malosi uma lava. E ala i le Malamalama o Keriso ma le galuega a le Agaga Paia, ua i ai Lana faatosinaga i soo se mea. O Lona natura o le faamanuia o i tatou.

Na te vaai i lo tatou tuanai, taimi nei, ma le taunuuga e faavavau. E leai se mea e mafai ona natia mai ia te Ia.

O le valaaulia a Peresitene Russell M. Nelson e “mafaufau faaselesitila” e uunaia ai i tatou e faataitai i le vaaiga ma le natura o lo tatou Tama Faalelagi.

Ona o Ona uiga patino paia, ua tuuina mai ai e lo tatou Tama Faalelagi ia i tatou meaalofa lelei uma, e tofu ma Lana vaaiga e faavavau ma se vaaiga mamao i le mafaufau.

O le tiutetauave foi le filifili lelei.

Sa totogi e Iesu Keriso le tau faaiu mo lena avanoa i Lona toto faapelepele.

O nisi taimi atonu tatou te talitonu ai o le faitalia o lona uiga o le faia o soo se mea tatou te mananao i ai. Ae o le mea moni e faapea, o le tau sa totogiina o lona uiga o le faitalia o se meaalofa paia.

O i tatou o sui, ma o sui e nafa ma se mea. I lenei tulaga, ua nafa i tatou ma filifiliga tatou te faia e faavae i le malamalama ua tatou maua ma meaalofa ua tuuina mai ia i tatou. E le mafai ona tatou faia se filifiliga e aunoa ma le nafa ma taunuuga.

Aisea ua i ai lo tatou faitalia?

Ina ia filifili ai le lelei.

Ina ia filifili ai Keriso.

Ina ia filifili ai pea lava pea—le ola e faavavau.

O se molimau mai le Agaga Paia e sili atu nai lo le vaai. O Ia o le molimau tulagaese o le Tama ma le Alo.” Na aoao mai Peresitene Nelson, “I aso a sau, o le a lē mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia.”

Uso e ma tuafafine, o le mafuaaga lenei tatou te manaomia ai taitoatasi le mana o le Agaga Paia i aso nei.

O se molimau e ala i le Agaga Paia e mafai ona oo mai i le tele o auala. E pei o se matauila i totonu o se potu pogisa, e mafai ona vave ona ola mai ma faafuasei. E mafai ona oo mai e pei o le oso malie mai o le la i le aluga o taimi. E mafai ona oo mai e pei o ave o le malamalama, e emoemo e oo atu i le atamai mama. Po o le a lava le ala, e oo mai e ala i le Agaga Paia.

Sa ou ola ae i Jamaica aulelei; sa malie ma matagofie. Peitai, ina ua amata la’u aoga maualuga, sa le malamalama nisi o la’u vasega ma uo i la’u faaiuga e avea ma se tagata o Le Ekalesia a Iesu Keriso. “E mafai faapefea ona e auai i lena lotu?” latou te fesili ai. “E faapefea ona e talitonu i lena tala?”—e faatatau i le Uluai Faaaliga. “E mafai faapefea ona e faitau i lena tusi?”—e faatatau i le Tusi a Mamona. “E te talitonu moni lava i na mea uma?” Ma “Aisea ua e faamaimauina ai lou olaga?”

Sa tiga, aemaise lava ona sa sau mai tagata sa ou alofa i ai.

Ae o le mea latou te le’i iloa o lenei: Sa i ai so’u aafiaga ma le Agaga Paia. A o faatumulia lo’u loto i lena molimau, sa puaoa ai le tiga o aso, ma “mo sina taimi puupuu lava, sa [oo mai] le vaaiga a le lagi i luma o la’u vaai.”

Atonu na fesiligia oe i nisi o nei fesili i isi. Atonu, e oo lava i le taimi nei o loo osofaia oe e pei ona sa ou i ai.

O le meaalofa ma le molimau a le Agaga Paia e avanoa mo tagata uma.

