O le Talalelei a Iesu Keriso: O se Leo Fiafia

Saunia e Elder Gary E. Stevenson

O Le Korama a Aposetolo e Toasefululua

O le talalelei toefuataiina e aumaia ai le faamoemoega ma le olioli ia te oe i lau malaga agai i le ola e faavavau.

A o auauna atu o se taitai misiona i Iapani i ni nai tausaga ua mavae, sa ou faia ai se faatalanoaga ma se alii sa auai i le Ekalesia i le tausaga talu ai ma sa saili ia maua se pepa faataga o le malumalu.

I le taimi o la ma talanoaga, sa faamatala ai e lenei tagata fou lona matua faafetai lava mo faamanuiaga na ia mauaina i le tausaga talu mai lona papatisoga. Ia te au a ia, sa ia faaalia se talitonuga o le feagaiga e mafua mai i lona malamalamaaga i le talalelei, lea sa mauaa loloto ia te ia. O ia o se soo liua o Iesu Keriso o le na oo i se liuga tele o le loto (tagai Mosaea 5:2).

Ina ua maea le faatalanoaga, sa ou ta’u atu i le peresitene o le itu lo’u faagaeetia ona ua maua e faifeautalai ma tagata o le ekalesia, ma faafaileleina faaleagaga, se alii maoae o loo i ai se gafatia tele.

Sa ou maofa i le iloaina ina ua amata ona feiloai lenei alii ma faifeautalai ma auai i le lotu, sa leai sona fale ma sa toetoe lava a leai se faamoemoe. O le suesueina e lenei uso o le talalelei ma lona liua i le alua’i o nai masina na taitai atu ai i lona suiga faavavega, ma tuu ai o ia i luga o se ala o le ola tutoatasi faaleagaga ma faaletino ma le olioli.

Na tuuina mai e le talalelei i lenei uso se ata manino o le faamoemoega o lona olaga. O upumoni manino ma taua o le talalelei na aumaia ai ia te ia tali i fesili taua o le olaga faaletino. O na faamanuiaga e tutusa lava le avanoa mo oe ma fanau uma a le Atua e ala i le talalelei a Iesu Keriso.

O le Faamoemoega o le Olaga

Na Toefuataiina mai le Talalelei a Iesu Keriso e ala i le Perofeta o Iosefa Samita. I lana molimau faaiu i le Ekalesia, na saunoa ai Peresitene M. Russell Ballard (1928–2023), ao–Sui Peresitene o le Korama a Aposetolo e Toasefululua:

“Ua tatou iloa po o ai le Atua; ua tatou iloa po o ai le Faaola aua ua ia i tatou Iosefa. …

“… E matua faamanuiaina i tatou i le iloaina o mea ua tatou iloa e uiga i lo tatou faamoemoega i le olaga, le mafuaaga ua tatou i ai iinei, le mea e tatau ona tatou taumafai e fai ma ausia i o tatou olaga i aso taitasi.”

Mo tagata o Le Ekalesia a Iesu Keriso o le Au Paia o Aso e Gata Ai, o lena malamalama e aofia ai se malamalamaaga i le “fuafuaga atoatoa” o le faaolataga a le Atua ua lauiloa foi o “le fuafuaga sili o le fiafia,” “o le fuafuaga o le togiola,” ma “le fuafuaga o le alofa mutimutivale” (Alema 42:8, 11, 15). O le fuafuaga a le Atua ua “aveesea ai le mealilo mai i o tatou olaga ma masalosaloga ma le lē mautonu mai lo tatou lumanai.” O le taua ma totonugalemu i lena fuafuaga ma le faamoemoega o le olaga o “le aoaoga faavae a Keriso.”

E ala mai i le talalelei, ua tatou iloa ai o i tatou o fanau a le Atua, na auina mai i le lalolagi ina ia tofotofoina ma saunia e toetutu mai (tagai Mataupu Faavae ma Feagaiga 76:39). Ua tatou iloa poloaiga ma ua aoaoina ia “iloa le lelei mai le leaga” (2 Nifae 2:5). Ua tatou iloa ua tatou i ai iinei e alolofa ma auauna atu ma ua valaauina i tatou e le Faaola e faatoilalo le lalolagi ma fesoasoani i isi e faia foi faapea (tagai Ioane 16:33).

