Pe a Mavae Lenei Olaga
Tali i Nisi o Fesili
O le fuafuaga a le Tama Faalelagi e mafai ona tatou maua ai se vaaiga agatonu ma le filemu e uiga i le olaga pe a mavae le oti.
Ata na tusia e Thomas Arnaud
O le a le mea e tupu pe a tatou oti?
Atonu o le fesili lenei i lotu uma. O tali ua tatou maua e ala mai ia Iesu Keriso ma Lana talalelei e mamana. O lenei olaga e le o le iuga lea. Ona sa toetu Iesu Keriso, o le a toe faatasia o tatou agaga ma o tatou tino, ma o le a toetutu uma i tatou i se aso.
Ioe, e i ai isi faamatalaga e uiga i le olaga pe a mavae le oti ua oo mai ia i tatou e ala i faaaliga faaonapo nei e mafai ona taliina ai isi fesili, atonu o i ai ia i tatou. O nisi nei o fesili faapena, faatasi ai ma ni tali puupuu.
E faapeī ia tino agaga?
O le agaga o se ituaiga o mea e tino mai, ae “ua sili atu ona lelei pe mamā” (Mataupu Faavae ma Feagaiga 131:7). O tino agaga e foliga mai o ni tino o tagata matutua.
O fea o i ai le lalolagi o agaga?
O le ā le mea e tupu i le lalolagi o agaga?
Faatasi ai ma isi mea, o agaga o ē ua taliaina le talalelei ua faatulagaina e talai atu le talalelei i agaga e lei taliaina le talalelei. E mafai e na agaga ona filifili e talia pe teena.
E faapeī ia tino toetutu?
E le mafai ona oti tino toetutu, o aano ma ivi, ma e atoatoa. E mamalu ma matagofie. “E leai se mea e sili atu ona matagofie e vaai i ai nai lo se alii po o se tamaitai toetu.”
O le a le mea o tupu i le malo selesitila?
O i latou o loo i le tikeri aupito maualuga o le malo selesitila e avea e faapei o lo tatou Tama Faalelagi ma maua le atoatoaga o le olioli. Latou te maua mea uma o loo i le Tama. Latou te auai i Lana galuega ma Lona mamalu. Sa faamauina i laua i le faaipoipoga mo le faavavau ma o loo nonofo nei i aiga e faavavau, ma maua ai a laua lava fanau agaga e faavavau.
Ae faapefea tagata e le faaipoipo lava i lenei olaga?
E atoatoa le faamasinotonu ma le alofa mutimutivale o le Tama Faalelagi. “Ua folafola mai e le Alii e faapea, i le faavavau, e leai se faamanuiaga o le a taofia mai i ona atalii ma afafine o ē tausia poloaiga, e faamaoni i a latou feagaiga, ma naunau i mea e tonu.”
Sa faamauina o‘u matua i le malumalu, ae o le taimi nei ua tatala le la faaipoipoga. O ai la ua faamauina ai au?
Atonu na e “fanau mai i le feagaiga” (o lona uiga, na e fanau mai ina ua uma ona faamauina ou matua i le malumalu), pe atonu foi, na faamauina oe i ou matua i le malumalu ina ua uma ona faamauina i laua i le tasi ma le isi. Po o le a lava le tulaga, e tumau pea le faamalosia o ou faamanuiaga e tusa lava pe filifili ou matua e tatala le la faaipoipoga ma faaleaogaina lo la faamauga.
O filifiliga a ou matua e le aafia ai ou faamanuiaga. O le mea taua o le tumau faamaoni ma saili faamanuiaga o le malumalu e oe lava ia. E tusa ai ma a outou sootaga faaleaiga, e tatau ona outou “faalagolago i le Alii ma saili Lana faamafanafanaga,” ma le iloaina “O le a faamautinoa e le Tama Faalelagi e maua e tagata taitoatasi faamanuiaga uma e mafai ona maua e ona manaoga ma filifiliga.”
O le ā le mea e tupu i tagata e maliliu ona o le pule i le ola?
Tatou te le iloa le mea e tupu i tagata e maliliu i le pule i le ola, ma e le mafai ona tatou faamasinoina i latou (e pei lava o tagata uma, i le iuga). “E ui i ni taumafaiga aupito sili a i latou o e alolofa, taitai, ma faapolofesa, e le mapuipuia i taimi uma le pule i le ola.
“E le sa’o mo se tagata le pule i lona lava ola. Ae peitai, e na o le Atua e mafai ona faamasino i mafaufauga, faatinoga, ma le maualuga o le iloa ona tali atu o le tagata lava ia (tagai i le 1 Samuelu 16:7; Mataupu Faavae ma Feagaiga 137:9). …
“O i latou e maliu se e pele ona ua pule i le ola, e mafai ona maua le faamoemoe ma le faamalologa ia Iesu Keriso ma Lana Togiola.”