Naʻá ku Fili ke Maʻu Hoku ʻEnitaumení ʻi Hoku Taʻu 18

Naʻá ku fakakaukau ne u fiemaʻu ke maʻu hoku ʻenitaumení ʻi he temipalé he hoko pē hoku taʻu 18. Naʻe akoʻi au ʻi he konifelenisi lahí ʻe ʻave kitautolu ʻe he ngaahi fuakava fakatemipalé ke tau ofi ange ki he Fakamoʻuí, ʻa ia ko e meʻa tonu pē ia ne u fekumi ki aí.

Naʻá ku ʻiloʻi ko ha fatongia lahi ʻaupito ia ke fai ha fuakava mo e ʻEikí, ko ia naʻá ku fiemaʻu ke fakapapauʻi ko e ngaahi fuakava fakatemipalé ko ha meʻa ia ne u fie tukupā ki ai. Naʻá ku talanoa mo ʻeku pīsopé, ako, pea toʻo ʻa e kalasi teuteu ki he temipalé. ʻI he taimi pē naʻe mahino ai kiate au ʻa e ngaahi tukupā ne u teuteu ke fakahokó, naʻá ku ongoʻi mateuteu. Naʻá ku mateuteu ke tauhi ʻeku palōmesí.

Naʻá ku ʻalu ki he temipale ʻi Lisiponi, Potukalí, ʻa ia ʻoku meimei houa ʻe tolu mo e konga hono mamaʻó. Naʻe hoko ia ko ha aʻusia lelei ʻaupito. Mahalo naʻe ʻikai mahino kiate au ʻa e meʻa kotoa pē koeʻuhí he ko hoku fuofua taimi ia aí, ka naʻá ku ongoʻi e ʻofa ʻa e ʻOtuá, pea naʻe mahino kiate au ko hai moʻoni au: ko ha ʻofefine ʻo e ʻOtuá ʻoku ʻi ai ha ivi malava fakaofo.

ʻOku ʻikai fiemaʻu ia ke tau tatali kae ʻoua kuo tau haohaoa ke tafoki kiate Ia. Ko ʻetau fuofua ʻalu ki he temipalé maʻatautolú, ko ha momeniti ia ʻo e tupulaki lahi. ʻOkú ne fakamālohia moʻoni hotau vā fetuʻutaki mo Kalaisí. Ko ia ʻoku ou tui ko ha taha pē ʻoku holi ki ai, ʻoku totonu ke ne lotua ia mo teuteu, pea kapau ko ʻenau holí ia, ta ko e temipalé ʻa e feituʻu lelei taha ke nau ʻalu ki aí.