O Jamaica ia te a’u e pei o Palamaira ia Iosefa Samita. O la’u Togavao Paia. Ou te le iloa le tulaga tonu sa tootuli ai Iosefa i le Togavao Paia e tatalo, ae ou te iloa tonu lava le mea sa ou i ai ina ua avea la’u Togavao Paia ma se mea moni. Na tupu i Four Grove Road, Mandeville, Jamaica, i lo’u faletaele, i le 6:00 i le vaveao i se Aso Lulu i le tolu tausaga talu ona uma lo’u papatisoga. O lenei aafiaga paia na tupu ona o le lua vaiaso na muamua atu na valaaulia ai au e se faifeautalai tamaitai musuia e faitau le Tusi a Mamona. O loo auai Sister Audrey Krauss i lenei konafesi i le asō faatasi ma lona aiga, ma e faavavau lo’u alofa ia te ia.

Na suia a’u e lena aafiaga.

Uso e ma tuafafine, e le tuuina atu se molimau e faaaoga mo na o se taimi le tumau. O lenei meaalofa mai lo tatou Tama Faalelagi e tatau ona faavavau aua o lē na foaia mai e faavavau. E le tatau ona i ai se aso e uma ai le aogā o se molimau. E le tatau ona faavaivaia pe faaitiitia ona ua suia se mea i lo’u olaga pe ua suia se mea i le lalolagi. E tatau ona faasolo malosi atu aua, e pei o taleni a auauna i le faataoto i taleni, o la’u molimau patino o se meaalofa ina ia faateleina—ae le o le tanumia.

O le toe tepa i tua i na aso faigata o tofotofoga ma sauaga sa ou uia a o ou laitiiti, ua fesoasoani ou te oo ai i le mea ua ou iloa nei mo a’u lava. Ua le gata ina ou talitonu, faamoemoe, pe faatuatuaina, e ui lava o ni vaega taua nei o le faatuatua i le ala agai atu i se molimau mautinoa. Ou te faamalo atu mo le faia o lau lava ala i le faia o fesili, suesue, tatalo, anapogi ma le mafaufau loloto. Faamolemole aua e te taofia. E aoga taumafaiga uma e tulitulimatagauina ai lenei ala i le molimau. O ai po o le a se mea o le a e faatagaina e aveesea lena mea? “O le a se molimau sili atu e mafai ona e maua nai lo lena mai le Atua?”

E mafai e atalii po o afafine uma o le Atua ona maua se malamalama loloto atu, mausali, ma mautinoa mo i latou lava. Faapei o Iosefa Samita, o lē na faamautuina lana molimau e ui i tetee, e mafai ona tatou faapea atu ma le lototele, “sa ou mautinoa lena mea, ma sa ou mautinoa sa silafia e le Atua lena mea, ma e lē mafai ona ou faafitia lena mea, pe ou te fiatoa e fai.”

O’u uso e ma tuafafine pele, ia tuu atu i tamai fatu o le molimau ia galue ia te outou seia oo ina tupu ae faavavau lava i se malamalama mautinoa mamalu.

Afai o oe o se tagata o Le Ekalesia a Iesu Keriso o le Au Paia o Aso e Gata Ai ua papatisoina ma faamauina ae o loo tauivi pea ma le, “Ou te le o mautinoa pe ua ou iloa,” faamolemole ia manatua le folafolaga lenei i le tatalo o le faamanatuga: “Ina ia latou maua pea lona Agaga e faatasi ma i latou.” Ona o lenei folafolaga, ua mafai ai e i tatou taitoatasi ona tulitulimatagau le ala i le molimau ma se malamalama mautinoa.

Ia o se upumoni maoae lenei: Po o le a lava le ala e tuuina mai ai se molimau—pe manino e pei o le oso ae o le la pe oo mai i se faaaliga mamalu—e manaomia ai lava se filifiliga e maua ai lenei meaalofa taua.

O le faapea atu “Ua ou filifili e talitonu” ua faigofie ai ona maua se molimau mai le Atua. Afai tatou te iloa ua solo ina vaivai a tatou molimau, ia manatua o filifiliga tatou te faia e faaitiitia ai le mana o le molimau. Ae e le’i alu lava le molimau i se mea. Tau lava o lo tatou filifili e toe fesootai i ai.

O le filifili e talitonu o se auala atamai ma mamana lea e faaaoga ai lo tatou faitalia.

E le mafai ona ou vaai i se auala sili atu ona lelei e faaaoga ai lo’u faitalia nai lo le puipuia o la’u molimau.

