“Kuo vete ʻeku ongomātuʻá, pea ʻoku ʻikai saiʻia hona taha ʻi he Siasí. Te u lava fēfē ʻo maʻu ʻa e Laumālié ʻi he taimi ʻoku ou nofo ai mo e toko taha ko iá?”

“ʻI he Tokāteline mo e Ngaahi Fuakavá 11:21, ʻoku fakahā mai ai ʻe he ʻEikí kiate kitautolu: ‘ʻOua ʻe feinga ke malanga ʻaki ʻa ʻeku leá, kae fuofua feinga ke maʻu ʻeku leá … ; pea, kapau te ke loto ki ai, te ke maʻu leva ʻa hoku Laumālié.’ Hokohoko atu hoʻo fekumi ki he Laumālie Māʻoniʻoní ʻi he faʻa kātaki, angaʻofa, ako folofola, lotu, mo e ʻaukai. Te Ne tataki koe.”

Keipiliela A., 16, Sangato Paulo, Palāsila

“Ko e ngaahi meʻa ʻe niʻihi naʻe ʻaonga kiate aú ko hono tuku haku taimi ke u lau ʻa e folofolá ʻi he ʻaho takitaha, lea lelei mo laukau ʻaki ʻeku tuí, pea hoko ko ha faʻifaʻitakiʻanga lelei. Te u lava foki ʻo lotu ʻi ha faʻahinga taimi pē pea ʻoku ʻi ai maʻu pē ʻa e Tamai Hēvaní ke tokoniʻi au.”

ʻĪfeni W., 17, Uāsingatoni, USA

“Ne u ʻosi aʻusia ʻa e tūkunga ko ʻení kimuʻa, pea naʻá ku lotua ke u lava ʻo maʻu ha fakakaukau ʻoku taʻengatá. Lotu mo ʻaukai ke ke lava ʻo ongoʻi ʻa e Laumālié, pea ʻe ʻoatu ʻe he Tamai Hēvaní ʻa e tali lelei taha ke fakaleleiʻi ʻaki ʻa e tūkunga ko ʻení!”

ʻIsapela L., 17, Sangato Paulo, Palāsila

“Ko e hoko ʻo anga faka-Kalaisí ʻa e taha ʻo e ngaahi founga lelei taha ke fakaafeʻi ai ʻa e Laumālié mo ongoʻi ʻa e fiefiá mo e melinó. ʻOku ou ʻilo ko e taimi ʻoku ou tokoni ai mo angaʻofa lahi ange ki ha tahá, ʻoku ou ongoʻi moʻoni ʻa e Laumālié.”

Meipele K., 15, ʻIutā, USA

“ʻOku ou ongoʻi ʻa e Laumālié ʻi he taimi ʻoku ou fai ai ʻa e ngaahi meʻa ʻoku totonú ʻi he mātuʻa ko iá, ʻo hangē ko e lotu ʻi he taimi maʻu meʻatokoní mo hono lau ʻeku folofolá. ʻI heʻeku hoko ko ha faʻifaʻitakiʻanga ʻi heʻeku ngāue fakafaifekaú, ʻoku fakatupulaki ai ʻeku fakamoʻoní, ʻa ia ʻokú ne tokoniʻi au ke u ʻiloʻi ʻa e Laumālié mo tuku ha taimi moʻó e Tamai Hēvaní mo Sīsū Kalaisi!”

Mala B., 13, ʻOniteliō, Kānata