Amuia Ē Faatupuina le Filemu

Vaai faalemafaufau ma a’u faapea o oe o se talavou i Kapanaumi, e lata i le Sami o Kalilaia, i le taimi o le misiona a Iesu Keriso. Ua salalau le tala e uiga i se aoao—se faiaoga—o lana savali ua tosina atu i ai le motu o tagata. Ua fuafua tagata o le pitonuu e malaga i se mauga e vaai ifo ai i le sami e faalogologo ia te Ia.

Ua e auai faatasi ma isi e savavali i ala pefua o Kalilaia. Ina ua e taunuu, o le motu o tagata e toatele na faapotopoto e faalogologo i lenei Iesu na faateia ai oe. Sa tuumumusu lemu nisi, “Mesia.”

Ua e faalogo. O Ana upu na ootia ai lou loto. I le savaliga umi i le fale, ua e filifili e savali gūgū nai lo le talanoa.

Ua e manatunatu loloto i mea matagofie—o mea e silimamao atu e oo foi i le tulafono a Mose. Sa fetalai o Ia e uiga i le liliu atu o le isi alafau ma le alofa atu i ou fili. Sa Ia folafola mai, “Amuia ē faatupuina le filemu: auā e ta’ua i latou o atalii o le Atua.”

I lou tulaga moni, a o e lagonaina le mamafa o aso faigata—o le le mautonu ma le fefe—ua faigata ona maua se filemu.

Ua faanatinati lau savali; e te taunuu atu toe a e mole. Ua faapotopoto lou aiga; ma ua fesili atu lou tamā, “Faamatala mai mea na e faalogo ai ma lagonaina.”

Ua e faamatala na Ia valaaulia oe ia pupula atu lou malamalama i luma o tagata, ia saili le amiotonu tusa lava pe sauaina. Ua feto’i lou leo a’o e toefai atu, “Amuia ē faatupuina le filemu: auā e ta’ua i latou o atalii o le Atua.”

Ua e fesili, “Pe mafai moni ona avea au o sē e faatupuina le filemu pe a vevesi le lalolagi, pe a tumu lo’u loto i le fefe, ma pe a foliga mai ua matua taumamao lava se filemu?”

Ua tilotilo atu lou tamā i lou tina ma tali malie atu, “Ioe. Tatou te amata i le nofoaga amata—i o tatou loto. Ona sosoo lea ma o tatou fale ma aiga. A o tatou faia iina, e mafai ona salalau le faatupuina o le filemu i o tatou magaala ma nuu.”

Tatou faatopetope atu i le 2,000 tausaga. Tatou te le tau vaai faalemafaufau—o lo tatou taimi tonu lenei. E ui ina ese mafatiaga o lagonaina e le tupulaga faia’e o aso nei mai na aso o le tagata talavou i Kalilaia—fevaevaeaiga, faalelalolagi, tauimasui, ita i luga o le auala, faali’i, ma vaega e osofaia se tagata i luga o upega tafailagi—e fetaiai ia nei augatupulaga e lua ma aganuu o feteenaiga ma le vevesi.

O le mea e faafetai ai, e tutusa lava le ta’a’ina atu o o tatou alii ma tamaitai talavou i o latou taimi i le Lauga i luga o le Mauga: Seminare, konafesi Mo le Malosi o le Atutalavou, ma le Sau Mulimuli Mai ia te A’u. O i latou te maua ai valaaulia faifaipea lava ia mai le Alii: ia faapea ona pupula atu lo latou malamalama i luma o tagata, ia saili le amiotonu tusa lava pe sauaina, ma ia alolofa i o latou fili.

Latou te mauaina foi upu faamalosiau mai perofeta soifua o le Toefuataiga: “Ua Manaomia i Latou e Faatupuina le Filemu.” Faatuiese ae aua le faia ma le inoino. Suitulaga le fefinauaiga ma le faamaualuga i le lotofaamagalo ma le alofa. Fau aualalaupapa o le galulue faatasi ma le malamalama, ae le o ni papuipui o le faafiasili po o le faaesea. Ma le folafolaga lava e tasi: “Amuia e faatupuina le filemu: aua e ta’ua i latou o fanau a le Atua.”

O loto o le tupulaga faia’e o aso nei ua faatumulia i se molimau ia Iesu Keriso ma se faamoemoe mo le lumanai. Peitai o la foi latou te fesili, “Pe mafai moni ona avea a’u o sē e faatupuina le filemu pe a vevesi le lalolagi, pe a tumu lo’u loto i le fefe, ma pe a foliga mai ua matua taumamao lava se filemu?”

O le tali manino malosi lava e tasi o le ioe! Tatou te talia ma le naunautai upu a le Faaola: “O le [filemu] ou te avatu ia te outou, o lo’u [filemu] ou te avatu ia te outou. Aua le atuatuvale o outou loto, aua foi tou te matatau.”

