Ina Alu Ia Ma Ia E Faapea Ona Fai
Ou te fia faamamafaina na faifeautalai ua tofia i tofitofiga o auaunaga. O ni faataitaiga lava i latou ia i tatou.
A o femalagaai le Faaola i Petesaita, sa aumai e ni tagata se tagata tauaso ia te Ia. Atonu sa latou faamoemoe e vaaitino i se vavega. Sa tago atu le Faaola “i le lima o le tauaso, ma taitai atu ia te ia i tua o le aai” e faamalolo faalilolilo ai o ia. I le amataga, sa foliga e le’i aoga lelei le faamalologa. Sa “tepa a’e i luga le tagata ona fai mai lea o ia, ua ou iloa atu tagata ua faapei o laau, o loo savavali.” Sa toe “faaee [ma le mutimuti alofa e Iesu] ona aao i ona mata, ma fai atu i ai e tepa ae.” O lena pa’i faaopoopo o aao o le Faaola, ua “iloa lelei ai nei e le tagata.”
Ua na o se tasi lea o faataitaiga o le ala o loo faamatala ai le soifuaga o le Faaola i faatinoga lotomaualalo o auaunaga. Ua Ia faamanatu mai ia i tatou e faapea “E lei sau o ia ia auauna mai tagata ia te ia, a ia auauna atu ia” ona ia valaaulia lea o i tatou e mulimuli i Lana faataitaiga e ala i le alu i le maila faaopoopo, avatu ia i latou e ole mai ia i tatou, ma alolofa i o tatou tuaoi. Ina ua fesiligia, “O ai foi le tagata ma te tuaoi?” Sa faamatala mai e Keriso le faataoto i le Samaria agalelei ma le poloaiga “ina alu ia ma ia e faapea ona fai.”
O faifeautalai o Le Ekalesia a Iesu Keriso o le Au Paia o Aso e Gata Ai o ni faataitaiga faaonapo nei ia o Samaria agalelei ua valaaulia i tatou e Keriso ia avea ai. Ou te fia faamamafaina na faifeautalai ua tofia i tofitofiga o auaunaga. O i latou o ni faataitaiga ia i tatou o le ala ua (1) talaia ai e auaunaga ia loto i le talalelei a Iesu Keriso, (2) ua mafai ai e i tatou uma ona auauna atu po o a lava o tatou tulaga, ma le (3) aumaia ai le mana o Keriso i o tatou olaga.
Muamua, o Auaunaga e Tatalaina Loto i le Talalelei a Iesu Keriso
Pe tusa o le 91 TLM, o se faifeautalai o le Tusi a Mamona sa faailoa atu o ia lava i le Tupu o Lamonae i le faapea atu, “Ou te manao ou te nofo i totonu o lenei nuu mo se taimi; … [ma] o le a avea a’u ma au auauna.” Ona o lana auaunaga i le tupu, na tuu atu ai i a Amona se avanoa e “tautala atu ai ma le lototele, … ma faamatala atu [i le Tupu o Lamonae] po o le a le mana” na ia faatino ai lana auaunaga. O le taunuuga, na folafola atu e le tupu e faapea “soo se mea e manao ai [Amona] … o le a tuu atu [i ai e le tupu].” Na pau le talosaga a Amona ia faalogo le tupu i le savali o le talalelei a Iesu Keriso. O le taunuuga o le auaunaga a Amona “na aumaia ai le afe ma afe o tagata i le salamo.”
I o tatou taimi, o loo faaauau pea ona taitai mai e auaunaga isi i le talalelei. Sa auauna atu Sister Bevan o se faifeautalai faamisiona ae amata loa ona ia lagonaina ni faaletonu o le soifua maloloina, ma manaomia ai lona toe foi i le fale mo ni togafitiga. Nai lo le faamalolo o ia, sa mafai ona faaauau lona galue o se faifeautalai mo auaunaga mai le fale.
A o asiasi atu i se paka, sa uunaia Sister Bevan ma sana uo e talanoa i se tina ma sana fanau talavou e toafa, ae sa latou mumusu ma malaga ese atu. O le aso na sosoo ai, sa la toe foi i le paka, ma sa tatalo ia toe i ai iina lenei aiga. Sa o se vavega, sa saofai ai iina le tina i le mea lava e tasi pei o le aso muamua. O le taimi lea sa faalatalata atu ai Sister Bevan ma lana uo i le tina, ua faamasani, ma iloa ai o loo matuai moomia e ia se fesoasoani faaletino. Sa la tuuina atu le fesoasoani ona valaaulia lea o ia e aoao e uiga i le talalelei.
