O Loo Faatasi Pea le Atua ma Oe

Ina ua valu o’u tausaga, sa feiloai faifeautalai i lo’u tina matua ma le uso o lo’u tina i le auala. Ina ua uma ona aoao e uiga i le talalelei, sa papatisoina i matou uma. Ae peita’i, i le 2020, na taofi ai ona matou toe o i le lotu ona o le KOVITI. Na i’u lava ina matou le toe talitonu.

I le lua tausaga ua mavae, ou te lei talitonu foi i le Atua pe iloa pe moni o Ia. I se tasi aso i le uma ai o le aoga, sa ou manao ai e sopoia le auala e faatau ai se meaai māmā. Ae na fai mai se leo ia te au ia aua nei ou sopoia le auala. Sa ou tu, ma sa feto’ai ni taavale se lua i o’u luma tonu lava. Ana faapea ou te sopoia le auala, semanu e taia au e taavale pe atonu foi e fasiotia ai au. Ae na ou iloaina sa silafia au e le Atua ma e alofa ia te a’u. E ui lava ou te lei talitonu ia te Ia ma ou te lei auai i le lotu i lena taimi, ae sa alofa pea o Ia ia te a’u ma puipuia a’u.

Sa amata ona ou toe faitauina le Tusi a Mamona ma ou iloa ai o le afioga a le Atua. Sa amata foi ona ou toe alu i le lotu. A ou alu i le lotu, ou te lagona le filemu, alofa o le Atua, ma Lana fesoasoani. Ou te lagona o loo Ia faatasi pea ma au, ma o lena mea ou te fiafia i ai.

O le viiga e sili ona ou fiafia i ai o le “O Au o se Atalii o le Atua” auā e faamanatu mai ai ia te au e alofa le Tama Faalelagi ia i tatou ma e fesoasoani mai ia i tatou. Ou te fiafia foi i le mau 2 Nifae 2:27, lea o loo talanoa mai ai e uiga i le auala tatou te saoloto ai e filifili i le va o le sa’o ma le sese.

I le tele o masina ua mavae, na amata ai ona ma o ma lo’u tuagane i le lotu, ae ina ua mavae sina taimi, sa ia taofi lana toe auai. E popole o ia i manatu o ana uo ma isi e uiga ia te ia. E manatu o ia o se mea maasiasi le alu i la matou lotu, ae ou te fai atu ia te ia, e le taua manatu o ana uo. O le manatu o le Atua e taua.

E le ō lo’u aiga i le lotu. Ou te alu nao au. Talu ai e leai se pasi i lo’u auala e agai atu i le fale lotu, ou te savali ai pe tusa ma le 30 minute e oo atu ai iina. E popole lo’u aiga i manatu o isi tagata o le a fai e uiga ia i latou, ae ou te fai atu e le afaina auā ou te iloa e moni.

Pe a ou feiloai ma a’u uo, o nisi taimi latou te inu ai le kofe. Ma a ou vaai i lena mea, o nisi taimi, ou te fia inu ai foi le kofe. Ae ou te manatua o loo faatasi le Atua ma au. Na te uuina lo’u lima ma fesoasoani mai ia te a’u. Ou te faalogoina se leo o fai mai ia te au e aua nei faia, ma ou te iloa o loo fesoasoani mai le Atua ia te au e faatoilalo nei luitau.

Afai ou te tuuina atu se fautuaga i se tasi o i ai i lo’u tulaga, ou te fai atu ia te i latou ua matuā faamanuiaina lava oe, ma e telē lou faatuatua. E le o tuua na o oe, auā e mafai e tagata o le Ekalesia ma faifeautalai ona tuuina atu ia te oe fautuaga lelei. E alofa le Atua ia te oe. O oe o Lona atalii po o Lona afafine, ma e finagalo o Ia e fesoasoani ia te oe.