Na aoao mai Peresitene Nelson: “Ou te augani atu ia te outou ia pulea lau molimau. Galue i ai. Umia. Tausi i ai. Faafailele ina ia tuputupu ae. Fafaga i upumoni.”

Ia te au, o upu ia pulea, galue, tausi, umia, faafailelei, ma fafaga, e pei o se sui ua tuuina i ai le tausimea mo se mea anagata ma tāua.

I le popofou o le Ekalesia, sa lagona e Pale P. Palate le le fiafia i le Perofeta o Iosefa Samita ma filifili ai e faitioina o ia ma le Ekalesia. Ina ua sau Ioane Teila, o lē na aoaoina e Pale i le talalelei, sa talanoa i ai Pale ma lapataia o ia e aua le mulimuli ia Iosefa. Na fai atu Ioane Teila ia Pale:

“Ae e te le’i tuua Kanata, sa e tuuina atu se molimau malosi ia Iosefa Samita o se perofeta a le Atua, … ma sa e fai mai na e iloaina nei mea e ala i faaaliga ma le meaalofa o le Agaga Paia.”

“… Ua ia te a’u nei lea lava molimau e tasi lea na e olioli ai. Afai sa moni le galuega i le ono masina talu ai, e moni lava i le asō. Afai sa avea Iosefa Samita i lena taimi ma perofeta, o loo avea nei o ia ma se perofeta.”

Ou te molimau patino atu o Iosefa Samita o se perofeta a le Atua ma o le tiutetauave faaperofeta sa ia mauaina o loo faaauau pea i le asō. E taitaia e Iesu Keriso lenei galuega.

Ou te valaaulia outou ia mafaufau e uiga i lo outou ala i se molimau mautinoa e uiga ia Iesu Keriso ma Lana talalelei. Ia pulea lau molimau; faaaoga ma le atamai lou faitalia ma faailoa atu lē na tuuina atu ma Ona uiga mamalu uma. Ou te molimau atu o loo i ai le mana i totonu ia te outou. E leai se tasi e mafai ona filifili mo oe. E leai se tasi e mafai ona aveesea lenei meaalofa. E mafai ona e filifili e talitonu.

Ou te folafola atu a outou faia lenei mea, o lau molimau o le a avea ma se “vaipuna o le vai ola, e puna a’e i le ola e faavavau.” O le a avea ma se taula ma se faaosofia, ma o le a lagolagoina oe i taimi faigata. O le a mafai ai e oe ona atiina ae meaalofa faaleagaga. O le a fesoasoani ia te oe i lau auaunaga patino ma tautuaga. O le a avea ma se auupega e faasaga ia Satani ma ou fili. O lau molimau o le a avea ma se fiafiaga a o e vaai ua mamanuina i lau fanau, fanau a fanau, ma fanau a fanau a fanau ma i latou e te alofa ma auauna atu i ai. O le a mamana pe a e faasoa atu ma faaaoga e molimau atu ai.

Afai ua e iloa, e te iloa. Ou te iloa ua ou iloa. Tatou te manaomia ni isi molimau mautinoa e uiga ia Iesu Keriso ma Lana talalelei. Alu iina! Saili i ai! E manaomia vave! O le tisipenisione mulimuli lenei—o le tisipenisione o le atoaga o taimi.

Na folafola mai e Iesu Keriso lenei upumoni: “E mavae atu le lagi ma le lalolagi, a o a’u upu e le mavae atu lava ia.”

Uso e ma tuafafine, o se molimau ia Iesu Keriso sa lei fuafuaina lava e avea ma se meaalofa le tumau. E leai se mea e uiga i ai e le tumau—e le o lē na foaia atu, e le o le meaalofa lava ia, e le o lē na momoli atua le meaalofa, e le o le tagata e faatatau i ai lena meaalofa. Tau ina ia faamatalaina lau molimau i le ala lava lea e tasi. E ui “e mavae atu le lagi ma le lalolagi,” o le a le mavae atu lava lau molimau ma le molimau o le talalelei a Iesu Keriso. O le taimi lenei e taofimau ai i lenei meaalofa taua. I le suafa o Iesu Keriso, amene.