O le mea na ta’ua e Iosefa Samita “o le leo faamalosiau o le Talalelei a lo tatou Alii o Iesu Keriso” o le a faamalosia ai i tatou i aso faigata ma aumaia ai le uiga ma le faamoemoega ia i tatou ma isi.

Usiusitai ma Faamanuiaga

Ua tuuina mai e le Atua ia i tatou le faitalia o amioga mama ina ia mafai ona tatou tali atu mo a tatou filifiliga (tagai Mataupu Faavae ma Feagaiga 101:78; tagai foi 2 Nifae 2:16). I le avea ai o se vaega o le “faafeagai i mea uma” (2 Nifae 2:11), ua faatagaina ai Satani e faaosoosoina i tatou e faaaoga sese lo tatou faitalia.

I o tatou aso, ua valaauina e le Alii o Iesu Keriso le Perofeta o Iosefa Samita “ma tautala atu ia te ia mai le lagi, ma tuu atu ia te ia poloaiga” (Mataupu Faavae ma Feagaiga 1:17). O loo faaauau pea ona faaali mai e le Alii Ana poloaiga ma Lana finagalo i Ana perofeta i aso nei, ona e finagalo o Ia e taitai i tatou i le fiafia i lenei olaga ma i le mamalu selesitila i le isi olaga a sau.

O le usiusitai i poloaiga a le Atua e tatau ona sau mai lo tatou tuuto ma le alofa mo Ia. Na folafola mai Iesu Keriso, “Afai tou te alofa mai ia te au, ia outou tausi mai i a’u poloaiga” (Ioane 14:15). O le laualuga o le faaalia o lo tatou alofa mo le Alii e ala i le tausia o Ana poloaiga o faamanuiaga e aumaia ai le fiafia ma le olioli (tagai Mataupu Faavae ma Feagaiga 130:20–21).

Faatasi ai ma se vaaiga manino i lo tatou tupuaga paia ma lo tatou taunuuga, ua tatou iloa ai “o mea tonu lava o le a avea ai [o tatou] olaga faaletino ma mea sili e mafai ona avea ai, o mea tonu lava ia o le a avea ai [o tatou] olaga i le faavavau atoa ma mea sili e mafai ona i ai!”

Olioli i Lau Malaga

O le tagata liliu mai ma le fiafia sa ou feiloai i ai i Iapani i tausaga ua mavae, na ia mauaina le talalelei toefuataiina a Iesu Keriso e ala i le filigā o ia, faifeautalai ma tagata o le ekalesia. Sa ia iloaina lona faamoemoega ma faalauteleina lana vaaiga mamao i le fuafuaga sili o le fiafia, lea na aumaia ai ia te ia faamanuiaga ma le olioli ma na siitia ai o ia i le itu faaletino ma le faaleagaga.

Na aoao mai Elder Patrick Kearon o le Korama a Aposetolo e Toasefululua:

“Ona o le fuafuaga alofa a lo tatou Tama Faalelagi mo Ana fanau taitoatasi, ma ona o le soifua togiola ma le misiona a lo tatou Faaola, o Iesu Keriso, ua mafai ai ona tatou—ma e ao ai lava -- ona avea i tatou ma tagata e sili ona fiafia i le lalolagi! Tusa lava pe fesasaa’i i o tatou luga afā o le olaga, a o tatou i ai i se lalolagi e tele ina pagatia, e mafai lava ona tatou atia’e se lagona e faatupula’ia ai ma mausali ai le olioli ma se toafilemu i totonu, ona o lo tatou faamoemoe ia Keriso ma lo tatou malamalama i lo tatou lava tulaga i le fuafuaga matagofie o le fiafia.”

Ou te ofoina atu lo’u agaga faafetai mo, ma la’u molimau i, le talalelei toefuataiina a Iesu Keriso ma le fuafuaga sili o le fiafia. Ou te valaaulia outou ia aai ma feinu i fua o le talalelei ma lagona le olioli sili atu i la outou malaga agai i le ola e faavavau.