O le faatupuina o le filemu e amata pea lava i le nofoaga amata—i o tatou loto. Ona sosoo lea ma fale ma aiga. A o tatou faia iina, e mafai ona salalau le faatupuina o le filemu i o tatou magaala ma nuu.

Sei o tatou mafaufau atili i nei nofoaga e tolu e faatupu ai le filemu e le Au Paia o Aso e Gata Ai i ona po nei.

Muamua o o tatou loto. O se elemene vaaia o le misiona a Keriso o loo faapupula mai ai le ala na tosina atu ai tamaiti ia te Ia. O loo taoto ai i totonu iina se faa’ite’ite. O le vailiiliina o se loto mamā a’ia’i ma le lelei faatupu filemu o se tamaitiiti e mafai ona avea o se musumusuga mo o tatou loto. O tali ia a nisi o tamaiti Peraimeri i le “O a foliga o le avea o sē e faatupuina le filemu?”

Ou te faasoa sa’o atu a latou tali mai o latou loto! Fai mai Luka, “Fesoasoani i taimi uma i isi.” Na faamatala mai e Keleise le taua o le faamagalo atu o le tasi i le isi, tusa lava pe le talafeagai. Fai mai Ana, “Sa ou vaai i se tasi e leai se tasi o la taaalo, o lea sa ou alu ai ma taaalo.” Na manatu Lindy o le avea o se e faatupuina le filemu o le fesoasoani lea i isi. “Ona e faasoa atu lea. O le a faifai ai pea lava.” Fai mai Liam, “Aua e te agaleaga i tagata, tusa lava pe agaleaga mai ia te oe.” Sa fai mai Lonetona, “Afai e taufaalili mai se tasi ia te oe pe agaleaga mai ia te oe, fai i ai, ‘Faamolemole soia.’ Na matau e Trevor, “Afai toe tasi se tonati o totoe ma tou te mananao uma i ai, tufatufa.”

O tali a nei tamaiti o se faamaoniga ia te a’u na tatou fananau uma mai lava ma ni faanaunauga paia i le agalelei ma le agaalofa. O le talalelei a Iesu Keriso e faafailele ma lalagaina nei uiga paia, e aofia ai le faatupuina o le filemu i o tatou loto, ma faamanuiaina ai i tatou i lenei olaga ma le isi.

Lua, o le fauina o le faatupuina o le filemu i o tatou aiga e ala i le faaaogaina o le mamanu a le Alii e tosina ai a tatou sootaga ma le tasi ma le isi: faatauanau, tali-tiga, faapalepale, agalelei, agamalu, ma le alofa moni.

O se tala musuia lenei o loo faapupula mai ai le ala na faia ai e se tasi aiga le faatupu filemu o se mataupu faaleaiga, ma faaaoga nei mataupu faavae.

Sa tauivi tamaiti o lenei aiga i la latou sootaga ma se tagata matua, o lana amio e tele ina maitaita, faasausili, ma lē mafaufau. O tamaiti, i lo latou tigā ma le lē fiafia, na amata ona taumafaufau pe na pau le auala e agai ai i luma o le fai atu foi ia te ia o lana amio lava lea.

I se tasi afiafi sa talanoa faatasi ai le aiga e uiga i le atugaluga ma le vevesi ua tulai mai. Ona alia’e mai lea o se manatu—ua le na o se auala e foia ai, ae o se faataitaiga.

Nai lo le tali atu i le leai o se tala po o le tauimasui, ae o le a faia e tamaiti se mea e lei mafaufauina: o le a latou tali atu i le agalelei. E le na o se amiopulea faaaloalo, ae o upu moni e sasaa mai le loto ma galuega anoa, tusa lava pe o le a le faiga e taulima ai i latou. Sa ioe uma e taumafai mo se taimi faatulagaina, a uma ona toe potopoto foi lea ma manatunatu i ai.

E ui ina sa faatāutāu nisi muamua, ae sa latou tuuto i le fuafuaga ma ni loto faamaoni.

O le mea na sosoo ai sa ofoofogia ma tulagaese.

Sa amata ona māfāna talanoaga. Ua suia le faa’ū’ū i le mataataata. O le tagata matua, sa vavamamao ma ‘ina‘inā, ua amata ona suia. O tamaiti, na faamanaina i la latou filifiliga e taitai i le alofa, na latou maua le olioli i le suiga. Sa maoae le suiga ma sa le moomia ai le fonotaga na fuafua e tulitatao ai. Na faia e le agalelei lana galuega fai gūgū.

Na oo mai le taimi, na fausia ai noataga moni o faigauo, ma siitia ai tagata uma. Ina ia avea ma e faatupuina le filemu, tatou te faamagalo atu i isi ma fausia ai ma le loto i ai isi nai lo le toso faatātā o i latou i lalo.

