Pe a Foliga Mai e Tetelē Tele Tofotofoga
O luitau o se vaega lea o le olaga. Ae faatasi ai ma le fesoasoani, e mafai ona tatou vaai i ai e ala i le vaaiga a le Atua.
O le mauga o Timpanogos o se mauga i Iuta, ISA, e 11,000 futu (3,353 m) le maualuga ma e tumu i vaitafe, puipui papa, vao, ma meaola. O le tu i le pito i lalo o se mauga faapenei e mafai ona e lagona ai le laitiiti. E le mafai ona e vaai i luga atu ma e le so’o lou vaai pe a faataamilo i ai. E mafai ona foliga telē tele ma e le mafai ona faatoilaloina.
Ae peitai, o le 10 minute le mamao mai le Mauga o Timpanogos e mafai ai ona ese lou vaai i ai. Mai lenei vaaiga, e mafai ona e matauina auala ua faailogaina ma auala ua tipiina i le mauga. O nei mea ua faaalia ai sa i ai muamua isi iina ma o loo i ai se auala saogalemu i luga ma autafa o le mauga.
O tofotofoga i lou olaga i le taimi nei atonu e tutusa lava lagona. O le feagai ai ma luitau faigata e mafai ona lagona ai le pei o le sioa atu i mauga tetele, e le mafai ona e vaai i luga atu pe siomia foi i lau vaai. E foliga mai e tetelē tele ma atonu e le mafai ona sopoia atu. O na tofotofoga e ono lagona ai le laitiiti, le lē fiafia, fefe, pe tuuatoatasi.
Ae o se isi mea lenei e te taumafai e fai. Ia tasi sau laa i tua ma taumafai e vaai i ou tofotofoga mai se isi vaaiga—o le vaaiga a le Atua.
Faatasi ai ma lenei vaaiga, atonu foi e te iloa ai e le o tuua na o oe e foia ou faafitauli. E i ai sou Tama oi le Lagi e alofa ia te oe ma o le a fesoasoani ia te oe. O isi, aemaise lava le Faaola, ua oo foi i taimi faigata. Latou te mananao e tuuina atu ia te oe le taitaiga e te manaomia, e faatoilalo ai ou tofotofoga, e oo lava i tofotofoga tetele.
E Mafai Faapefea Ona Suia o Tatou Vaaiga?
1 Mulimuli i le Fuafuaga a le Tama Faalelagi.
O Iesu Keriso o lo tatou faataitaiga sili. O mataupu faavae na Ia aoaoina e faigofie, mamana, ma faigofie ona malamalama i ai. Pe o lona uiga ea e faigofie lava ona mulimuli i ai? Ia, e leai. E lē o taimi uma. Ae o taimi uma lava tatou faia mulimuli ia te Ia i le faatuatua, e amata ona siitia o tatou vaaiga. E amata ona tatou vaai i luitau o ni avanoa e aapa atu ai i le Faaola nai lo le vaai atu i ai o ni faasalaga, mailei, po o ni pa pupuni e taofia ai i tatou.
2 Ole atu i le Atua mo se fesoasoani.
O le Atua o Lou Tama Faalelagi. Na te silafia oe, e alofa ia te oe, ma ua saunia e fesoasoani ia te oe i soo se taimi e te ole atu ai. Na aoao mai Peresitene Russell M. Nelson e faapea, “o le vaaiga a le Alii e sili atu nai lo lou poto faaletino. O Lana tali i au tatalo atonu e faate’ia ai oe ma o le a fesoasoani ia te oe ia mafaufau faaselesitila.”
Pe a e tatalo, e mafai ona fesoasoani le Atua ia te oe e vaai i mea e te le mafaia i le taimi nei. E mafai ona Ia taialaina oe i ou tofotofoga ma e oo lava i le tuuina atu ia te oe o le filemu ma le malosi a o e mulimuli ia te Ia.
3 Fesili atu i isi mo se fesoasoani.
Ua tuuina e le Tama Faalelagi tagata lelei i lou olaga e mafai ona fesoasoani ia te oe. A e tauivi ma luitau e foliga mai o loo faamalumalu mai i ou luma, mafaufau e talanoa i se tagata faatuatuaina o le aiga, se uo, se taitai o le Ekalesia, po o lou epikopo.
O le talosaga atu i se tagata agavaa o loo umia le perisitua mo se faamanuiaga o le faamafanafanaga ma le taitaiga o se isi auala matagofie lea e vaai ai ia te oe lava ia ma lou olaga e ala i le vaaiga a le Atua.
Vaai Manino
E pei o se mauga tele o loo tu tonu lava i lou ala, o nisi taimi e mafai ona e lagona ai le telē o ou tofotofoga. Ae a o e ola i le fuafuaga a le Atua ma tuu atu ia te Ia ma isi e fesoasoani ia te oe, e mafai ona suia lou vaai i ou luitau.
E mafai ona e toe laa i tua ma iloa ai o loo i ai se auala e faatoilalo ai ou tofotofoga. Ua saunia e Iesu Keriso se ala e mafai ona e uia. E tusa lava po o le ā le telē o ou tofotofoga, e malosi atu le Atua.