Ona o lena auaunaga ma le valaaulia, sa papatisoina le tina ma lana tama matua, ma sosoo ai ma le isi i se tausaga mulimuli ane. O loo tumau le avea o i latou ma tagata malolosi o le ekalesia i le taimi nei. Sa iloa e Sister Bevan o lea aafiaga na musuia mai le lagi ma “ua faamaonia ai ia te [ia] sa i ai [o ia] i le mea tonu na moomia e le Atua [o ia] ia i ai.”
E faapei o Amona ma Sister Bevan, tatou te auauna atu i isi, tatou te “faaali atu faataitaiga lelei ia i latou” ma e latou te mananao ia iloa le “mafuaaga o le faamoemoe ua ia i [tatou].”
Ua valaaulia i tatou e Iesu e “o ma ia faapea foi ona tatou faia.”
Lua, O le Auaunaga e Mafai ai e i Tatou Uma Ona Auauna Atu Tusa Lava Pe o a o Tatou Tulaga
Na valaauina e Peresitene Russell M. Nelson “tagata uma e agavaa, o alii talavou uma e mafai, ia sauniuni mo, ma ia auauna atu i se misiona” ma mo tuafafine uma foi e mafai, ia “tatalo ia iloa pe finagalo le Alii ia te [ia] e auauna atu i se misiona.” Na ia folafola mai e faapea, “o lau faaiuga e auauna atu i se misiona, pe o se misiona tala’i po o se misiona o auaunaga, o le a faamanuiaina ai oe ma le toatele o isi.” O misiona mo auaunaga ua suia ai le uiga o le upu mafai. O lea la o alii ma tamaitai talavou agavaa uma e mananao e auauna atu i se misiona talai mo le Alii ua mafai ona faia, ma ni nai tagata toalaiti e tuusaunoaina.
O Elder Holgado o se faataitaiga o le mafai ona auauna atu e ui i ona tulaga faaletagata lava ia. Sa fanau mai o ia ma se tulaga faaletonu uiga ese o le kenera, lea na taofia ai o ia mai le auauna atu i se misiona tala’i. Sa tofia Elder Holgado e avea ma faifeautalai o auaunaga, ma sa ofofua atu e galue i le faleteuoloa o epikopo lea sa ia fesoasoani ai i isi ia maua fesoasoaniga latou te manaomia. Sa ia faatutumuina fata, utupepa fualaau faisua, ma faamafolafola atigipusa.
Ina ua lauga Elder Holgado i le sauniga faamanatuga ina ua mae’a lana misiona, sa ia faamatala e faapea “E moomia e le Atua ia faifeautalai mo auaunaga. E moomia e Ia tagata ia alolofa ma auauna atu i isi. O nei tagata e tuuina i luga o fata pepa o faleui, faopepa broccoli, fau meaafale, ma e agalelei i tagata.”
E le manaomia le i ai o so tatou tofiga e auauna atu ai pe fai se pine o le igoa ina ia fai ai mea lelei. O faatinoga uma o le auauna atu e aloaia e le Faaola. E mafai uma lava ona tatou fesoasoani i isi e o mai ia Keriso e ala i le auauna atu ma le agalelei ma le alofa. Tatou te mafaia uma lava ona auauna atu i le suafa o Keriso i le toatasi e ala i le mana o le Agaga Paia, ma ola o ni faataitaiga o le faatuatua ia Iesu Keriso. O le auaunaga e mafai ai e i tatou ona tuuina atu i tatou lava o ni taulaga ola e taliaina i le Atua.
Ua valaaulia i tatou e Iesu e “o ma ia faapea foi ona tatou faia.”
Tolu, O le Auaunaga e Aumaia ai le Mana o Keriso i o Tatou Olaga
O se faifeautalai talavou sa toe suia mai se tofiga tala’i i se tofiga mo auaunaga, sa tauivi ma ni luitau patino na tuua ai o ia ua moomia le mana faamalolo o Keriso. O le auaunaga tuuto na aumaia ai lena mana i lona olaga. Fai mai a ia, “Na ou lagonaina ina ua ou tauivi, sa mafai ona ou lagonaina le si’i a’e o a’u i luga e Keriso. O loo i ai se mea faapitoa e uiga i le vaaia o Ia o faamanuiaina tagata e ala i se kapoti o meaai, i le malumalu, ma e ala i Lana talalelei.”
