Tatou Talanoa e Uiga i Tupe!

Ua silafia e Iesu e tele mea e te manaomia (mo se faataitaiga, meaai) ma mea e te manao i ai (mo se faataitaiga, taaloga). Ua Ia aoao mai, “Ia outou teuina oa mo outou lava i le lagi, e le faaleagaina ai e le mogamoga po o le ele” (Mataio 6:19–21). O le tele o mea e faatau i tupe e na o le mou atu lava, o lea, ia e mafaufau i mea e te faatauina.

E mafai ona e mafaufau i tupe a o e tuueseeseina mea e te manaomia mai ou manaoga. Mafaufau ia te oe lava, “Pe o ou faatauina ea lenei mea ona ou te manaomia pe ona ou te manao i ai?” Afai e te le o mautinoa, faataitai ona e faatali mo se masina; a mavae lena taimi, toe fesili i le na lava fesili. O le faia o lenei mea, e mafai ai ona e ‘alofia le faatauina o mea ona o le naunau ma taumafai e faaalialia i isi. Nai lo lena, o le a e faia ni faaiuga atamai i le taimi e teu ai ma le taimi e faaalu ai tupe.

I le faataoto i taleni, na faamatala ai e Iesu se matai na tuuina atu ni aofaiga eseese o tupe (ua ta’ua o “taleni”) i ni auauna se toatolu. Sa faaluaina e auauna e toalua le tupe na tuuina atu ia i laua, ma sa tanumia e le auauna e toatasi lana tupe. Ina ua toe foi mai le matai, e fiafia o ia i auauna e toalua o e na faateleina a laua taleni ae le fiafia i le auauna e le’i faia (tagai Mataio 25:14–30).

E pei lava ona tuuina atu e le matai i le faataoto i ana auauna taleni, pe a faamanuiaina oe e le Atua i tupe, ua Ia faamoemoe foi ia te oe e faaaoga au mea tautupe e faamanuia ai oe lava ia ma isi. A o e tausia isi, ua e faataunuuina le poloaiga a Iesu ia “alofa atu i lou tuaoi e pei o oe lava ia te oe” (Mareko 12:31).

E le afaina le faatauina o ni mea mananaia, ae e tatau ona e mafaufau i mea e manaomia e oe lava ia, ma isi ae e te lei faia se faatauga. A o e mafaufau i manaoga o isi, o le a fesoasoani le Atua ia te oe ia e iloa le auala e faaaoga ai tupe e faamanuia ai tagata i lou olaga.

Afai e te popole ne’i le lava au tupe ona ua e totogi lau sefuluai, faitau nei upu faamafanafana mai le Atua: “Ina aumaia mea e sefuluai ai a outou mea uma lava i le fale e tuu ai mea … ma ia outou tofotofo mai ai ia te a’u i lenei mea, … pe ou te le tōina pupuni o le lagi mo outou, ma sasaa atu le manuia mo outou, ina seia silisili ona tele” (Malaki 3:10). Afai e te totogi lau sefuluai, o le a sili atu ona faamanuiaina oe e le Atua nai lo le mea e mafai ona e mafaufauina!

Atonu e le faamanuiaina oe i auala faaletino—atonu e le o ia te oe le tupe e te manao e faatau ai se ofutino taugata e te fiafia i ai, o lea, atonu e manaomia ai ona e faatuai le vave faamalieina. Ae o le a faamanuia oe e le Alii. I le alua’i o taimi, o le a faigofie atu ona e totogiina le sefuluai, ma o le a sili atu ona mausali lou agaga e tetee atu i popolega tautupe o loo ia te oe.

Faalagolago i upu a Peresitene Russell M. Nelson: “E leai se tapulaa o le gafatia o le Faaola e fesoasoani ai ia te oe” (Konafesi aoao Oke. 2024 [Liahona, Nov. 2024, 122]). O le faaaogaina ma le mafaufau o au tupe e taulima ai mea manaomia, tausia ai isi, ma totogi ai lau sefuluai, o le a e iloa ai se alofa loloto atu mo le Atua ma isi ma se talisapaia o mea ua ia te oe.