O Le Susulu o le La i O’u Afa

Talu ai nei, sa ou oo ai i se mea faigata tele. Ua tetea lo’u tama ma lo’u tina, ae faigaluega lo’u tina i se isi atunuu. Sa ou ola a’e faatasi ma lo’u tina matua—o ia lea na faailoa mai ia te a’u le talalelei ma le Ekalesia. Ae o le tausaga lenei, na maliu faafuasei ai o ia.

O ia le tagata mulimuli na ou manatu o le a oti. O nisi taimi sa ou manatu ai o le a muamua ou oti ia ia ona sa matuā maloloina lava o ia! E lei faaalia lava lona vaivai ma sa malosi i taimi uma i o’u luma. Ou te lei mafaufauina lo’u olaga e aunoa ma ia.

Ina ua maliu o ia, sa ou moomoo i nisi taimi pe ana mafai foi ona ou oti. Sa i ai ni ou mafaufauga e uiga i le faamutaina o lo’u lava ola. E lei umi ae ou alu i se gaoioiga a le autalavou a le siteki lea sa i ai sa matou lesona e uiga i le fuafuaga o le faaolataga.

Sa ou iloa e uiga i le fuafuaga o le faaolataga, ae atonu sa fai si puaoa o lo’u malamalamaaga ona o le mea na tupu i lo’u tina matua. A o ou faalogologo, sa ou mafaufau, “Ua galo ia te a’u faamanuiaga o le taulaga a Iesu Keriso mo a’u.”

Sa ou iloaina na maliu Iesu Keriso e laveai au. E le tatau ona faamutaina lo’u ola ona o faafitauli o loo ou maua ai. O le fuafuaga o le fiafia ua aumaia ai ia te au le faamoemoe e mafai ona ou toe vaai i lo’u tina matua i se aso, auā e le muta le olaga pe a tatou oti. E tatau ona ou mulimuli pea i le Faaola ina ia mafai ona ou toe vaai ia te ia.

Ina ua maliu lo’u tina matua, sa malaga mai lo’u tausoga matou nonofo faatasi ma na avea ai o ia ma le tagata e vaaia au. O o’u tausoga o a’u uo mamae, ae sa matuai faigata pea le suiga. Sa manomia ona ou aoao e fai feau uma sa masani ona faia e lo’u tina matua. Sa manaomia ona ou ala a’e mo le aoga ma teu le fale.

Sa talanoa lava lo’u epikopo e uiga i le ola tutoatasi, o lea sa ou saili ai i le Potutusi o le Talalelei. Na fesoasoani ia te a’u e aoao ai e tu i o’u lava vae e lua.

O loo ou fesootai pea ma lo’u tamā. I se tasi aso, sa ma finau ai. Sa ou matuai tauivi lava ma lena mea, ae na faafuasei lava ona i ai se avanoa e alu ai i se malaga a le autalavou i le malumalu. A o ou i ai i le malumalu, sa ou lagonaina le filemu. Ou te lei mafaufau i faafitauli i le aiga. Ou te lei mafaufau i lo’u ita sa i ai mo lo’u tama. Sa ou mafaufau i mea e mafai ona ou faia e fesoasoani ai ia te ia. Sa ou mafaufau e uiga i le avea ma se faataitaiga lelei. Sa ou mafaufau i mea e faavavau, e uiga i le faamauina faatasi ma o’u matua i le malumalu i se aso. Sa ou filifili e faamalie atu i lo’u tama ona o le taua’imisa ma ia.

Ua ou aoao e taulai atu pea ia Iesu Keriso ma le Tama Faalelagi. Ou te maua lo’u malosi mai ia i La’ua, ma ou te manatua o loo ’au La’ua ma au.

O le malamalama i le fuafuaga o le faaolataga, aemaise lava le Togiola a le Faaola, na fesoasoani ia te au e faatoilalo ai ou mafaufauga o le pule i le ola. E fesoasoani ia te au e lagona ai le filemu i lou olaga. E aumaia ia te au le faamoemoe e mafai ona ou toe feiloai i lo’u tina matua i le isi itu o le veli i se aso.

O Iesu Keriso o le faamoemoe lea e faaauau ai lo’u olaga e ui lava i le tele o ni ou luitau. O Lona alofa mo au e le muta. O Ia o le susulu o le la i lo’u olaga. A matagi pe timuga, o loo i ai o Ia iina. O Ia o lo’u Faaola. O Ia o lo’u aiga. O Ia o lo’u ola. Na te faaauau pea lou alualu i luma. O ia o se tasi o mafuaaga ou te fiafia ai e ola.