Ko e hā naʻe fai ʻe he kakaí ʻi he Taua ʻo Pēpelí? Ko e hā naʻa nau langa ai iá?

Tā fakatātaaʻi ʻe David Green

Naʻe “fakahū [ʻe Sētane] ki he loto ʻo e kakaí ke nau langa ha taua ke feʻunga hono māʻolungá ke nau lava ai ʻo aʻu ki he langí” (Hilamani 6:28).

Naʻa nau feinga ke fononga ʻi honau hala pē ʻonautolú ki he moʻui mo e fiefia taʻengatá kae ʻikai muimui ʻi he founga ʻa e ʻEikí. Naʻa nau feinga ke “fakaongoongoa ʻa [honau] hingoá” (Sēnesi 11:4) kae ʻikai toʻo kiate kinautolu e huafa ʻo e ʻEikí. Naʻa nau langa ha faʻahinga temipale loi. Naʻa nau feinga ke fakamamaʻo mei he hala te ne tataki ai kinautolu ke “ʻalu hake ki he moʻunga ʻo [e ʻEikí]” (Saame 24:3) ʻaki ʻenau langa pē haʻanau “moʻunga.” Naʻa nau fakakaukau ʻe lava ʻe honau lotó, tekinolosiá, mo e taukeí ʻo fai e meʻa ko iá—ʻo ʻikai ke kau ai e tui kia Sīsū Kalaisí, fakatomalá, ngaahi fuakavá, mo e talangofuá.

Ka ko hono moʻoní, naʻe ʻikai ke nau lava ʻo fakahoko ia.

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē: “ʻOku ʻikai ha [meʻa ko e] ‘founga pē ʻaʻaku’ kapau ʻoku tau fiemaʻu ke muimui ki he sīpinga ʻa Kalaisí. Ko e feinga ko ia ke kumi ha founga kehe ki hēvaní ʻoku tatau ia mo e ngāue taʻeʻaonga ʻi he Taua ʻo Pēpelí kae ʻikai sio kia Kalaisi mo ʻEne fakamoʻuí.”