Fesoasoani ma le Taiala mo Lou Lumanai

Sa 17 ou tausaga ina ua asiasi atu le perofeta, o Peresitene Spencer W. Kimball (1895–1985), i Korea i Saute i le 1975. Sa ou vaai ia te ia i se fonotaga lea na faapotopoto ai le tusa ma le 400 talavou Korea e faalogo i lona leo.

Sa faasoa mai e Peresitene Kimball le auala na ia suesue ai i tusitusiga paia ma tatalo i aso uma talu mai lona laitiiti. Sa ia talanoa e uiga i le taua o le faatulagaina o mea e faamuamua. Sa ia fai mai e tatau ona matou auai i le seminare, saunia mo misiona ma faaipoipoga e faavavau, ma galulue agai i le faaolataga. Sa ia tuuina atu foi lana molimau.

Na faamalamalamaina lo’u mafaufau i upu a le perofeta. Sa ou i ai i le aoga maualuga, ae ou te le’i fiafia i meaaoga. Na ou fiafia i taaloga! Sa ou taalo soka i soo se taimi lava ou te maua ai le avanoa ma e masani ona ou taalo nai lo le suesue. E le o a’u o se tamaitiiti aoga lelei. Ina ua uma ona ou faalogo i le perofeta, sa ou fiafia pea i le soka, ae sa ou filifili e faatulaga ni mea e faamuamua.

O le a ou faia le mea sili ou te mafaia e suesue ai. O le a ou auauna atu i se misiona, faamauina i le malumalu, ma maua se aiga fiafia. Sa ou iloaina, afai ou te maua lenei lumanai maoae, e manaomia ona ou mulimuli i le perofeta—e tusa lava po o le a.

Faatasi ai ma avanoa ma luitau uma o le a e feagai, o le a e lelei a o e mulimuli i le taitaiga ua saunia e perofeta soifua.

Sa ou faia le tautinoga e auauna atu i se misiona, ae o loo i ai foi se auaunaga faamalosia faamiliteli i Korea i Saute. Ina ua maea le aoga maualuga, e toatele alii talavou na ulufale atu i le militeli, faataunuuina a latou auaunaga faamalosia, ma sa vave ona tulitulimatagauina se aoga ma maua ai ni galuega. Sa faigata ona toe tuuina atu le isi lua tausaga i le galuega faafaifeautalai. Sa na o ni nai faifeautalai Korea i lena taimi.

Ina ua atoa lo’u 19 tausaga, sa ou tausia la’u tautinoga ma saunia ma auina atu pepa o la’u misiona. Na valaauina a’u e galue i le Misiona a Korea Busan. I le tasi le tausaga mulimuli ane, na ou auai ai i le militeli. Sa ou matua faanoanoa lava ma sa tatau ai ona ou taofia la’u misiona.

Ina ua maea la’u auaunaga faamiliteli i le tolu tausaga mulimuli ane, sa ou lagonaina ou te lei faamaeaina la’u misiona. Sa fai mai tagata uma ia te au, “Ua uma ona e auauna atu i se misiona. E malamalama le Alii i lou tulaga, o lea, e le afaina le auauna atu ai mo na o le tasi le tausaga.”

Sa ou fesili atu i la’u uo lelei mai le seminare po o le a se mea e tatau ona ou faia. Sa ia fai mai na te iloa o le a ou auauna atu i se isi tausaga o la’u misiona. O lona faatuatuaina, na ou maua ai le lototele ma le faamautuina e auauna atili ai. Sa ou auauna atu i le tausaga lona lua o la’u misiona i le Misiona a Korea Seoul. E oo ane i le taimi na uma ai, ua 25 o’u tausaga. Sa ou faaipoipo mulimuli ane i lena lava uo ma sa faamauina i ma’ua i le Malumalu o Laie Hawaii.

O lenei aafiaga na aoaoina ai au o le a e lelei e tusa lava pe le tupu ni mea i le ala na e mamanuina. Pe a fetaui au fuafuaga ma le vaaiga mamao ma le finagalo o le Alii mo oe, o le a Ia fesoasoani ia te oe i au filifiliga o le olaga.

E ui lava sa ou le mautinoa a o ou talavou po o le a le ituaiga olaga o le a ou maua, ae sa ou iloaina o le faamuamuaina o mea faaleagaga o le ki lea mo le manuia—e le gata i lenei olaga, ae faapea foi i le olaga a sau.

Ina ua papatisoina oe, na e maua le meaalofa o le Agaga Paia. A o e taulai atu i uunaiga e te maua, o le a puipuia oe e le Agaga Paia ma taialaina oe i le ala sao e te alu ai. O le a e lagonaina foi le mafanafana ma le filemu.

A o e sauniuni mo lou lumanai, ia manatua e:

• Suesue i tusitusiga paia.

• Faaauau le tatalo.

• Mulimuli i le perofeta.

• Faalagolago pea i le Alii.

A o ou matua pei o outou, sa ou aoao i uiga o le Faaola ma Ona amioga ma le auala e mafai ai ona ou avea atili e faapei o Ia. Ua atoatoa o Ia. E le mafai ona ou avea atoatoa e faapei o Ia i lenei olaga, ae o loo ou taumafai i le mea sili ou te mafaia, ma ua sili atu lo’u lelei i le faia o lena mea.

Ou te iloa o loo soifua Iesu Keriso. Ona o Ia, ua i ai so’u faamoemoe tele mo le lumanai—ma e mafai foi ona e faia!