O Laau ‘Peach’ ma le Alualu i Luma e Faavavau

E silafia e le Tama Faalelagi le mea e mafai ona avea ai oe. Aua nei e faamalieina i se mea faatauva’a.

Saunia e Madelyn Maxfield

Mekasini a le Ekalesia

Ina ua totōina e lo’u aiga se laau o le ‘peach’ i lo matou tuafale, sa amata ona ou moemiti e uiga i le pai peach e faia i le fale. Ae o le tama’i laau sa matou totoina sa laitiiti, ma sa na o ni nai lālā lauiti. Sa foliga mai o se fua lava e tasi o le ‘peach’ e ono mafuli atoa ai le laau.

Ina ua mavae ni nai taumafanafana, sa oo ina umi, lauusiusi le laau, ma matagofie. Sa fiafia i ai manulele, ma sa fiafia lo’u aiga i le paolo na maua mai ai. Ae sa lei faia lava le mea sa tatau ona fai—o le fua o ni ‘peache’!

Sa alu ni na nai tausaga ae faatoa amata ona maua ni fua i luga o le laau. Sa na o ni nai ‘peache’ laiti, ae sa sili atu lea nai lo le leai o se mea. Na alu ai se isi taumafanafana mo le laau e amata ai ona ola a’e ni ‘peache’ lapopoa ma suamalie (ua iu lava ina maua!) e faia ai le pai sa ou moemiti i ai.

Semanu e le maua e lo’u aiga lena pai pe ana faapea matou te tuuina le laau e pē ma lē ola. O le tama’i laau, o le paolo, ma le fua laitiiti e le leaga, ae sa matou iloaina sa i ai i le laau le gafatia mo nisi mea sili atu. Sa i ai lava i taimi uma le avanoa e tuputupu a’e ai pea.

E talitutusa lena ma le auala e silasila ai foi le Tama Faalelagi ia i tatou.

Faaolataga ma le Faaeaga?

E masani ona tatou ta’ua le fuafuaga a le Tama Faalelagi mo i tatou o le “fuafuaga o le faaolataga,” ae o le a le faaolataga? E faapefea ona fesootai atu i le faaeaga?

Faaolataga “o lona uiga ia faasaoina mai le oti faaletino ma le oti faaleagaga.” E na o le Togiola ma le Toetu o Iesu Keriso e mafai ai lenei mea. Ona o Ia, o le a toetutu ai tagata uma ma ola e faavavau (tagai i le Mataupu Faavae ma Feagaiga 76:39–42). Ma ona o Ia, ua mafai ai ona tatou salamo ma faamagaloina mai i a tatou agasala.

Ae afai e muta iina sini a le Tama Faalelagi mo i tatou, ua pei o la’u laau ‘peach’ ua na o le faaogaina mo se paolo. Na te silafia e mafai ona tatou gafatia le tele o isi mea.

Faaeaga “e faasino i le tulaga aupito maualuga o le fiafia ma le mamalu i le lalolagi selesitila” ma e aofia ai le ola faatasi ma le Tama Faalelagi, Iesu Keriso, ma o tatou aiga e faavavau (tagai i le Mataupu Faavae ma Feagaiga 76:62, 70). O lena mea e aofia ai faamanuiaga o le alualu pea i luma pe a mavae lenei olaga—e faavavau! Ona o i tatou o Ana fanau, e mafai ai ona tatou tuputupu a’e e avea faapei o Ia.

Saunia mo le Faaeaga

E ui ina ofoina atu le faaeaga i tagata uma, o loo i ai nisi o mea e tatau ona tatou faia e faaali atu ai i le Atua ua tatou naunau moni lava e maua lenei meaalofa. Ua a’oa’o mai tusitusiga paia ma perofeta e faapea, o tulaga mo le mauaina o lenei meaalofa e aofia ai lo tatou:

Talia Iesu Keriso o lo tatou Faaola ma faatino le faatuatua ia te Ia.
Ia papatisoina ma maua le meaalofa o le Agaga Paia.
Osia ma tausia feagaiga o le malumalu.
Tumau e oo i le iuga e ala i le tausia o poloaiga.

I tala atu o faamanuiaga vave mo le usiusitai, o le ola i tulafono a le Atua ma faatagaina lou natura ina ia suia e ala ia Iesu Keriso e saunia ai oe e maua le meaalofa o le faaeaga. Ua Ia faatulagaina ia taiala. O le mulimuli ma le faamaoni i Lona ala ua na o le pau lea o le ala e faaeaina ai.

E Mafai Ona E O’o I Ai

O oe o se atalii ma se afafine o le Atua, ma ua Ia ofoina mai ia te oe mea uma ua ia te Ia. Aua nei e faamalieina mo soo se mea e itiiti ifo nai lo le faaeaga.

E alofa le Tama Faalelagi ia te oe. Sa Ia saunia lenei fuafuaga aua e finagalo o Ia e fesoasoani ia te oe ia e o’o i ai. E pei ona saunoa mai Elder Patrick Kearon o le Korama a Aposetolo e Toasefululua, “Pe o i ai ea ni mea e tatau ona tatou faia, poloaiga e tausia, o vaega o o tatou natura ia suia? Ioe. Ae faatasi ai ma Lona alofa tunoa, o na mea, e gafatia ona tatou faia, e le o mamao ese mai la tatou aapa atu.”

I le taimi nei, atonu e te lagona le vaivai ma le lē atoatoa. Ae o le Tama Faalelagi o le Faitogalaau Sili, ma Na te silafia e sili atu oe nai lo o se tama’i laau. O oe o se laau fuga o loo tuputupua’e, ma o le a Ia faafaileleina oe, tausia oe, ma saunia oe mo le mea e ono avea ai oe.