Tolu, o le faatupuina o le filemu i o tatou pitonuu. I tausaga faaletonu o le Taua Lona Lua o le Lalolagi, na aoao mai ai e Elder John A. Widtsoe: “Na pau lava le auala e fausia ai se pitonuu toafilemu ole fauina lea o alii ma tamaitai o paaga alolofa ma tufuga o le filemu. O tagata taitoatasi, e ala i lena aoaoga faavae autu a Keriso … ua umia i ona aao le filemu o le lalolagi uma.”

O loo faapupula matagofie mai e le tala lenei lena mataupu.

I nai tausaga ua mavae, sa tutū ai se imama [faitatalo] Musalemi ma se faifeau Kerisiano mai Nigeria—i itu faafeagai o se vaeluaga tigā faalelotu. Sa tofu loloto o la’ua mafatiaga. Ae, na ala i le mana faamalolo o le lotofaamagalo, sa la filifili ai e savavali faatasi i se ala.

Sa avea Imama Muhammad Asafa ma le Faifeau o Semisi Wuye o se uo ma se paaga e lei mafaufauina o le filemu. Na la tutu faatasi e faatuina se nofoaga autu mo tapuaiga eseese. Ua la aoao atu nei isi ia suia le inoino i le faamoemoe. I le filifilia ai faalua o i la’ua mo le mauaina o le Faailoga Taualoa o le Filemu [Nobel Peace Prize], na avea ai talu ai nei i la’ua ma tamalii muamua ua mauaina le Faailoga Taualoa o le Filemu a Malo o le Taupulega.

O nei tamalii na avea muamua o ni fili, a o lea ua femalagaai faatasi i le toepoupouina o mea sa malepelepe, o ni molimau ola e faapea, o le valaaulia a le Faaola ia avea ma ni ē faatupuina le filemu e le gata ina mafai—ae e mamana.

A oo ina tatou iloa le mamalu o le Atua, ona “le ia te outou lea o se manatu e faamanu’a i le tasi, ae nonofo filemu.” I a tatou potopotoga ma o tatou pitonuu, ia tatou filifili e vaai atu le tasi i le isi o fanau a le Atua.

I lona aotelega, ou te tuuina atu se valaaulia. Ua faamalosia e le faatupuina o le filemu le faatinoga—o le a le uiga o lena mea ia i tatou, e amata atu taeao? Pe mafai ona e faia se fuafuaga e tasi-le-vaiaso, e tolu-laasaga o le tausia o le filemu?

1. O se sone e leai ni finauga i le fale: A oo ina amata se finauga, taofi ae toe amata i upu alofa ma galuega lelei.

2. Fauina o alalaupapa faaeletonika: A o lei tuuina se faamatalaga i luga, tali atu, po o ni faamatalaga i upega tafailagi, fesili, Pe o le a fauina i lenei mea se alalaupapa? A leai, toe tuu. Aua nei auina atu. Ae faasoa atu mea lelei. Talatala atu le [filemu] nai lo le inoino.

3. Toefaalelei ma toetuufaatasia: E mafai e aiga taitasi ona sailia se sootaga mautu ina ia faatoese atu ai, auauna atu, toefaalelei, ma toetuufaatasia.

Ua tele nai masina talu ona ou lagonaina lenei uunaiga e le mafaafitia na taitai ai a’u i lenei savali: “Amuia Ē Faatupuina le Filemu.” I le faaiuga, sei ou faasoa atu mea na uunaia ai lo’u loto i lenei taimi.

O le faatupuina o le filemu o se uiga faaKeriso. O le tagata e faatupuina le filemu o nisi taimi e laulau ai e valea pe vaivai—i ona itu uma. Ae, ina ia avea ma se e faatupuina le filemu e le faapea ia vaivai, ae ia malosi i se ala atonu e le malamalama ai le lalolagi. O le faatupuina o le filemu e moomia ai le lototoa ma le fetuunai, ae e le manaomia ai le ositaulagaina o le mataupu faavae. O le faatupuina o le filemu o le taitai ma se loto malamalama, ae le o se loto e le fia manao i ni manatu fou. O le faalatalata atu lea i le tasi ma le isi ma ni lima mafola, ae le o ni moto. O le faatupuina o le filemu e le o se mea fou, faatoa sau i fafo mai le masini lolomi. Sa aoao mai e Iesu Keriso lava Ia, ia i latou i le Tusi Paia, ma le Tusi a Mamona. Na aoao mai lava le faatupuina o le filemu e perofeta o ona po nei mai le popofou o le Toefuataiga e oo mai lava i le asō.

Tatou te faataunuuina la tatou matafaioi paia o ni fanau a se Tama Faalelagi alofa a o tatou tauivi ia avea ma ni ē faatupuina le filemu. Ou te tuuina atu la’u molimau ia Iesu Keriso, o le Alii o le Filemu, le Alo o le Atua soifua, i le suafa o Iesu Keriso, amene.