Faasoaina Atu o le Talalelei … i se Paka o Faafiafiaga?

Sa ou alu talu ai nei i se paka faafiafia ma ni uo mai le lotu. A o ma tutu ma la’u uo o Evie i le laina mo se faaseeafi, sa amata ona talanoa mai se alii talavou e igoa ia Erik ia i ma’ua e uiga i lana alaata o le YouTube. Sa ia talanoa mo le 15 minute e uiga i le auala na ulagia ai o ia e nisi tagata i lana aoga ma fai atu ia te ia e tapē lana alaata.

I le lotu, sa lu’iina i matou e o matou taitai e ave se taiala mo le Malosi o le Autalavou ma faasoa atu i se tasi. Sa foliga mai sa i ai ni faafitauli ia Erik ma ana uo, o lea sa ou manatu ai atonu e mafai ona fesoasoani le taiala ia te ia.

Sa ou tosoina i fafo ma fai atu ia te ia e ave ma ia. Sa ia fesili mai po o le a lena mea, ma sa ou faamatala atu e mai la’u Ekalesia ma e mafai ona fesoasoani ia te ia e faia ai ni faaiuga lelei ma aoao ai o ia i isi mea mananaia. Sa ou fai atu ia te ia e tatau ona ia faitauina pe a i ai sona taimi. Sa ia fai mai OK, momono i lana taga, ma faaauau pea ona talanoa e uiga i lana alaata o le YouTube.

Ou te le iloa pe na ia faitauina le taiala, ae o lenei aafiaga na aoaoina ai au e mafai ona avea oe ma se faifeautalai i soo se vaitausaga, i soo se nofoaga—e oo lava i se paka o faafiafiaga.