Kau Tautehina ʻe Toko Tolu, Fakamoʻui ʻe Taha

Feʻiloaki mo Kālosi!

Taʻu 18. Saiʻia ʻi he keimi vitioó mo e fakapolokalamaʻi e komipiutá. Fie hoko ko ha tokotaha foʻu mo fakaʻuli kā lova ha ʻaho.

ʻOku ʻiloʻi ʻe Kālosi ʻoku ʻomi ʻe he feilaulaú ʻa e ngaahi tāpuakí.

“ʻOku ou maʻu mo hoku tokoua ko Setí ʻa e ʻōtisimí. Naʻe hoko ʻeni ia ke mātuʻaki faingataʻa kiate au ʻa e ako ʻi he ʻapiakó. Pea naʻe fakaafeʻi kimaua ʻe heʻema fineʻeikí ke ma lau e folofolá ʻi he pongipongí fakataha mo e fāmilí, pea naʻe tokoni lahi ia kiate au. Naʻe tokoni ia ke u lavameʻa ʻi he akó pea lava ke u fakafalala pē kiate au.

“ʻI he taimi ʻe taha, ne ʻikai ke u fie ʻalu ki ha konifelenisi ʻa e toʻu tupú he naʻá ku fuʻu femoʻuekina ʻi ha kalasi he akó. Ka naʻá ku ʻalu, pea naʻá ku ongoʻi naʻe tāpuekina au ke u toe lelei ange ʻi he kalasí ʻo laka ange ia he meʻa ne u fakakaukau ki aí. Koeʻuhí ko e ngaahi aʻusia ko ʻení, naʻá ku toloi ʻeku ako ʻunivēsití pea ʻoku ou teuteu atu ke ʻalu ʻo ngāue fakafaifekau. ʻOku ou ʻiloʻi ʻe toe tokoniʻi pē au ʻe he feilaulaú.”

Feʻiloaki mo Seti!

Taʻu 17. Saiʻia he vaʻinga keimi vitioó, ngaohi ha teunga tau pepa fefeka, pea vaʻinga mo e pusi ʻe tolu ʻa honau fāmilí.

ʻOku feinga ʻa Seti ke angaʻofa ki he niʻihi kehé, neongo ʻoku ʻikai faʻa angaʻofa ange maʻu pē e kakaí kiate ia.

“Naʻe ʻi ai ha tamasiʻi he ʻapiakó naʻe ʻi ai haʻane ngaahi palopalema fakaemoʻui lelei. Naʻe ʻikai foki ke ngāue lelei hono matasioʻatá, pea faʻa pāfua ʻi ha ngaahi meʻa. Naʻá ne tō ki lalo ʻi ha ʻaho ʻe taha, pea naʻe fakakata ʻaki ia ʻe he kakaí. Ne ʻikai ke u pehē—naʻá ku ʻalu atu ʻo tokoniʻi hake ia. Ne ʻikai fuoloa mei ai, kuo ʻikai ke ne toe haʻu ki he akó. Naʻá ku sio kiate ia kimui ange ʻi heʻene paati faiʻahó, pea naʻá ne heka ʻi ha saliote teke. Naʻá ku feinga ke tokoniʻi ia ke ne fiefia ʻi heʻene pātí. Naʻá ne hoko ko haku kaungāmeʻa.

“Naʻá ku fakakaungāmeʻa foki he taʻú ni ʻi he KFT. ʻI he kamataʻangá, naʻe ʻikai ke u fie ʻalu. Kuó u ʻosi ʻi ai kimuʻa, pea ne ʻikai fie feohi ha niʻihi ia mo au. Ka ʻi he taʻu ní, ne ʻikai fakamaauʻi au ʻe ha taha—ka naʻa nau houngaʻia ʻiate au mo e meʻa kuó u fouá.”

Feʻiloaki mo ʻAisake!

Taʻu 14. Saiʻia he vaʻinga keimi vitioó, vaʻinga mo ʻenau fanga pusí, pea ako ke hoko ko ha toketā manu ʻi ha ʻaho.

ʻOku falala ʻa ʻAisake ʻe tokoniʻi ia ʻe he Fakamoʻuí.

“Naʻa mau ʻi he ʻapi ʻo ʻeku kui fefiné ʻi ha ʻaho ʻe taha, pea hū mai hoku tokouá mo e kāsiní mo ha kiʻi pusi siʻisiʻi lanu moli. Naʻe lavea ia pea ʻikai falala ia ki ha taha ʻo kimautolu. Ne faifai pē pea falala mai kiate au. Naʻá ku tokangaʻi ia pea ʻoange haʻane meʻakai. ʻI he hokosia ʻa e taimi ke mau ō aí, naʻe fakaʻatā au ʻe heʻeku ongomātuʻá ke u ʻalu mo ia ki ʻapi. ʻOku ou tui naʻe tokoniʻi au ʻe he Laumālie Māʻoniʻoní mo Sīsū Kalaisi.

“ʻI ha taimi ʻe taha, ne u ongoʻi hangē ne ʻikai ke u mahuʻinga hangē ko e kakai kehé. Naʻá ku lau e folofolá peá u lau ai ʻi he ʻAlamā 7:11: ‘Pea te ne hāʻele atu, ʻo kātakiʻi ʻa e ngaahi mamahí mo e ngaahi faingataʻá pea mo e ngaahi ʻahiʻahi kehekehe kotoa pē.’ Ko hono moʻoní naʻe foua ʻe Sīsū Kalaisi ʻetau mamahí kotoa, pea te Ne ʻi ai maʻu pē ke tokoniʻi kitautolu, ʻo aʻu ki he fanga kiʻi meʻa iiki tahá.”

ʻOku ʻikai ko ha kau tautehina pē ʻa Kālosi, Seti, mo ʻAisake—ko ha ngaahi kaungāmeʻa kinautolu. Pea ʻoku nau takitaha falala ki honau Kaungāmeʻa mo e Fakamoʻui māʻongoʻonga tahá, ko Sīsū Kalaisi.

ʻAisake: “ʻOku ou ʻiloʻi ʻoku moʻui ʻa Sīsū Kalaisi. Naʻá Ne fuesia hotau ngaahi mamahí kotoa. ʻOku ʻikai faingofua maʻu pē ʻa e moʻuí, ka ʻoku sai pē ia. Te Ne lava ʻo fakahoko ha ngaahi mana.”

Seti: “Koeʻuhí ko Ia, ʻe lava ke tataki ʻetau ngaahi moʻuí ki he feituʻu totonú. Kapau te tau tuku ke Ne tataki kitautolu, ʻe lelei e meʻa kotoa pē.”

Kālosi: “ʻOku maʻu ʻe he Tamai Hēvaní mo Sīsū Kalaisi ʻa e mālohi ke tokoniʻi kitautolu. Kapau te tau talangofua kiate Kinaua, te Na tokoniʻi kitautolu ʻi he ngaahi meʻa ʻoku tau foua ʻi heʻetau moʻuí.”