Sa amata e lenei faifeau ona lagonaina se olioli loloto atu, ma sa faamanuiaina o ia ma lona aiga atoa e lona naunautaiga fou na maua. Sa matuai faateleina le ulufale atu o le Agaga i lo latou fale, sa latou o faatasi e le aunoa i le malumalu, ma sa avea Keriso ma tulimataiga sili atu i lo latou aiga. Ua talitonu lenei faifeautalai na laveai e Keriso lona ola ma faamanuiaina lona aiga e ala i auaunaga.
Na aoao mai Peresitene Nelson, “O le naunautai e auauna atu ma faamalolosia ai isi ua avea o se faatusa o le saunia o se tasi ina ia faamaloloina” e le mana togiola o le Faaola.
Ua valaaulia i tatou e Iesu e “o ma ia faapea foi ona tatou faia.”
O Faifeautalai mo Auaunaga o ni Faataitaiga o Soo Faapaiaina o Iesu Keriso.
Pe a faamanuiaina oe po o se tasi o lou aiga i se valaauga o se faifeautalai mo auaunaga, o se taimi lena e patipatia. O le a i ai nei se sui o le Alii o Iesu Keriso ua vaetofia o le tou aiga e nofo i lo tatou fale. O le a suia ai outou uma mo le lelei. E le tatau ona i ai se le fiafia i soo se valaauga e auauna atu. Tatou te pepese, “Ou te alu i mea e te tofia” ma “Avea a’u pei na e tofia.” O se avanoa lenei e faaali atu ai e moni lava mea tatou te fai atu ai!
Ia te outou uma o loo auauna atu, aemaise i le silia ma le 4,000 faifeautalai talavou mo auaunaga, matou te alolofa ia te outou! Afai o faifeautalai tala’i o fofoga o le Alii, o lona uiga la o faifeautalai mo auaunaga, o aao o le Alii, ma e le o outou foi o ni faifeautalai vasega-lona lua. E taua outou taitoatasi i le faapotopotoina o Isaraelu. Na aoao mai Peresitene Nelson e faapea, “soo se taimi e te faia ai se mea e fesoasoani ai i se tasi e osia ma tausia a latou feagaiga ma le Atua, ua e fesoasoani e faapotopoto Isaraelu.”
O outou o faifeautalai mo auaunaga ua tele naua auala tou te faapotopoto ai Isaraelu i aso uma, ma ua suia olaga i la outou auaunaga. E tele taimi tou te le iloa ai pe o ai o faamanuiaina i la outou auaunaga, ae e silafia e le Atua. Ia manatua i taimi uma “aua na e [auauna atu] i le tasi o e aupito itiiti o o’u uso nei, … ua e [auauna atu ia te Ia].” Matou te faalogoina o outou leo a o outou volenitia i nofoaga tutotonu talitelefoni a le Ekalesia, matou te vaaia a outou ataata a o outou fesoasoani i faalapotopotoga i nuu, matou te lagonaina foi lo outou malamalama a o outou galulue i malumalu. Tou te fafaga i e fiaaai, faaoofu i e ua le lavalava, ma faainu i e fia feinu.
Tatou te manaomia ona o ma ia faapea foi ona fai.
O le Auaunaga o le Totoola lea o Soo o Keriso
Ua i ai i le auaunaga le mana e talaia ai loto i le talalelei ma mafai ai e i tatou uma ona avatu o tatou agaga atoa ia Keriso. E suia ai o tatou loto ia avea atili e faapei o Ia, ma i le faagasologa, tatou te siitia ai isi. Na i ai se taimi na fesili ai Peresitene Nelson, “I lenei lalolagi ua palagia faaleagaga, pe mafai e tagata taitoatasi … ona faia se eseesega?” O lana tali: “Ioe! … ‘O le nuu o le feagaiga a le Atua, … ua faaaupegaina … i le mana o le Atua i le mamalu tele’ … e mafai ona siitia olaga o tagata uma.” O auaunaga tatou te suia ai loto—ma le lalolagi.
Sa “femaliuai Keriso ma agalelei.” Sa Ia auauna atu i tagata mamai, tuuina atu le vaai i lē na tauaso, ma asiasi atu i a i latou na agaleagaina. Sa Ia kukaina taumafa, sa fesoasoani i le tausamaaga o le faaipoipoga, ma fafagaina le faitau afe o i latou sa fiaaai. A o tatou tuuina atu auaunaga i le suafa o Keriso i le toatasi, e faateleina ona tatou paia ma agavaa mo le meaalofa o le ola e faavavau. O loo soifua Iesu Keriso. O Ia o lo’u ma lou Faaola. O Ia o lo tatou Togiola. O Ia o lo tatou faataitaiga sili o auaunaga. Ou te valaaulia i tatou taitoatasi ia o ma ia faapea ona fai. I le suafa o Iesu Keriso, amene.